HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 31 1243 Bu sûretle bir tarafdan mikdârlarını azaltdıkdan ve diğer tarafdan mümkün olduğu kadar yu- murtadan çıkanlarını itlâf etdikden sonra hayâtda kalacak sineklerin mikroplarla televvüs etmemesi çârelerini derpîş etmek de sıhhat-i umûmiye nâmına düşünülecek bir keyfiyetdir. Esâsen diğer-endîş olması lâzım gelen hastabakıcılar bu bâbda hıfzıssıhhanın vazʻ etdiği kavâʻid ve esâsâta riʻâyete de mecbûrdurlar. İfrâğât-ı uzviyeye mahsûs leğen, lazımlık, helâ kornaları vesâire sinekleri celb etmeyecek derecede temiz tutulacak ve ifrâğât hattâ bir sâniye olsun, açık kalmamak için örtülü bulunacakdır. Tabîbe irâʼe edilecek mevâdd-ı süfliyeyi hâvî kablar sineklerin nüfûzuna ve kokunun intişârına mâniʻ olmak üzere câm safhalarla setr edilecekdir. Muʻâyene ve tahlîl için saklanacak idrârın bu- lunduğu şişe ve kablar dahi aynı usûle tâbiʻ tutulacakdır. Âbdesthâneler dâimâ tertemiz tutulacak ve zemîni her gün yıkanacakdır. Sineklerin kolaylıkla girebileceği porselen ve emsâli tükürük hokkaları da ale'd-devâm kapalı bulunacak ve bunların üzerine hastanın kolaylıkla kaldırabileceği dört ucu kıvrılmış kalın bir kâğıd tabakası veyâhûd bir mukavva vazʻ edilecekdir. İfrâğât-ı uzviye ile televvüs etmiş çamaşırlar sineklerden muhâfaza edilmek üzere vakit gâib edilmeden hemen torbalara konulacak ve müstaʻmel pansumanlar dahi ihrâk edilinceye kadar mahfûz bulundurulacakdır. Yaralar açık tutulmayacak ve havâya maʻrûz kalması tavsiye edilenleri ancak ince bir gaz ile setr edilmek şartıyla sineklerin taʻarruzundan masûniyeti teʼmîn edilecekdir. El, ayak, yüz gibi vücûdun gayr-ı mestûr nevâhîsinde zuhûr eden egzama vesâir yaraların te- dâvîsi için etfâl koğuşlarına yatırılan çocukların marazın diğerlerine sirâyetine mâniʻ olmak üzere behemehâl cibinlik içinde bulundurulmaları lâzımdır. Kezâ, kendilerini sineklere karış müdâfaʻadan âciz bulunan pek küçük yaşdaki çocukların da bu haşerâtın mebzûl zamânlarında cibinlik derûnunda muhâfazaları îcâb eder. Sinekler yumurtalarını yaralarda olduğu gibi göz ve burun deliklerine de bırakdıkları çok defa vâkiʻ olmuşdur. Bu sürfelerin mevcûdiyeti anlaşılıncaya kadar bîçâre maʻsûmlar pek büyük ıztırâb devirleri geçirirler. Ekser vecaʻlarla ishâllerin esbâbı enbûbe-i hazmiyede sinek sürfelerinin bulunmasından ileri geldiği unutulmamalı ve hiçbir gıdâ sineklerin telvîsine maʻrûz bırakılmamalıdır. Hastalara verilecek bisküvi, kurâbiye, şekerler ya kutulara veyâhûd zarf içine vazʻ olunmalı ve sinek mevsiminde kabuksuz meyveler yıkanmadan ekl edilmemelidir. Hastahânelerde hastanın yemeği açıkda bırakılmayacak ve süd hastanın içeceği sâʻatlerde ayrı ayrı fincânlarla getirilerek hastanın masasında bulunacak diğer kaba nakledilmeyecekdir. Süt ve et suyuna mahsûs kabların ağızları mahfûz tutulacakdır.