HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 20 755 Fukarâyı itʻâm, âcizlere ihsân kadar nezd-i ilâhîde makbûl olan bir şey var mıdır? Biz, öteden beri şu memleketde her nevʻ iʻâneye iştirâk eylediğimiz için bugün Anadolu'nun sefâlet yüzünden mahkûm-ı memât olan yetîmlerine de elimizden gelen gayreti esirgemeyeceğimiz pek tabîʻîdir. Daha geçen sene Kırım açlarına, Rusya'daki müslümân kardeşlerimize de mümkün mer- tebe muʻâvenete koşan biz değil mi idik? Aynı muʻâveneti şimdi de Anadolu'nun maʻsûm ve bîkes yavrularına yaparsak bu bizim için bir şeref değil midir? Fi'l-vâkiʻ paramızın bugünkü kıymetine nazaran teberruʻâtımız büyük bir yekûn teşkîl etmeye- cekdir. Maʻamâfîh ne de olsa 'hiç'in yanında her hâlde bir kıymeti vardır. Binâenaleyh memleketimiz muhtâcînini düşünürken, bizden uzak olan ve fakat dîn ve ırk cihetiyle bizimle berâber bulunan felâ- ketzede müslümân yavrularına da muʻâvenet lâzım geldiğini unutmamalıyız". _______________ Mısır Hilâl-i Ahmer Cemʻiyeti Mısır Hilâl-i Ahmer Cemʻiyeti Meclis-i İdâresince müddetleri münkazî aʻzâ yerlerini doldur- mak üzere geçen 17 Mart'da intihâbât icrâ edildiğini Mısır gazetelerinde okuduk. Müceddeden intihâb olunan zevât-ı kirâm şunlardır: Mehmed Muhib Paşa, Hâfız Hasan Paşa, es-Seyyid Abdülhamid el-Bekrî Efendi, es-Seyyid Mustafa Abdürrezzak Efendi, Henri Tus Bey, Mehmed Mazhar Bey, Ahmed Zeki Ebussuud Bey, Ahmed Necib el-Hilâlî Bey, Doktor Ali İbrahim Bey, Doktor Ahmed İsa Bey. Bundan başka Mehmed Muhib Paşa birinci reîs-i sânî, Doktor Mehmed Cahin Paşa ikinci reîs-i sânî, Henri Tus Bey veznedâr, Ahmed Necib el-Hilâlî Bey kâtib-i umûmî intihâb edilmişlerdir. Türkiye Hilâl-i Ahmeri pek muʻazzez ve sevgili hemşîresi olan Mısır Hilâl-i Ahmeri'ne bu münâsebetle takdîm-i tebrîkât ile bu yeni heyʼetin ikdâm ve mesâʻîsi sâyesinde bu büyük İslâm mü- essesesinin sürʻatle terakkî ve inkişâf eylemesini temennî etmekle büyük bir hazz-ı vicdânî duyar. _______________ Müfettiş-i Umûmîmizin Mühim Bir Teberruʻu Hilâl-i Ahmer Cemʻiyeti Müfettiş-i Umûmîsi Müderris Doktor Celâleddin Muhtar Beyefendi Anadolu muhtâcîni için işlenilmiş 1.209 aded kürklük koyun derisi teberruʻ etdiler. Hilâl-i Ahmer, müderris-i muhteremin bu yeni ve cidden semîhâne teberruʻuna karşı dahi Ana- dolu felâketze[de]gânı nâmına arz-ı şükrân eder. *** Dersaadet'de Hüsnüzâdeler ve Şinasi Beyler Ticârethânesi'nin Manchester'daki şerîkleri Nuri Hüsnü Bey tarafından Hilâl-i Ahmer'e basma parçalarını hâvî bir sandık ihdâ edildi. Müteberriʻe tak- dîm-i şükrân ederiz.