HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 22 841 İhtâr.- Kadıköy şuʻbemizden henüz hesâbât-ı katʻiye vürûd etmediğinden listeye idhâl edilememişdir. İrtihâl-i Müessif Hilâl-i Ahmer Müfettiş-i Umûmîsi Müderris Doktor Celâleddin Muhtar ve Hilâl-i Ahmer Bi- rinci Reîs-i Sânîsi Müderris Doktor Âkil Muhtar ve Türkiye Büyük Millet Meclisi Hükûmeti Sıhhiye Vekâleti erkânından Kemal Muhtar Beyefendilerin vâlideleri hanım 24 Mayıs 1339 [1923] Perşembe sabâhı Büyükada'da irtihâl-ı dâr-ı naʻîm eyledi. Hilâl-i Ahmer Mecmûʻası , cemʻiyetimize pek kıymetli hizmetler îfâ etmekden fâriğ olmayan Celâl Muhtar ve Âkil Muhtar Beyler ile Kemal Muhtar Bey'e an-samîmi'l-kalb arz-ı taʻziyet eder. *** Hilâl-i Ahmer Reîs-i fahrîsi Müderris Doktor Besim Ömer Paşa ve Hilâl-i Ahmer Merkez-i Umûmî aʻzâsından Azmi ve Kemal Beyler ile birâderleri Âgâh Bey'in hâileleri hanım 4 Haziran 1339 [1923] târîhine musâdif Pazartesi günü Makriköyü'nde vefât etmişdir. Hilâl-i Ahmer Mecmûʻası , cemʻiyetimize pek kıymetli hizmetler îfâ etmekden fâriğ olmayan Besim Ömer Paşa hazretleriyle Azmi ve Kemal Ömer ve Âgâh Beylere an-samîmi'l-kalb arz-ı taʻziyet eder. _______________ Hilâl-i Ahmer'e Hâricden Gelen Muʻâvenetler Bulgaristan'da Razgrad ve mülhakâtı ahâlî-i İslâmiyesi'nden 10.995 leva, Bulgaristan'da Filibe kasabasında mukîm tüccârdan Ahmed Hamdi ve Çanakçılı Mustafa Efendilerden 5.000 leva, Ame- rika'da New York'da mukîm Tevfik bin Halil Efendi'den 4 İngiliz lirası, Filibe Hilâl-i Ahmer Komis- yonu Riyâseti'nden 800 Türk lirası, Siyam'da Bangkok Müslümânları tarafından Beynelmilel Salîb-i Ahmer Cemʻiyeti'nin Dersaadet Murahhası Mösyö Burnier vâsıtasıyla Anadolu tahrîbâtının inşââtı için 35.246,60 İsviçre frangı, Eskicuma kasabası ahâlî-i İslâmiyesi'nden Varna Şehbenderliği kâtibi vâsıtasıyla 200.000 leva gelmişdir. Hilâl-i Ahmer, bütün bu müteberriʻîn ve mütevassıtîn-i kirâma takdîm-i teşekkürât eder. _______________ [287] Hilâl-i Ahmer'in İnşâât Faʻâliyeti Yunan ordusu Garbî Anadolu'dan tard edildiği vakit, bulunduğu yerleri ihrâk ve tahrîb etmiş ve yüzlerce kasaba ve köylerin mahvına sebeb olmuşdur. Hilâl-i Ahmer mahdûd vesâitiyle en ziyâde muhtâc olan yerlerde inşââtda bulunarak 26 Mayıs 1339 [1923] târîhine kadar 2.650 pavyon ve bara- ka inşâ etmiş ve takrîben 14.000 kişiye sığınacak bir yer verebilmişdir. Garbî Anadolu Hilâl-i Ahmer İnşâât Müfettişi Halil Sadeddin Efendi tarafından gönderilip âtî- ye derc olunan cedvel, kârilerimize Hilâl-i Ahmer'in bu inşâât faʻâliyeti hakkında mücmel bir fikir verebilir: