HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 25 951 On Birinci Salîb-i Ahmerler Konferansı'nın rûznâme-i mesâʻîsinde mühim bir mevkiʻ işgâl eden Ciraolo projesi hakkında cereyân edecek müzâkerât ile bu bâbda ittihâz olunacak mukarrerâtı tafsîlât-ı lâzımesiyle gelecek nüshamızdan birinde arz edeceğiz. Bu nüshamızda yüz binlerce hayât-ı beşerin mahv u ifnâsına ve milyarlarca frangın ziyâʻına sebeb olan âfât ve mesâib-i umûmiyeden birkaçını derc edeceğiz. [9] Vereceğimiz maʻlûmâtı Cenevre Coğrafya Cemʻiyeti Reîs-i muhteremi Mösyö Raoul Mon- tandon'dan hulâsaten iktibâs ediyoruz: -1- Tezelzülât-ı Arziye Târîhin kaydetdiği zelzelelerin adedi iki yüz bine karîbdir. Bugün mevcûd üç yüz yirmi beş râkım tezelzülât istasyonunun kuyûdâtına nazaran kışr-ı arzın her sene tahmînî otuz bin defa harekete geldiği ve bunlardan otuz kadarının pek muhrib ve pek felâket-engîz olduğu tahakkuk etmekdedir. 1703 Japon hareket-i arzı iki yüz bin kişinin ve 1854 târîhinde yine Japonya'da vukûʻ bulan zelzele yüz bin nüfûsun ve 1893 Hindistan zelzelesi iki yüz bin ve 1693 Sicilya hareket-i arzı altmış bin ve 1783 Calabria zelzelesi otuz iki bin ve 1905 Japon zelzelesi on dokuz bin ve 1906 senesinde yine Japonya'da vukuʻa gelen hareket-i arz yirmi iki bin ve 1908 Messina zelzelesi yüz bin nüfûsun mahv u ifnâsını intâc etmişdir 1 . -2- İndifâʻât-ı Bürkâniye Yanardağların lav, çamur ve kül vesâire gibi indifâʻâtı pek çok insânları hâk-i helâke serdiği gibi îkâʻ etdiği hasârât-ı mâddiye dahi mühimdir. Asr-ı ahîrde zuhûr eden yanardağlardan 1902 senesi Martinique adası indifâʻâtı yirmi dokuz bin ve 1919 Cava adası indifâʻâtı ise yirmi bin kişinin sebeb-i mevti olmuşdur. -3- Orkoz Denilen Medd ü Cezrden Husûle Gelen Tufan-ı Bahrî Güzergâhına tesâdüf etdiği her şeyi mahveden, yalayıp götüren orkoz sularından husûle gelen emvâc-ı cismiyenin bâʻis olduğu hasârât dahi pek müdhişdir. Bunlardan 1796 senesinde Bengal Körfezi'nde zuhûr eden orkozdan yirmi bin nüfûs ile beş yüz bin mevâşînin ve 1831 târîhinde yine aynı körfezde zuhûr eden aynı âfet üç yüz kurâ ve kasabanın ve elli bin nüfûsun ve 1876 senesinde Hindistan'da iki yüz on beş bin insânın mahvına ve ahîren 1923 Şubat'ında Hawai adalarında hâsıl olan orkoz ise elli milyon franklık hasârât-ı mâddiyeye sebeb ol- muşdur. 1 1 Eylül 1339 ve 1923 târîhinde Japonya'da vukûʻa gelen tezelzülât-ı arziye ile işbu tezelzülât netîcesi olarak zuhûr eden tufan-ı bahrî şimdiye kadar emsâli nâ-mesbûk umûmî felâketlerdendir.