HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 22 839 Şile Yangını Şehr-i hâlin beşine musâdif Salı günü kable'z-zevâl sâʻat on birde Şile'de bir yangın zuhûr et- miş ve gece sâʻat on ikide yedi yüz elli hâne ve yüz dükkân ve câmiʻ ve medrese ve kilise muhterik olduğu hâlde söndürülmüşdür. Kasabanın üç bin nüfûsundan bin beş yüzü açıkda, meskensiz kalmış ve ahâlîye âid eşyâdan pek çok zâyiʻât vukûʻ bulmuş ise de insân ve hayvânca telefât olmamışdır. Bu fâciʻadan haberdâr olan Hilâl-i Ahmer, felâketzedegânın imdâdına koşmak üzere hemen o gün yani Çarşamba günü Doktor Mehmed Emin Bey'in riyâseti altında mahall-i kazâya bir heyʼet-i sıhhiye iʻzâm ve Seyr-i Sefâin'in Gayret römorkörüyle de harîkzedegâna tevzîʻ edilmek üzere 2.500 kıyye ekmek, 300 çuval un, 10 çuval pirinç, 20 çuval fasulye, 10 çuval mercimek, 10 çuval nohud, 7 çuval tuz, 2 fıçı zeytinyağı, 4 fıçı sâde yağı ve 20 çadır irsâl etdi. Ertesi günü Hilâl-i Ahmer, Şile Dispanseri'nde bir depo küşâd etdi ve orada husûsî bir heyʼet tarafından harîkzedelerin ihtiyâcları takdîr ve isimleri tesbît olunarak muhtâclara havâyic-i zarûriye tevzîʻine başlanıldı ve her tarafa çadırlar kurularak meskensiz kalmış olanlar ibâte edildi. _______________ Garbî Anadolu'daki Hilâl-i Ahmer Heyʼetleri Garbî Anadolu'nun Yunan ordusundan tathîrini müteʻâkib, Hilâl-i Ahmer oralara beş muhtelif heyʼet göndererek felâketzedegânın ibâte, iʻâşe ve ilbâsı husûslarını teʼmîn etmeğe çalışdı. Bu beş heyʼet, sekiz ay çalışdıkdan sonra geçen Mayıs nihâyetinde taʻtîl-i faʻâliyet eylediler. Aydın'da icrâ-yı faʻâliyet etmiş olan 11'inci heyʼet, dispanserini mahallî ihtiyâcâta tahsîs edil- mek ve Aydın Hilâl-i Ahmer Şuʻbesi tarafından idâre edilmek üzere olduğu yerde bırakmışdır. _______________ Hilâl-i Ahmer'in Çiçek Günü Hâsılâtı Bayramın ilk günü, Hilâl-i Ahmer günüdür ve bu mübârek günde sokaklarda çiçek tevzîʻ edil- diği maʻlûmdur. Hilâl-i Ahmer'in bu bayram gerek çiçek tevzîʻâtından ve gerek suver-i sâireden elde eylediği vâridâtın cedvelini buraya derc ederek bütün müteberriʻîn ve mütevassıtîne alenen teşekkür ediyoruz: Kutu Muhteviyâtı Kuruş 1 Ahmed Orhan Bey tarafından derc olunan 2.707 15 Fatih Cemʻ-i İʻânât Heyʼeti tarafından derc olunan 32.943 6 Çengelköy Cemʻ-i İʻânât Heyʼeti tarafından derc olunan 7.720 18 Karagümrük Cemʻ-i İʻânât Heyʼeti tarafından derc olunan 12.193 10 Hasköy Cemʻ-i İʻânât Heyʼeti tarafından derc olunan 15.096 20 Şehremini Cemʻ-i İʻânât Heyʼeti tarafından derc olunan 18.300 2 Çerkesköy Nâhiyesi Müdüriyeti Cemʻ-i İʻânât Heyʼeti tarafından derc olunan 5.243 1 Rumelikavağı Cemʻ-i İʻânât Heyʼeti tarafından derc olunan 2.439