HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 22 832 Hilâl-i Ahmer Anbârı'nda başka yerlerde nâdiren görülen bir "hâssa", bir "rûh" vardır. Vazîfe aşkı, sürʻat, derʻuhde edilen işin sağlam olmasına dikkat etmek gibi evsâf ile tecellî eden bu "rûh"un kıymetli semereleri şimdiye kadar bâliğan mâ-belağ iktitâf edilmiş, el-ân da edilmekdedir. Anadolu, ıztırâblar içinde kıvranır iken, Yunan tevsîʻ-i işgâlinin intâc etdiği hicretler çoğalır iken, mecrûhların, hastaların, eytâm ü erâmilin adedi günden güne artar iken, Yunan ordusunun yakıp yıkdığı kasabalardan, köylerden ahâlî kaçar iken Hilâl-i Ahmer müşfik bir vâlide gibi bütün bu felâ- ketzedelerin imdâdına koşuyor idi. İmdâda koşmak ise söz ile, edebiyât ile, emirler yazmak ile değil, faʻâliyât ile olur. Hilâl-i Ahmer Merkez-i Umûmîsi'nin bu işlere taʻalluk eden mukarrerâtını Hilâl-i Ahmer Merkez Anbârı günü gününe ve büyük bir "sürʻat" ile icrâ ediyor idi. Bu anbârda çalışanlar için ne "sütûn ve istirâhat" ne de "sâʻât-i mesâʻî" yokdur. Hilâl-i Ahmer anbârcılarının şiʻârı, "felâketzedelere derhâl ve bir an evvel yardım yetişdirmek"dir. İşte hep bu mu- kaddes şiʻârı taʻkîb eyleyen ve felâketzedelere karşı büyük bir hiss-i şefkat ü merhamet ile mütehas- sis olan Hilâl-i Ahmer Anbâr meʼmûrîni, hademesi, amelesi geceye gündüze bakmayarak anbârda, sokakda, denizde, şimendiferde, vapurda, açıkda, kırda mevsimin ve iklîmin bütün şedâidine göğüs gererek çalışmakdan fâriğ olmuyorlar!.. Artvin mutasarrıfının bir sûretini aşağıya derc eylediğimiz tahrîrâtı da bu bizim bildiklerimizi biraz daha teʼyîd ediyor: Tahrîrât Sûreti Artvin Sancağı Mutasarrıflığı Tahrîrât Kalemi Aded Umûmî: 4536 Husûsî: 473 Dersaadet'de Hilâl-i Ahmer Cemʻiyeti Kâtib-i Umûmîliği'ne Artvin'de idâre-i husûsiye-i livâ hesâbına teʼsîsi karârlaşdırılan Memleket Eczâhânesi'ne muk- tezî eczâ-yı tıbbiyenin mübâyaʻa ve sevkine tavassut buyurulması husûsunda vâkiʻ olan ricâ ve mürâ- caʻatımızın lütfen hüsn-i kabûl ve isʻâfından ve bilhâssa on dört sandığın muhteviyâtı olan mezkûr eczânın nefâset ü mükemmeliyeti ve râyice nazaran fiyâtlarının iʻtidâl ve ehveniyetiyle berâber paket ve sandıkların gâyet iʻtinâlı bir sûretde ambalaj yapdırılmak sûretiyle pek saʻbü'l-mürûr olan Ho- pa-Borçka yollarından hiçbir gûnâ ârızaya uğramaksızın tamâmen ve sâlimen gelebilmesi teʼmîn edilmiş olmasından dolayı livânın en hâr ve samîmî teşekkürât-ı minnetdârânesini arz ve âlem-şümûl hidemât-ı müşfikasından delâlet-i aliyyeleriyle hisseyâb olduğumuz muhterem Hilâl-i Ahmer'imizin teʻâl ü tevâlî-i şân ve muvaffakiyâtını temennî eyleriz, efendim. Fî 3 Mayıs 1339 [1923] Sıhhiye ve Muʻâvenet-i İctimâʻiye Müdürü Doktor Cevdet Şakir Artvin Mutasarrıfı Rahmi