HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 22 833 [280] Ankara Müdâfaʻa-i Milliye Vekâleti Umûr-ı Baytariye Dâiresi'nden de Hilâl-i Ahmer'in şâyân-ı takdîr hidemâtından bâhis âtîdeki tahrîrâtı aldık: "-İstanbul Hilâl-i Ahmer Cemʻiyeti Riyâset-i Aliyyesi'ne, Hilâl-i Ahmer müessesesinin Müdâfaʻa-i Milliye Vekâleti'nin her devâirine şâmil olan muʻâ- venât ve teshîlâtını Umûr-ı Baytariye Dâiresi dahi kendi nâmına ve kendi işlerinde yakînen gördü- ğünden ve ale'l-husûs 1338 [1922] nihâyeti olmakla berâber mühim bir ihtiyâcını teşkîl eden eczâ, âlât ve malzemesinin sürʻat, sühûlet ve ehveniyet nukât-ı nazarından emr-i mübâyaʻasının teʼmînine tesâhublarından nâşi en hâr teşekkürât-ı minnetdârânesini arz u iblâğ ile kesb-i fahr u şeref eyler, efendim. Ankara, fî 29 Mayıs [1]339 [1923] Müdâfaʻa-i Milliye Umûr-ı Baytariye Dâiresi Reîs Vekîli Kâimmakâm Halil" Harb-i Umûmî esnâsında Hilâl-i Ahmer, Sina şibh-i cezîresi üzerinde Süveyş Kanalı'na yakın bir hastahâne teʼsîs etmiş idi. Sahrâ içinde ilmin ve fennin son terakkiyâtına göre techîz edilmiş olan bu hastahâne için Hilâl-i Ahmer anbârından gönderilmiş olan bütün sandıkların hiçbir ârızaya uğra- maksızın, hiçbir paketi bozulmaksızın, hiçbir cam âleti kırılmaksızın mahalline vardığını o zamân mezkûr hastahânenin sertabâbeti vazîfesini îfâ etmiş olan Müderris Doktor Neşet Ömer Bey büyük bir takdîr ve sitâyiş ile nakletmiş idi. Hilâl-i Ahmer anbârlarındakilere böyle bir "rûh" nefh eden, etrâfındakilerde bu kadar büyük bir "vazîfe aşkı" uyandıran, herkes bilir ki, Hilâl-i Ahmer Müfettiş-i Umûmîsi Müderris Doktor Celâl Muhtar Beyefendi'dir!!. _______________ Üserâ Mübâdelesi İzmir'de bulunan Hilâl-i Ahmer Murahhası Ömer Lütfi Bey tarafından 17 Mayıs târîhiyle vârid olan telgrafnâmede Klazomen'e 683 esîr vâsıl olduğu ve haklarında tatbîk olunmakda olan karantina muʻâmelâtı ikmâl edildikden sonra İzmir'e nakledildikleri bildiriliyor. Yeni iʻâde olunan bu esîrlerin cedveli ber-vech-i zîrdir: Zâbit 2 Mütekâʻid ve müstaʻfî ihtiyât zâbiti 4 Asker 20 Sivil 634 Kadın 23 683