HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 32 1304 Cemʻiyetimiz aʻzamî mikdârdaki sarfiyâtına mukâbil edviye tedârükündeki müşkilâtı nazar-ı dik- kate alarak hiç olmazsa mübâyaʻât karşılığına medâr olmak ve fukarâ kemâ fi's-sâbık meccânen tedâvî edilmek üzere mürâcaʻat eden hastaların vakt ü hâli müsâʻid olanlarından muʻâyene ve edviye ücreti olarak evvelce alınmakda iken bir aralık lağv edilmiş olan onar kuruşun yeniden istîfâsını münâsib görmüş ve tatbîkine mübâşeret olunmuşdur. Şehrimizin hayât-ı sıhhiyesini tanzîme medâr olan ve mâ bihi'l-iftihârımız bulunan bu gibi muʻâyenehânelerin taʻaddüd ve tekessürü şâyân-ı arzudur. İzmir şehrindeki vezâif-i sıhhiyesini heyʼet aliyyelerine arz etdiğimiz vech üzere müsmir bir sûretde îfâ etdiğine kâniʻ olan heyʼetimiz, mülhakâtı da nazar-ı dikkatden dûr tutmamışdır. İzmir civârında bazı mahallerin ve bilhâssa Torbalı nâhiyesi ahâlîsinin civârdaki bataklıklar yüzünden maʻrûz kaldıkları müzmin sıtma hastalığından her sene yüzlerce telefât verdikleri ve bu sebeble ahâlî-i kadîmeden iki nesilden fazla idâme-i mevcûdiyet etmiş âilelere ender tesâdüf edildiği câlib-i dikkat görülmekle mahallinde tedkîkât-ı sıhhiye ve fenniye icrâsı ve hâsıl olacak netîceye göre bu gibi mahallerde mücâdele-i sıhhiyede bulunulması heyʼetimizce tensîb edildi. Vâlî-i sâbık Aziz Beyefendi ile merkezimizden müntehab bir heyʼet Torbalı'ya azîmet ederek arîz [u] amîk tedkîkâtda bulunmuş ve heyʼet-i mezkûrenin tedkîkât ve müşâhedâtına göre nâhiye-i mezkûre münbit ve mah- sûldâr ve zengin bir muhît olmakla berâber ahâlînin bakımsızlıkdan vazʻiyet-i sıhhiyelerinin pek bozuk ve sıtmadan sîmâları umûmiyetle toprak rengini almış bir hâlde oldukları ve hattâ iki aylık ço- cukların bile dalaklı bulundukları pek büyük bir yeʼs ve teessürle heyʼetimize tefhîm edilmesi üzerine numûne olmak ve istitâʻât-ı mâliyemize göre âtiyen her tarafa teşmîl edilmek üzere Tepeköyü'nde bir dispanser küşâdıyla emrâz-ı mütenevviʻa ve bilhâssa sıtma mücâdelesinde bulunmağı bir vazîfe-i mübreme ve milliye telâkkî eden heyʼetimiz, derhâl îcâbına bâ-tevessül ve bu maksadla mahall-i mezkûra lüzûmu olan edviye ile bir tabîb iʻzâm edilerek az bir müddet zarfında yapılan tedâbîr-i sıh- hiye pek bâriz sûretde cidden şâyân-ı şükrân bir derecede muvaffakiyet göstermişdir. Torbalı ve Dağkızılca nâhiyeleri ahâlîsinin müzmin bir hastalıkdan kurtulmalarını ve sıhhatleri- nin dâimî bir sûretde taht-ı murâkabede bulundurulmasını teʼmîn eden Hilâl-i Ahmer bu vazîfe-i insâ- niyesini takdîren bir dispanser inşâsı arzusu ihsâs ve bu husûsda aʻzamî muʻâvenet ve fedâkârlığın dirîğ edilmeyeceği beyân ve ifâde edilmiş ve keyfiyet makâm-ı âlî-i vilâyetçe de iltimâs buyurulmuş olduğundan cemʻiyetimizce bu sebeble kurâ-yı mütecâvirenin her hafta merkez-i ictimâʻ ve pazarı bulunmak hasebiyle tercîhen Tepeköyü'nde etıbbâ ve müstahdemînin ikâmetlerine de elverişli olmak üzere inşâsına mübâşeret olunan binânın ikmâli kuvve-i karîbeye gelmişdir. İnşâsına mübâşeret olunan dispanser binâsının ikmâline intizâr etmeksizin Tepeköyü'nde 24 Teşrîn-i Evvel [1]339 [Ekim 1923] târîhinde küşâd olunan dispansere Kânûn-ı Evvel gâyesine kadar iki ay zarfında 2.347 hasta mürâcaʻat etmiş ve tedâvîlerine ihtimâm edilerek muʻâleceleri de meccâ- nen verilmişdir. Ahâlî-i muhterememizin memleketimizin yegâne yardım ve şefkat ocağı olan Hilâl-i Ahmer'i- mize muʻâvenet ve muzâheretleri [258] temâdî etdikçe bu gibi bakımsızlık ve tabîbsizlik yüzünden heder olan küçük büyük birçok köylülerimizin bu nâçîz himemâtla hayâtları kurtarılmış ve bi'n-netîce teksîr-i nüfûs esbâbının istikmâl edilmiş olacağı derkâr bulunmuşdur. Merkezimiz şehrimizde üserâya, muhtâcîne ve harîkzedegâna mümkün olabildiği kadar muʻâ- venet ve yardımda bulunduğu kanâʻatinde olmakla berâber muʻâvenet-i umûmiyeye istitâʻati dere- cesinde iştirâk edebilmiş olmak için ayrıca Hilâl-i Ahmer Merkez-i Umûmîsi'ne kırk bin lira kadar irsâlâtda bulunmuşdur. ***