HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 30 1205 Hilâl-i Ahmer Meclis-i Umûmîsi İdâre Encümeni Raporu Ber-Vech-i Zîrdir: Hilâl-i Ahmer Meclis-i Umûmîsi Riyâset-i Celîlesi'ne Hilâl-i Ahmer Cemʻiyeti Nizâmnâme-i Esâsîsi 'nin yirmi beşinci mâddesine tevfîkan teşkîli muktezî idâre komisyonuna bizleri aʻzâ intihâb buyurmak sûretiyle Meclis-i umûmînin hakkımızda ızhâr etmiş olduğu teveccüh ve iʻtimâda arz-ı şükrân eyleriz. Merkez-i umûmînin 1338 [1922] senesi gâyesine kadar olan icrââtını hâvî rapor muhteviyâtıyla Hilâl-i Ahmer'in muhtelif müessesât-ı mevcû- desi nazar-ı tedkîk ve teftîşden [187] geçirildi. Birer sûreti heyʼet-i aliyyelerine takdîm olunan rapor- lar mündericâtından dahi müstebân buyurulacağı üzere müessesenin bugüne kadar geçirmiş olduğu muhtelif teftîşât, vazîfe-i murâkabeyi hayli kolaylaşdırmışdır. Netîce-i teftîşât hakkındaki kanâʻat ve mütâlaʻâtımızı serd etmezden mukaddem komisyonu- muz Hilâl-i Ahmer nâm-ı mübecceli altında teessüs etmiş olan bu şefkat ve muʻâvenet müessesesinin kendisinden intizâr edilen hizmet ve muʻâveneti, muhât bulunduğu müşkilât-ı azîmeye rağmen cid- den takdîre sezâ bir sûretde îfâ ve teʼmîn eylemiş bulunduğunu heyʼet-i umûmiyenize arz etmeği bir vazîfe addeder. Harb-i Umûmî ile başlamış olan mesâib ve fecâyiʻ-i azîme Hilâl-i Ahmer'e vezâif-i asliyesin- den mâʻadâ şimdiye kadar değil nazariyât sâhasında, hattâ ihtimâl dâiresinde bile görülmeyen bir takım yeni vazîfeler tevcîh eylemişdir. Harbin umûmî olması ve muhâsımlarca aʻzamî unf ü şiddet ile icrâ edilmiş bulunması âlem-şümûl felâketler hudûsuna bâdî olduğundan Hilâl-i Ahmer kendi yaralı ve mesâibzedelerimizden başka muhâsım üserâ ve mecrûhînine muʻâvenet vazîfe-i insâniyesini de derʻuhde eylemek mecbûriyetini hisseylemişdir. On dokuzuncu asır evâsıtında Cenevre'de teşekkül eden beynelmilel şefkat ve muʻâvenet âile- sinin bir rüknü olan Hilâl-i Ahmer, bu vazîfenin hîn-i îfâsında ve hattâ âlem nazarında Türk'ün şiʻâr-ı insâniyet ve şefkatini bir kere daha isbât ve iʻlâ eylemişdir. On Birinci Cenevre Kongresi'nde Türk Hilâl-i Ahmeri'ne alenen beyân-ı takdîrât ve teşekkürât edilmesi Türkler için bâdî-i iftihâr olduğu gibi Hilâl-i Ahmer'in bu sâyede beynelmilel iktisâb etdiği mevkiʻ-i müstesnâ dahi ayrıca bâdî-i memnû- niyetdir. Harb-i Umûmî'yi taʻkîb eden Mütâreke devresinde dahi vekâyiʻdeki fevkalâdelik zâil olmadık- dan başka Türkler için bir hayât ve memât mesʼelesi hâdis olmuş ve bu defa dâhil ve hâric düşman- larla mücâdele edilmişdir. Hayât ve istiklâl-i milletin teʼmîni uğrunda Türklerin maʻrûz kaldıkları müşkilât ve mevâniʻ-i azîme ile bu gâye yolunda ihtiyâr olunan fedâkârlıklar ve bi'n-netîce istihsâl olunan muvaffakiyât henüz pek yakın zamânların semere-i iftihârı olduğundan Harb-i Umûmî ile başlamış olan ahvâl-i fevkalâde Mütâreke devresinde dahi temâdî etmiş ve ancak Lozan'da hakk-ı hayât ve istiklâlimizin tasdîk edilmesi sûretiyle hitâma ermişdir. Bütün bu fevkalâde ahvâl karşısında Hilâl-i Ahmer fevkalâ- de tedâbîr ittihâzına mecbûr kalmışdır. Binâenaleyh 1338 [1922] senesi gâyesine kadar icrâ edilen muʻâmelât bu nokta-i nazardan tedkîk edilince gerek müfettişler ve gerek komisyonlar tarafından serd edilen tenkîdât, hâl-i sulh ve sükûnun avdetinde ittihâzı arzu edilen ilmî ve nazarî temenniyât kabîlinden kalır. Memleketimizde bu kadar pahâlıya mâl olan devre-i sulh, mübâdele ve nakil ve iskân-ı muhâ- cirîn gibi iki mühim ve muʻdil mesʼele ihdâs etmişdir ve bu sâhada dahi Hilâl-i Ahmer'e îfâ edilecek pek büyük vazîfeler terettüb etmişdir.