HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 25 956 Harîkı müteʻâkib fırında mevcûd çalılar rüzgârın şiddeti hasebiyle Arab Mahallesi'nin muhtelif cihetlerindeki hânelerin birden tutuşmasına bâdî olmuş ve sokakların vazʻiyeti iʻtibârıyla ahâlî ancak Dağdibi tarîkıyla Hünkârsuyu tepelerine ilticâ etme sûretiyle hayâtlarını kurtarıp eşyâlarını kurtarma- ğa muvaffak olamamışlardır. Ale't-tahmîn yedi sâʻat kadar devâm eden harîk 50 dükkân ve 550 hâne yakmışdır. Harîkzede- gânın adedi aʻzamî olarak 1.600 nüfûs tahmîn edilmişdir. Yirmi yedi Ağustos'da Hilâl-i Ahmer Merkez-i Umûmî aʻzâsından Haydar Bey ile Muhâsebeci Bedri Bey mahall-i harîkı bi'z-ziyâre açıkda kalmış olanların iskânları için hemen çadır celbine teşeb- büs ve dükkânların ve bilhâssa fırınların yanmış bulunmasından dolayı mevcûd ekmek yoksulluğunu izâle etmek üzere İstanbul'dan ekmek celb ve çadırlara açıkdakiler iskân etdirilmiş ve ekmek, zeytin, peynir, tevzîʻâtı yapılmak sûretiyle de ibtidâî ihtiyâclarının izâlesine gayret olunmuşdur. Diğer taraf- dan Arab Mahallesi'nde ikâmet eden yerli ve balıkçılıkla müteʻayyiş fukarâ-yı ahâlînin hâl-i sefâleti de nazar-ı dikkate alınarak Sarıyer'de bir Hilâl-i Ahmer aşhânesi teʼsîsi düşünülmüşdür. Ağustos'un yirmi dokuzuncu günü Ortaçeşme'de teʼsîs edilmiş olan seyyâr aşhânede belediye ile müştereken verilmekde olan ekmeğe ilâveten sıcak yemek tabh ve tevzîʻâtı[na] başlanmışdır. Âni maʻrûz-ı felâket olan kardeşlerine karşı muʻâvenet-i hayrhâhîyi kendine şiʻâr edinmiş olan Hilâl-i Ah- mer'imiz ancak gerek ahâlînin ve gerek hükûmetin teshîl-i vezâifiyle felâketin hâsıl eylediği teʼsîrât-ı mâddiye ve maʻneviyenin taʻdîline ve tedâbîr-i ibtidâiye-i mukteziyenin teʼmînine bezl-i ikdâm ey- lemesine binâen şu vazîfe-i mühimmesini îfâ eylemiş bulunan müessese on gün sonra aşhânesinin ilgasına karâr vermiş ise de mahall-i mezkûr heyʼet-i ihtiyâriyesi ve ahâlîsince vâkiʻ olan mürâcaʻat nazar-ı dikkate alınarak iʻtâ edilmekde [14] olan ekmek ve yemek şerâit-i âtiye dâhilinde kalan harîk- zedegâna tahsîs edilmişdir: 1-El-yevm îcârda akârı bulunmayan eytâm, mütekâʻidîn ve maʻzûlînden maʻâşı dört yüzden dûn ve aded-i nüfûsu üç veya üçden ziyâde olan âileler 2-Ufak sermâyeli ve aded-i nüfûsu dört ve dörtden ziyâde bulunan esnâf âileleri 3-Bi'l-cümle maʻâşsız ve kimsesiz dullar ile fakîr ve muhtâc alîl erkekler ve yetîmler ve el- yevm iş bulamamış ve çalışmağa kudreti olmayan erkekler ve âileleri 4-Bi'l-cümle nefer, şehîd nefer âileleri, aded-i nüfûsu dört veya dörtden fazla binbaşıya kadar kimsesiz ve akârsız şehîd âileleri. _______________ Büyükada Hilâl-i Ahmer Şuʻbesi Tarafından Verilen Müsâmere İstanbul Kumandanı Salahaddin Adil Paşa hazretlerinin zîr-i himâyelerinde olarak Büyükada Hilâl-i Ahmer Şuʻbesi tarafından 25 Ağustos [1]339 [1923] târîhinde tertîb edilen müsâmere on bin yüz kırk lira doksan beş kuruş hâsılât teʼmîn etmişdir. Meblağ-ı mezkûrdan: