HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 21 794 Garnizonu'nda hamiyetli esîrlerimiz tarafından açılmış olan esîr çocuk mektebini gösteriyor. Hilâl-i Ahmer tarafından bundan bir buçuk sene evvel bu mektebin levâzım-ı kırtâsiyesine medâr olmak üzere yüz lira gönderildiğini de bu münâsebetle zikredeceğiz. 35-40 talebeyi ihtivâ eden bu mektebi açan ve fahriyen ders veren muhterem ve hamiyetli va- tandâşlarımızın esâmîsi ber-vech-i âtîdir: Eskişehir daʻvâ vekîllerinden Takiyyüddin Bey müdür, Bursa vilâyetinde Osmangazi Nâhiyesi Müdürü Ömer Fevzi Bey muʻallim, Alaşehir Kasabası sâbık Hükûmet Tabîbi ve lâhık İzmir Merkez Belediye Tabîbi Hüseyin Necati Bey muʻallim. Hanya'daki üserâmız Suda Gazinosu'na nakledildikleri vakit bu mekteb dahi Suda'ya nakledil- miş ve orada dahi tedrîsâta devâm olunmuşdur. _______________ On Birinci Beynelmilel Salîb-i Ahmer Konferansı Önümüzdeki 28 Ağustos'da Cenevre'de On Birinci Beynelmilel Salîb-i Ahmer Konferansı küşâd edilecekdir. Beynelmilel Salîb-i Ahmer Cemʻiyeti'nden Hilâl-i Ahmer'e vârid olan daʻvetnâ- mede, Hilâl-i Ahmer murahhaslarının esâmîsi taleb edildiğinden şehr-i hâlin dördüne musâdif Cuma günü Hilâl-i Ahmer binâsında akd-i ictimâʻ eden merkez-i umûmî, Hilâl-i Ahmer Reîs-i Fahrîsi Mü- derris Doktor Besim Ömer Paşa ile Hilâl-i Ahmer Birinci Reîs-i Sânîsi Müderris Doktor Âkil Muhtar ve Türk muharrirlerinden Ahmed İhsan Beyefendilerin Hilâl-i Ahmer murahhasları sıfatıyla bu kon- feransa iştiraklerine karâr vermişdir. _______________ [255] Anadolu'da İnşâât Hilâl-i Ahmer Müfettiş-i Umûmîsi Müderris Doktor Celâleddin Muhtar Beyefendi'nin taht-ı nezâretinde olmak üzere başlamış olan Garbî Anadolu inşâât projesi peyderpey kuvveden fiʻle çı- karılmakda ve vesâitin müsâʻade etdiği derecede inşâât vücûda getirilmekdedir. İzmir'de bulunan Hilâl-i Ahmer Murahhası Doktor Ömer Lütfi Bey'den şimdiye kadar inşâ olunan hâne ve barakalara müteʻallik olmak üzere şu telgrafnâmeyi aldık: "-Manisa'da inşâ edilen sekiz odalı dört pavyonun dün zevâlde meʼmûrîn-i mülkiye ve askeriye muvâcehesinde ve Manisa halkının huzûruyla resm-i küşâdı icrâ ve kurbân zebh edilerek yüz nüfûslu otuz âile iskân edilmişdir. Manisa livâsında Hilâl-i Ahmer tarafından 30 Nisan akşâmına kadar yapı- lan inşâât ise ber-vech-i âtîdir: Nefs-i Manisa'da dört pavyondan mâʻadâ altmış, Bozköyü'nde otuz sekiz, Karaali karyesinde elli iki, Kasaba'da on, Kasaba'nın Avşar karyesinde on üç, nefs-i Salihli'de yetmiş ve Salihli kurâsın- da yüz elli iki, nefs-i Alaşehir'de doksan, Alaşehir kurâsında elli altı meskenin inşââtı hitâm bularak muhtâcînin iskân edildiği ve üserâ taburlarından lüzûmu kadar usta ve amele verilmekde olduğundan inşââtın sürʻatle devâm etmekde olduğu ve Manisa livâsında inşâsı mukarrer bin sekiz yüz meskenin nihâyet Haziran'ın on beşine kadar itmâm ü ikmâl edileceği maʻrûzdur". ***