HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 22 834 14 Haziran'da Hermes vapuru ve Doktor Page'ın refâkatıyla 830 sivil esîrimizin Klazomen Tahaffuzhânesi'ne muvâsalat etdikleri dahi İzmir murahhasımız Doktor Ömer Lütfi Bey'den vârid bir telgrafnâmeden anlaşılmışdır. Geçen mecmûʻada dahi yazıldığı vechile Mîralây Wildbolz'a verilen muhtıralar müfâdınca Yu- nanistan'da henüz birçok esîrimiz vardır. _______________ Siyam İslâmlarından Gelen İʻâne Geçen nüshamızda Hilâl-i Ahmer nâmına iʻâne topladılması için Hilâl-i Ahmer ile Beynelmilel Salîb-i Ahmer arasında husûsî bir iʼtilâfnâme imzâ edildiğini ve bu işi kuvveden fiʻle çıkarmak için Mösyö Schlemmer'in Çin, Hindistan ve Batavya'ya iʻzâm olunduğunu ve mûmâileyhin bu seyâhatin- den avdet etdiğini yazmış idik. Beynelmilel Salîb-i Ahmer ile imzâ edilen iʼtilâfnâme [281] mûcebince, Memâlik-i Osmani- ye'de toplanacak iʻânelerin Anadolu inşâât işlerinde sarf edilmek üzere Beynelmilel Salîb-i Ahmer maʻrifetiyle Hilâl-i Ahmer'e teslîm edilmesi meşrût idi. İşte bu prensibe binâen Beynelmilel Salîb-i Ahmer İstanbul Murahhası Mösyö Burnier, şehr-i hâlin dokuzuna tesâdüf etmiş olan Cumartesi günü, Siyam memleketinin pâyitahtı olan Bangkok şehri ahâlî-i İslâmiyesi'nden cemʻ edilen 35.246,60 İs- viçre frangını Hilâl-i Ahmer Merkezi'ne teslîm etdi. Hilâl-i Ahmer, Siyam Salîb-i Ahmer Cemʻiyeti Reîs-i Sânîsi Prens Paribatre cenâblarıyla Ban- gkok ahâlî-i İslâmiyesi'ne ve Beynelmilel Salîb-i Ahmer Cemʻiyeti'yle cemʻiyet-i müşârunileyhânın İstanbul murahhasına alenen arz-ı teşekkürât eder. _______________ Beyrut Hilâl-i Ahmer Cemʻiyeti Beyrut'da 1340 senesi Şaʻbânü'l-Muʻazzam'ında [Nisan 1922] teessüs eden Hilâl-i Ahmer Cemʻiyeti'nin faʻâliyetinden bâhis Arabca bir risâle aldık. Bu risâlede Beyrut'da "Türk Mecrûhlarına Muʻâvenet Komisyonu" nâmıyla bir komisyon teşekkül etdiği ve Beyrut Müslümânlarının mezkûr komisyona ne sûretle muʻâvenet etdikleri ve "Muzaffer Türk Merkezi" olan Ankara'daki Hilâl-i Ah- mer Murahhaslığı'na dört taksîtde 6.900 Türk lirası ve "İslâm Kahramânı" Gâzî Mustafa Kemal Pa- şa'nın taht-ı himâye ve riyâsetinde bulunan Ankara Himâye-i Etfâl Cemʻiyeti'ne de 1.000 Türk lirası gönderildiği mukayyeddir. Beyrutlu kardeşlerimizin bu muʻâvenetlerinden pek ziyâde mütehassis olan Türkiye Hilâl-i Ah- mer Cemʻiyeti, Beyrut Müslümân ahâlîsine arz-ı şükrân ve Beyrut Hilâl-i Ahmer Cemʻiyeti'ni teʼsîs etmiş olan zevât-ı âtiyeye de ayrıca arz-ı minnetdârî eyler: * Eş-Şeyh Abdülbâsit el-Ünsî Efendi, reîs * Ahmed Muhtar Kabanî Efendi, reîs-i sânî * Hasan Karanfil Efendi, aʻzâ * Eş-Şeyh Mahmud Muharrem Efendi, aʻzâ * El-Hâc Mustafa Said el-Kandur Efendi, aʻzâ * Mehmed Ali en-Nablusî Efendi, muhâsebeci * Enis en-Nahas Efendi, aʻzâ