HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 23 868 Etıbbâmızın Trakya dâhilinde îfâ etmiş oldukları kıymetdâr ve pek mühim hizmetler halkın minnet ve şükrânını celb etmişdir. _______________ [301] Türbe-i Haydarî Felâketzedegânına Yardım Geçenlerde Acemistan'da Türbe-i Haydarî şehri bir hareket-i arz netîcesi olarak harâb olmuş ve bu fecîʻ vakʻada 3.000 kişi terk-i hayât etmişdir. Acemistan'ın Bern Sefâreti, Beynelmilel Salîb-i Ahmer Cemʻiyeti'ne mürâcaʻat ederek Salîb ve Hilâl-i Ahmer Cemʻiyetlerinin muʻâvenetine tavassut eylemesini ricâ etmişdir. Beynelmilel Salîb-i Ahmer tarafından vukûʻ bulan mürâcaʻat üzerine Hilâl-i Ahmer Acem âfetzedegânı için iki bin Fran- sız frangı göndermeğe karâr vermişdir. _______________ Aras Nehrinin Tuğyânı Aras nehrinin tuğyânı dolayısıyla kâmilen harâb olan Bayezid sancağına mülhak Iğdır kazâsı mülhakâtından dört karye seylâbzedelerinin tohumluk ve yemeklik ihtiyâcları için merkez-i umûmîce bin lira sarfına karâr verilmişdir. _______________ Kütahya, Eskişehir ve Afyonkarahisar Livâlarına Muʻâvenet Heyʼât-ı imdâdiyelerimizin menâtık-ı faʻâliyetlerinin hâricinde kalan ve düşman istîlâsına maʻrûz ve müteʻaddid muhârebâta sahne olan Kütahya, Eskişehir livâları muhtâcîni ile Afyonka- rahisarı kahtzedegânına tevzîʻ edilmek üzere yedi vagon unun Dersaadet'den bi'l-mübâyaʻa mezkûr livâlara irsâline merkez-i umûmîce karâr verilmişdir. _______________ Rum Muhâcirleri Karadeniz sevâhilinden gelen Rum muhâcirleri için Haydarpaşa'da teʼsîs edilmiş olan Hilâl-i Ahmer Hastahânesi masârıfı için daha iki bin lira tahsîsât iʻtâsına merkez-i umûmîce karâr verilmişdir. _______________ Çatalca Hilâl-i Ahmer Merkezi 16 Ağustos sene [1]337 [1921] târîhinde teşekkül eden Çatalca merkezinin 16 Haziran sene [1]339 [1923] târîhine kadar mecmûʻ vâridâtı bir milyon dört yüz seksen üç bin sekiz yüz otuz beş kuruş yetmiş beş santime bâliğ olup meblağ-ı mezbûrdan bir milyon üç yüz doksan bin dört yüz on beş kuruş elli santim merkez-i umûmîmize irsal edilmişdir.