HİLÂL-İ AHMER MECMÛʻALARI / CİLT 3

1296 Üçüncü Sene 11 Ramazân sene 1342 / 15 Nisan sene 1340 (1924) Numara 32 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Hilâl-i Ahmer'e gönderilecek mektûb, para, eşyâ ve bi'l-cümle teberruʻât, "Dersaadet'de Hilâl-i Ahmer Cemʻiyeti Riyâseti" nâmına irsâl edilmelidir. Mündericât: Bayram ve Câmiʻ Günleri – İctimâʻî Hıfzıssıhha – Hilâl-i Ahmer Havâdisi – Salîb-i Ahmerler Havâdisi – Muktebesât – Fransızca Kısmı – İngilizce Kısmı _______________ HİLÂL-İ AHMER'İN CÂMİʻ VE BAYRAM GÜNLERİ Hilâl-i Ahmer, Salîb-i Ahmerler ve diğer bütün müessesât-ı hayriye gibi yalnız erbâb-ı hayrât u hasenâtın muʻâvenât-ı mâddiye ve maʻneviyeleriyle yaşar ve inkişâf eder. Muʻâvenet ya doğrudan doğruya ashâb-ı hayr u hasen tarafından yâhûd müessesât-ı hayriye tarafından sûret-i münâsibede istihsâl olunur. Harb-i Umûmî esnâsında teʻâvün kuvvetlerini pek ziyâde yükselten Salîb-i Ahmerler, vâridât menâbiʻi bulmak için muhtelif vâsıtalara mürâcaʻat etmişlerdir. Bu vâsıtalardan biri de Cemâhîr-i Müttefika-i Amerika'da ve İngiltere'de "Church Day", yani "Kilise Günü" taʻbîr olunandır. Bu iki memleketin Salîb-i Ahmer Cemʻiyetleri senenin birkaç muʻayyen gününde bütün kiliselerde para toplamak usûlünü tatbîk eylemek sûretiyle pek parlak muvaffakiyetler elde etmişlerdir. Amerika ve İngiliz Salîb-i Ahmerlerinin vâridât fasıllarından en mühimmini teşkîl eden "Kilise Günü", bu iki cemʻiyete büyük vâridât teʼmîn ediyor. Türkiye Hilâl-i Ahmeri de geçen iki sene, Ramazân ve Kurbân Bayramlarının ilk günlerini "Câmiʻ ve Bayram Günleri" ittihâz etdi. Bu iki mübârek günde bayram namazına giden her müs- lümân, câmiʻ-i şerîfe konacak bir kutu veya tepsiye Hilâl-i Ahmer için gönlünden ne kopar ise atar. Bu âdet-i müstahsene Türkiye'nin her tarafında, en küçük köylerin câmiʻ ve mescidlerine kadar teşmîl edilebilir. Bu sûretle her müslümân ve Türk Ramazân ve Kurbân Bayramlarının ilk günlerinde bay- ram namazının edâsından sonra Hilâl-i Ahmer'i yani fukarâyı ve bâ-husûs yeni hicret eden muhâcir kardeşlerimizi düşünmek fırsatını elde etmiş olur. Avrupa ve [250] Amerika'daki ihvân-ı dînimizin