HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 32 1305 Menâbiʻ-i vâridâtımıza gelince; merkezimiz bu husûsda maʻatteessüf dâimî ve muʻayyen bir vâridâta mâlik değildir. Heyʼetimiz sarf etdiği gayret ve faʻâliyetine rağmen hulâsa-i hesâbiyenin tedkîkinden müste- bân buyurulacağı vechile bu sene şuʻabât irsâlâtı ve merkez-i umûmî hesâbına vukûʻ bulan tahsîlât dâhil olduğu hâlde ancak seksen bir bin lira kadar bir para elde edebilmişdir. İzmir için bu mikdâr hiç mesâbesinde ise de memleketimizin bu sene geçirdiği buhrân-ı mâlî ve ihtiyâcât-ı umûmiye pîş-i teemmüle alındığı takdîrde bunun yine şâyân-ı şükrân bir derecede görülmesi iktizâ eder ve heyʼet-i merkeziyemiz bu iʻtibâr ile muhterem halkımızın Hilâl-i Ahmer'e karşı ibrâz eylediği yüksek eser-i hamiyet ve şefkati bi'l-münâsebe burada âsân-ı takdîr ve şükrân ile yâd eylemeği vezâif-i kadir-şinâsî- den addeyler. [1]339 [1923] senesinde îfâsıyla mükellef tutulduğumuz vazîfe-i muʻâvenet için sene ibtidâsın- da tanzîm etdiğimiz altmış bin liralık muhammen büdce, merkez-i umûmîce elli bir bin liraya tenzîl edilmek sûretiyle mazhar-ı kabûl ve tasdîk olmuş idi. İşbu taʻahhüdâtımızı îfâ için heyʼetimiz, ahâlî-i muhteremeyi izʻâc etmeksizin ve daha doğrusu halka hissettirmeksizin tedâbîr-i hususiye ile teʼmîn edebilmiş ve bu sûretle vazîfesini îfâ eylemişdir. Ancak [1]339 [1923] senesine âid büdcemiz elli bir bin lira vâridât ve masârıf-ı muhammene ile tekâbül etdirilmiş ve vâridâtımızın altmış üç bin lirayı mütecâviz bir mikdâra iblâğına muvaffakiyet hâsıl olmuş ise de masrafımızın büdce ile kabûl olunan mikdârı on yedi bin lira kadar tecâvüz etmiş olması, üserâya yapılacak muʻâvenete on bin lira tahmîn edildiği hâlde yirmi dokuz bin liraya karîb masraf tahakkuk etmesinden ileri gelmez ve bunun da esbâb-ı mûcibesi vaktiyle merkez-i umûmîye bildirilerek mahsûbu teʼmîn olunmuşdur. Nizâmnâme-i esâsînin merâkiz ve şuʻabâta âid taʻyîn etdiği vezâif pek mahdûd olduğu hâl- de merkez-i umûmîce merkezimizin vazʻiyet-i husûsiye ve mühimmesi nazar-ı dikkate alınarak ya- pılacak vezâif ve muʻâvenet muʻteber bir büdce ile taʻyîn ve tesbît edilmek sûretiyle muʻâvenete salâhiyetimizin tevsîʻ kılınmış olduğu şâyân-ı kayıd görülmekle berâber ahîren İstanbul'da ictimâʻ eden Hilâl-i Ahmer Meclis-i Umûmîsince taşra Hilâl-i Ahmer merkez ve şuʻbelerinin salâhiyetlerinin mümkün mertebe tevsîʻi esâs kabûl edildiği gibi Meclis-i umûmîye her merkezden ikişer aʻzâ iştirâk etdiği hâlde İstanbul'daki aʻzâ-yı âmilenin heyʼet-i umûmiyesinin iştirâk hakkını hâiz olması taşra murahhaslarının ehemmiyetle nazar-ı dikkatini celb etdiğinden bu husûsda vâkiʻ olan mürâcaʻât ve ittihâz olunan tedâbîr netîcesinde kongreye dâhil olacak murahhasların aʻzâ-yı âmilenin ellide biri nisbetinde tefrîkı ve İstanbul'un da bir merkez iʻtibârıyla bu esâsa göre murahhas bulundurması kabûl etdirilmiş ve nizâmnâmenin de bu sûretle taʻdîli icrâ olunmuşdur. Taşra murahhaslarının merkez ve şuʻbeleri mûcib-i şükrândır. Hulâsa, merkezimiz [1]339 [1923] senesine âid vezâif-i milliye ve insâniyesini muvaffakiyetle îfâ ve intâc etdiği kanâʻatinde olmakla berâber sene-i hâzırada maʻlûm-ı âlîniz olduğu vechile mübâ- dele-i ahâlî mesʼelesinden dolayı pek mühim vezâif ile mükellefdir. Bu husûsda merkez-i umûmî ile hâsıl olan mutâbakata ve merkezin tasdîkine iktirân eden altı aylık muvakkat büdcesi ahkâmına göre mübâdele sûretiyle gelecek muhâcirînin hastalarının tedâvîsi ve muhtâcînin ilbâsı derʻuhde edilmiş ve bu bâbdaki teşkîlât ve tertîbât-ı [259] lâzıme ikmâl olunarak tatbîkine devâm edilmekde bulun- muşdur. Merkezimizin [1]340 [1924] senesi altı aylık büdcesi ile otuz yedi bin lira masraf kabûl olun- muşdur. Bu mikdâr merkezin ve dispanserlerin masârıf-ı idâresi ile münhasıran muhâcirîne yapılacak muʻâvenetden ibâretdir. Hamiyet-mendân ahâlîmizin himem ve muzâheretlerine istinâden derʻuhde edilmiş olan bu muʻâvenetin karşılığını teʼmîn husûsunda da dûçâr-ı müşkilât olmayacağız kanâʻatindeyiz.