HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 32 1303 sevk olunmak üzere İzmir'e iʻzâm olunan kâfileler merkezimizce istikbâl ve doğruca misâfirhânemi- ze sevk u îsâl edilerek orada, cümlenizin tahattur buyuracağınız vechile memleketlerine sevklerine değin çay ve kahvelerine varıncaya kadar iʻâşe ve iskânları müreffehen teʼmîn ve îfâ edilmek sûretiy- le teessürlerinin taʻdîline çalışılmışdır. Muhtâc-ı muʻâvenet üserânın meccânen memleketlerine sevki, muʻâvenet-i ictimâʻiyeye âid bir vazîfe olduğu hâlde tahsîsâtları olmamasından nâşi îfâsına imkân görülememesi ve bu sebeble üserânın günlerce intizârda bulunmaları nazar-ı dikkati câlib bir şekil aldığından masârıf-ı sevkiyele- ri de bi'z-zarûre cemʻiyetimizce teʼdiye edilerek bu zavallıların bir gün evvel âilelerine kavuşmaları esbâbı teʼmîn olunmuşdur. Hulâsa-i hesâbiyenin tedkîkinden anlaşılacağı vechile merkezimiz bu husûsda 6.225 liradan ibâret olan sevkiyât masrafı da dâhil olduğu hâlde cemʻan 28.314 lira sarfiyâtda bulunmuşdur. 2-İzmir'in istirdâdını müteʻâkib memleket hastahânesinin emr-i idâresinin merkezimizce derʻuhde edilmiş olduğu geçen seneki raporumuzda îzâh edilmişdi. Hastahâne kadrosu tanzîm ve tah- sîsâtı iʻtâ edilinceye değin gösterilen lüzûm üzerine bu sene ibtidâlarında iki ay kadar daha hastahâne, merkezimizce idâre edilmiş ve bu husûsda da 3.657 lira masraf ihtiyâr olunmuşdur. 3-Askerî hastahânelerine lüzûmu olan âlât ü edevât-ı sıhhiyenin Hilâl-i Ahmerce tedârük ve iʻtâsı Garb Cebhesi Erkân-ı Harbiye Riyâseti'nden bildirilmesi üzerine merkezimizce müteferrik sû- retle ihtiyâcâtın tesbît ve teʼmînindeki müşkilât nazar-ı dikkate alınarak Ordu Sıhhiye Dâiresince teʼmîn edilmek üzere makbûz resmi mukâbilinde nakden iki bin lira iʻtâ edilmek sûretiyle lâzıme-i muʻâvenet îfâ edilmişdir. 4-Şefkat ocağı olan Hilâl-i Ahmer'imiz dârüleytâmdaki ihtiyâc-ı şedîdi tedkîk ederek yüz çeki odun ile lüzûmu mikdârda edviye ve melbûsât ve battâniye teberruʻ etmek sûretiyle Türklüğe emânet edilen evlâd-ı şühedânın yardımlarına da şitâb etmişdir. Merkezimiz, belli başlı olan bu muʻâvenet ve yardımdan mâʻadâ perâkende sûretle birçok muhâcir ve muhtâcîne de elbise, çamaşır, yatak, yorgan, battâniye ve levâzım-ı sâire tevzîʻ etmiş ve lüzûmuna göre nakden de muʻâvenetde bulunmuşdur. Müessesât-ı sıhhiye ve hayriye ile üserâ âilelerine ve harîkzedegâna, muhtâcîne aynen yapılan muʻâvenet cedvel-i mahsûsunda gösterilmişdir. Maʻlûm-ı âlîleri olduğu üzere cemʻiyetimizin fukarâ-yı halka dâimî yardım faslını teşkîl eden İkiçeşmelik'deki Hilâl-i Ahmer Muʻâyenehânesi'nde mütehassıs etıbbâ [257] tarafından her türlü em- râz teşhîs ve tedâvî edilmekde ve birçok fukarânın idâme-i sıhhatleri teʼmîn olunmakdadır. Etıbbâ ve müstahdemînin vazîfelerini kemâl-i aşk ve iʻtinâ ile îfâ etmelerinden mütevellid muvaffakiyet yalnız İzmir'de değil, köylülerin mülhakât ahâlîsine kadar şüyûʻ bulmuş ve bu sebeble vukûʻ bulan mürâcaʻatların her gün tezâyüd etmekde olduğu heyʼetimizin nazar-ı dikkatini celb ederek yapılmak- da olan muʻâvenet ve tedâvînin teshîl-i îfâsını teʼmînen yalnız öğleden sonra fukarâ-yı halka küşâde bulundurulan muʻâyenehânenin sabâhdan akşâma kadar açık bulundurulması bi't-tensîb kadrosu bu esâsa göre tevsîʻ edilerek îcâbı îfâ kılınmışdır. İşbu muʻâyenehâneye bir sene zarfında 28.324 hasta mürâcaʻat etmiş, muʻâyene ve tedâvîleri îfâ edilerek muʻâleceleri de meccânen verilmişdir.