HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 20 748 Semadirek'de Rumların mükemmel bir mektebleri vardır. Oraya gitdiğimiz mevsim taʻtîl zamâ- nı idi. Evvelen orada ikâmet etdik. Sonra oradan eski mektebe nakletdik. Burası gâyet fenâ, fevkalâde soğuk ve rutûbetli idi. Maʻamâfîh bizi iskelede hâlî mahallerde bırakdıklarından mecbûren Kara Di- mitri'nin kahvehânesini tutduk. Burası terbîʻan kırk beş metre bir mahal olduğundan yetmiş kişinin burada çekdiği müşkilât pek azîm idi. Zâten memleketlerimizden yazlık elbise ile çıkarılmış olduğu- muz ve bilâhare ahâlînin merhameten verdiği çergeler de elimizden alınmış olduğu düşünülür ise, bu müşkilâtın fevkalâdeliği bir kat daha tezâhür eder. Midilli'de Kulaksızzâdeler Câmiʻi'nde ve bir de misâfirhâne-i askerî ittihâz olunan bir dâirede ve Hanya'da Mevlevî Dergâhı'nda ve avdetde Pire'de bir gece meydânda yatdıkdan sonra Rufe'deki askerî kışlasında kaldık ve oradan vapur ile İstanbul'a gitmek üzere Milos'daki dîndâşlarımızı alarak Milos'a gitdik. Vapura dokuz yüz küsûr kişi irkâb olunarak ertesi günü yola çıkarıldık ve bir hafta vapur içinde kaldıkdan sonra Pire'den İstanbul için aldığımız yüz altı esîr ile berâber yine Milos'a döndürüldük. Orada hastalık olduğundan yirmi-otuz kişiden mâʻadâsını şarâb depolarına idhâl et- dikden sonra bir gece cümlemizi evvelce hânelere çıkmış olanlarla birlikde Değirmenler semtine açığa çıkardılar. Orada bir-iki hâneden mâʻadâ kâbil-i iskân mahal ve çadır bulunamadığından oraya mahsûs olan yer altında vâkiʻ inler ve kovuklar içine girdik. [223] Dört-beş gece orada vakit geçirdik. Baʻdehû Propontis vapuruna râkiben yola çıkdık. _______________ İzmir'e Gelen Sivil Üserâ 23 Mart'da biri Pire'den, diğer ikisi Girid'den gelen ve üserâyı hâmil olan üç vapur Klazomen Tahaffuzhânesi'nin önünde demir atmışdır. Büyük bir motor ile karaya çıkarılan bîçâre esîrler, sâhile ayak basar basmaz hemen toprağa kapanarak vatanın mübârek yerlerini öpmek ve koklamak saʻâde- tiyle sermest oluyorlar idi. Pire'den gelen Maryalavelopi vapurunun yolcuları arasında hastalık zuhûr etdiğinden bunlar karantinaya tâbiʻ tutulmuşlar ise de Girid'den gelen İtaki ve Kephalonia vapurlarının esîrleri saç kes- me, istihmâm, etüv ile eşyâ tathîrâtı gibi sıhhî muʻâmelâta tâbiʻ tutuldukdan sonra birincisi 24, ikin- cisi 25 Mart'da İzmir'in Punta iskelesine muvâsalat etmişlerdir. İzmir gazetelerinde okuduğumuza göre üserâmız karaya ayak basdıkları anda husûle gelen he- yecân hem garîb bir hüzün hem de azîm bir sürûr ile mümtezic olarak herkesi ağlatmışdır. Üserâmızın Punta iskelesinden Yalaviste civârında kâin Hilâl-i Ahmer misâfirhânesine kadar el- lerindeki birer parçadan ibâret nâçîz eşyâlarıyla berâber nakillerine Hilâl-i Ahmer Cemʻiyeti Heyʼet-i Merkeziyesi tarafından yirmi kadar yük arabası, dâire-i belediye tarafından da yirmi kadar yük araba- sı tahsîs edilmiş olduğundan esîr kardeşlerimiz bu arabalarla misâfirhâneye naklolunmuşlardır. Hilâl-i Ahmer misâfirhânesinde azîz misâfirlerimize akîb-i vürûdlarında çorba, et, pilav ve tat- lıdan mürekkeb bir öğle yemeği verilmiş, ikindi üzeri de kendilerine ayrıca çaylar, kahveler ikrâm edilmişdir. Akşam da nohudlu et, pilav ve irmik helvâsından üç dürlü yemek verilmişdir. Misâfirhâne 16 büyük koğuşu muhtevîdir. Bu koğuşlarda yasdık, yorgan, çarşaf vesâire gibi te- ferruʻâtıyla 388 yatak vardır. Gerek bu yataklarda gerek muşammaʻ ve örtülerde, peşkirlerde, yemek kablarıyla kaşık ve çatallarda husûsî bir nezâfet göze çarpmakda idi.