HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 23 869 On dört bin sekiz yüz lirayı mütecâviz vâridât teʼmîn eden Çatalca Merkezi ancak bin iki yüz kuruş kadar bir meblağ masraf ihtiyâr etmişdir. Reîs-i Evvel Müftü fazîletlü Osman Efendi'nin Çatalca merkezinin idâme-i mevcûdiyet ve faʻâliyeti için sebk eden gayret ve himemâtı cidden sezâvâr-ı takdîr ve şükrân olduğu gibi Balkan Harbi'nden iʻtibâren birçok mezâlim ve fecâyiʻe sahne ve şâhid olan Çatalca livâsı ahâlî-i müslime- sinin vatanın kurtuluşu ânında Hilâl-i Ahmer'e muʻâvenetde âdetâ yekdiğeriyle müsâbaka etdiğini ve bilhâssa ahâlî-i kurânın pek büyük fedâkârlıkla temâyüz etdiğini zikretmeği de lâzıme-i kader-şinâsî addederiz. _______________ Merhûm Hüseyin Hilmi Paşa'nın Cenâzesi Geçen nüshalarımızdan birinde sâbık Hilâl-i Ahmer Reîsi, Viyana sâbık Sefîr-i Kebîri, esbak sadrıaʻzamlardan Hüseyin Hilmi Paşa'nın vukûʻ-ı irtihâliyle yazmış idik. Merhûm-ı müşârunileyhin naʻşı geçen 23 Haziran'a musâdif Cumartesi günü Viyana'dan getirilerek [302] 25 Haziran'a musâ- dif Pazartesi günü ihtimâmât ve ihtirâmât-ı mahsûsa ve fâika ile Hilâl-i Ahmer Merkez-i Umûmîsi binâsından kaldırılmış ve cenâze namâzı Yeni Câmiʻ'de baʻde'l-edâ istimbotla Beşiktaş'a nakil ve Yahya Efendi Dergâh-ı Şerîfi hatîresinde ihzâr edilen makbere-i mahsûsada defin-i hâk-i mefkaret kılınmışdır. Cenâze merâsiminde zât-ı hazret-i Hilâfet-penâhî nâmına serkâtib ve serkarîn-i Hilâfet-penâhî beyefendiler, Türkiye Büyük Millet Meclisi Hükûmeti Hâriciye Vekâleti İstanbul Murahhası Doktor Abdülhak Adnan Bey, Sadr-ı esbak Salih Paşa, Şâʻir-i aʻzam Abdülhak Hâmid Bey, mülgâ aʻyân aʻzâsından Abdurrahman Şeref Bey, nuzzâr-ı sâbıkadan İbrahim ve Said Beyler, İtalya Fevkalâde Ko- miser Vekîli Mösyö Mayisa, Kont Caprini, İngiliz Başkonsolosu Sir Harry Lamb, Dârülfünûn Emîni Müderris Doktor Besim Ömer Paşa, Hilâl-i Ahmer Müfettiş-i Umûmîsi Müderris Doktor Celâleddin Muhtar Bey, Kâtib-i Umûmî Doktor Hikmet Bey, fahrî Veznedâr Haydar Bey, merkez-i umûmî aʻzâ- sından Doktor Hakkı Şinasi Paşa, Doktor Fuad Paşa, Doktor Mehmed Ali Bey, Doktor Kilisli Rifat Bey, Azmi Bey, Kemal Ömer Bey ile şehrimizin mehâfil-i âliye ve münevveresine mensûb birçok zevât, erkân-ı matbûʻât ve merhûmun meftûn-ı kemâlâtı olan dostları, mahdûmu Kemal Hilmi Bey ve dâmâdları Salahaddin Bey hâzır bulunmuşlardır. Merhûm-ı müşârunileyhi son ikâmetgâhına kadar kemâl-i ihtirâm ile teşyîʻ eden Hilâl-i Ahmer Cemʻiyeti, sâbık reîsinin mezâyâsına ve hamiyetine meftûndur. Hüseyin Hilmi Paşa usûl ile çalışma- ğı bilir, intizâmı sever ve çalışmakdan usanmaz bir recül-i devlet ve recül-i idâre idi. Balkan Harbi esnâsında Hilâl-i Ahmer işlerinde günde on sâʻat çalışır ve saʻy ü gayreti her vakit müsbet netîceler verir idi. Hilâl-i Ahmer, memleket ve millet için büyük bir ziyâʻ olduğu kadar Hilâl-i Ahmer için bir ziyâʻ-ı azîm olan merhûm-ı müşârunileyhin âile-i keder-dîdesine kemâl-i ihtirâm ile arz-ı taʻziyet ve tesliyet eder. *** Şehrimizde çıkan Tanîn gazetesi 24 Haziran târîhli nüshasında cenâze münâsebetiyle merhûm-ı müşârunileyh hakkında âtîdeki satırları yazıyor idi: