HİLÂL-İ AHMER MECMÛʻALARI / CİLT 2

Osmanlı Hilâl-i Ahmer Mecmû‘ası Sayı 14 477 [44] Menderes havâlîsinden çekilen düşman dahi o havâlîde azîm cinâyetler irtikâb etmiş ve birçok şehirleri, köyleri kâmilen yakmış ve yalnız Aydın'da pâyidâr olarak iki binâ bırakmış idi. Üç sene evvel Aydın ve havâlîsinden ve bilâhare Söke'den ve Kuşadası'ndan Manisa livâsına geçmiş olan İslâm mültecîlere iʻâşe, ilbâs ve tedâvî husûslarında ibzâl-i muʻâvenetde devâm eden Hilâl-i Ahmer Cemʻiyeti bir tarafdan da bu yeni fecâyiʻin kurbânlarına âcilen muʻâvenet yetişdirmeğe müsâraʻat etdi. Aydın Mutasarrıflığı'ndan ve Muğla Hilâl-i Ahmeri'nden alınan maʻlûmâtda "bir gün bile vakit geçirilmeksizin halkın muʻâvenet ve imdâdına koşmak lüzûmu" bildiriliyor idi. Aydın ve havâlîsi için İstanbul'dan iʻzâm edilecek heyʼetin mahalline muvâsalatına kadar zavallı halka hiç olmazsa iʻâşe husûsunda yardımda bulunmak üzere Muğla Hilâl-i Ahmer Merkezi emrine on bin lira gönderilmiş ve merkez-i mezkûr reîsi Bahaeddin Efendi'nin hemen mahalline azîmetle îfâ-yı vazîfeye başlaması ricâ edilmiş idi. Muğla Hilâl-i Ahmer Merkezi, bir tarafdan senelerden beri oralara sığınmış ve iʻâne sâyesinde yaşamış olan mültecîleri memleketlerine iʻâde ve diğer tarafdan da Aydın'da bir fırın teʼsîs eyleyerek halka ekmek yetişdirmeğe müsâraʻat etdi. İzmir-Manisa, Aydın, Bursa ve havâlîsi düşman tahrîbâtından pek ziyâde müteessir oldukların- dan bu havâlî için ayrı ayrı birer imdâd-ı sıhhî heyʼeti ihzâr ve iʻzâmı İstanbul Hilâl-i Ahmer Merkez-i Umûmîsi'nden ricâ edilmişdir. Merkez-i umûmî, tafsîlâtı kısm-ı mahsûsunda gösterilen bu üç heyʼeti derhâl ihzâr ve iʻzâm eyledi. _______________ Anadolu'ya Yeniden Yeniye Gönderilen Hilâl-i Ahmer İmdâd-ı Sıhhî Heyʼetleri Garbî Anadolu kıtʻasının düşmandan tathîr edilmesi üzerine orada kalan ahâlînin ıztırâbât içinde olduğunu haber alan Hilâl-i Ahmer Cemʻiyeti hemen Aydın, İzmir-Manisa ve Bursa taraflarına birer imdâd heyʼeti gönderdi. Mütâreke'nin akdi ânından Anadolu'nun düşmandan temizlenmesi zamânına kadar Anadolu'ya gönderilmiş olan on imdâd heyʼetine bu üç heyʼet dahi zammolunur ise, cemʻiyeti- mizin şimdiye kadar techîz ve iʻzâm eylediği heyʼetlerin adedi on üçe bâliğ olmuş olur. On Birinci Aydın Hilâl-i Ahmer İmdâd-ı Sıhhî Heyʼeti 23 Eylül 1338'de [1922] Méssagéries Kumpanyası'nın Pierre Loti vapuruyla Aydın'a gitmek üzere İzmir'e azîmet etmişdir. Bu heyʼeti terkîb eden zevâtın esâmîsi: * Doktor Kemal Bey, operatör ve sertabîb * Doktor Alimcan Bey, tabîb * Doktor Ahmed Nabi Bey, tabîb * Eczâcı Safvet Bey, eczâcı * Fuad Bey, idâre meʼmûru * Hakkı Bey, idâre meʼmûru muʻâvini On Birinci Hilâl-i Ahmer Heyʼeti'nin muhtâcîn-i ahâlîye tevzîʻ edilmek üzere berâberinde aldı- ğı eşyâ şunlardan ibâretdir: _______________