HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 15 522 [72] Azerbaycan'dan Hilâl-i Ahmer'e İʻâne Azerbaycan Şûrâlar Cumhûriyeti Merkezi İcrâ Komitesi'nin karârı mûcebince Bakü'de Vilâyât-ı Müstahlasamız ahâlîsine sarf edilmek üzere Hilâl-i Ahmer menfaʻatine iʻâne derci için bir komisyon teşekkül ederek işte başlamış olduğunu Anadolu Ajansı Kars'dan aldığı maʻlûmâta atfen bildiriyor. _______________ Anadolu'daki Yunan Üserâsı ve Yunanistan'daki Türk Üserâsı Müteʻaddid defalar Yunanistan'daki Türk üserâsının hâl-i esef-iştimâlinden bahis ile Yunan Salîb-i Ahmeri'nin bu husûsda nazar-ı dikkatini celb etdik. Yunan Hükûmeti Yunan Salîb-i Ahmeri'nin mürâcaʻatlarını nazar-ı iʻtibâra almıyor olmalı ki, oradaki üserâmız büyük bir kayıdsızlığın kurbânı oluyorlar. Leucade adasında bulunan esîr zâbitlerimiz birkaç aydan beri maʻâş almıyorlar. Kezâlik gayr-ı sıhhî yerlerden maʻdûd olan Eski Phalères, Larissa, Kato-Liossa ve Suda'da bulunan esîrleri- mizin daha sıhhî yerlere nakledilmeleri için edilen müteʻaddid mürâcaʻatlara ehemmiyet verilmedi. Yunanistan'da üserâmıza karşı edilen muʻâmele bu tarzda iken, Anadolu'da Yunan üserâsı- na karşı edilen muʻâmele bunun taban tabana zıddıdır. Bütün esîr Yunan generalleriyle zâbitlerine maʻâşları ve tahsîsâtı verildiği ve garnizonların masârıf-ı teshîniye ve tenvîriyesi teʼmîn edildiği gibi esîr neferâtın iksâiye levâzımı dahi ihzâr edilmişdir. Bu vazʻiyet karşısında Türkiye Büyük Millet Meclisi Hükûmeti Müdâfaʻa-i Milliye Vekâleti, Hilâl-i Ahmer'imize bir telgraf çekerek şâyed Yunanistan üserâmıza karşı aldığı lâkaydâne vazʻiyeti değişdirmez ise, Anadolu'nun da mukâbele-i bi'l-misl tedbîrlerine tevessül etmekde muztar kalaca- ğını Yunan Salîb-i Ahmeri'ne bildirmemizi ricâ etdi. Hilâl-i Ahmer, keyfiyeti Yunan Hükûmeti'ne bildirilmek üzere Yunan Salîb-i Ahmeri'ne yazdı. _______________ Hâmid Beyefendi Büyük Türkiye Millet Meclisi Hâriciye Vekâleti İstanbul Mümessili Hilâl-i Ahmer Reîs-i Sânîsi Hâmid Beyefendi, Lozan'da toplanacak olan Sulh Konferansı'nda bulunmak üzere şehr-i hâlin doku- zunda Méssagéries Şirketi'nin Tiger vapuruyla Marsilya'ya azîmet etmişlerdir. Hâmid Beyefendi'nin kitâbet vazîfesini îfâ edecek olan Hilâl-i Ahmer Tahrîrât Kâtibi Safvet Şav Bey dahi aynı vapur ile azîmet etmişdir. _______________ Müderris Doktor Celâleddin Muhtar Beyefendi Hilâl-i Ahmer Cemʻiyeti Müfettiş-i Umûmîsi Müderris Doktor Celâleddin Muhtar Beyefendi şehr-i hâlin altıncı gününe musâdif Pazartesi günü şimendifer ile Ankara'ya azîmet eylemişdir. [73] Hilâl-i Ahmer'in müessislerinden ve çok faʻâl erkânından biri olan Celâleddin Muhtar Beyefendi, Türkiye Büyük Millet Meclisi Hükûmeti tarafından reʼyinden istifâde edilmek üzere An- kara'ya daʻvet edilmişdir.