HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 20 753 Buna mukâbil, Türkiye'deki Yunan esîrlerin gördükleri hüsn-i muʻâmeleye şehâdet eden Ana- dolu Ajansı'nın âtîdeki teblîğini de yine buraya derc ediyoruz: "-Ankara, 6, An[adolu] A[jansı] Beynelmilel Salîb-i Ahmer Murahhası Guénod'nun da hâzır bulunduğu bir teftîş esnâsında Tor- balı'da beşinci üserâ taburundaki Yunan efrâdı tarafından verilen beyânnâmenin sûret-i mütercemesi ber-vech-i âtîdir: 1-Mensûb olduğumuz üserâ garnizon muhâfaza efrâdıyla zâbitânın ve bilhâssa tabur kumanda- nımızın bize karşı göstermiş oldukları insânî muʻâmeleden son derece müteşekkir olduğumuzu iʻlân etmekle bahtiyârız. 2-Bulunduğumuz Torbalı nâhiyesi bazı Yunan serserileri tarafından ihrâk edilmiş olmasına rağ- men mevcûd mebânînin en havâdâr ve en iyileri ikâmetimize tahsîs edilmişdir. 3-Ahvâl-i sıhhiyemize bir Türk neferinden ziyâde iʻtinâ edilmekdedir. 4-Erzâk ve melbûsât olarak bir Türk neferine her ne veriliyorsa biz Yunan esîrlerine de aynı şey verilmekdedir. 5-Tâm bir istirâhat hâlinde bulunarak iyi bakıldığımız umûmca maʻlûm olmak üzere şu beyân- nâmemizi takdîm eylemekle kesb-i şeref eyleriz". *** Türk ve Yunan asker ve sivil üserâ hakkında afv-ı umûmî iʻlân edilmesi, Lozan'da akdolunan iʼtilâfnâme ahkâmından bulunmasına mebnî, Türkiye Büyük Millet Meclisi tarafından sûreti zîre derc edilen kânûn neşredilmişdir: Mâdde 1 – Türkiye Büyük Millet Meclisi Hükûmeti ve Yunan fevkalâde murahhasları tara- fından Lozan'da mütekâbilen kabûl edilen 30 Kânûn-ı Sânî 1923 târîhli iʼtilâfnâmenin dördüncü ve beşinci mâddeleri mûcebince Türkiye Hükûmeti elinde bulunup iʻâde edilecek olan askerî ve sivil üserâdan hukûk-ı umûmiyeye âid cerâimden dolayı mahkûm veya taʻkîbâta maʻrûz bulunanlar hak- kında afv-ı umûmî iʻlân edilmişdir. Mâdde 2 – İşbu kânûn târîh-i neşrinden iʻtibâren merʻiyyü'l-icrâdır. Madde 3 – İşbu kânûnun icrâsına Adliye ve Müdâfaʻa-i Milliye vekîlleri meʼmûrdur. 31 Mart 1339 [1923] *** Yunanlıların Balıkesir'den alıp götürmüş olduğu sivil esîrlerimizden elli beş vatandaşımızın Yu- nanistan'da siyâsî mücrim oldukları bahânesiyle hapis ve bir kısmının iʻdâma ve bir kısmının da 101 seneye ve daha diğer muhtelif cezâlara mahkûm edildikleri ihbâr edilmişdir. Bunun üzerine Hilâl-i Ahmer Cemʻiyeti, mübâdele-i üserâ mukâvelenâmesi ahkâmına muhâlif olan ve tarafeynce üserâ hakkında iʻlân edilen afv-ı umûmî ile kâbil-i teʼlîf olmayan bu hareketden dolayı, Yunan makâmâtı nezdinde îcâb eden teşebbüsâtın icrâsıyla bu elli beş vatandaşımızın tahliye ve tarafımıza iʻâdesinin teʼmîni için Muhtelit Komisyon Reîsi Mîralây Wildbolz'a bir telgrafnâme keşîde etdi. ***