HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 26 985 lıkdan herkesin korkusunu izâle edecek mertebeye gelmişdir. Bu cihetle bilhâssa genç yaşda bulunan- ların vücûdun muvâzenesindeki ihtilâlât dolayısıyla nazar-ı dikkate çarpan bazı aʻrâzı ehemmiyete alarak kendilerini nezâret-i tıbbiyeye tevdîʻ ve lâzım gelen takayyüdât-ı sıhhiyeye terhîn etmelidirler. Veremin her sene verdiği binlerce kurbânı nazar-ı dikkate alan hükûmât âfetin şâfî ilâcını keş- fetmek üzere husûsî müesseseler ihdâs ve bu husûsun teʼmînine milyonlarca para sarf etmekdedir. Fi'l-hakîka günün birinde ve yakın bir âtîde beşeriyet-i muztaribe en muhrib bir âfet-i ictimâʻîden kurtularak fen nâmına bir âbide-i zafer ihzâr edeceğine emîn olmalıyız. Bu ân-ı târîhîde beşeriyet en bî-amân düşmanından halâs olacak ve dünyâda senevî yüz binlerce kurbân veren âfetin tahrîbâtından tamâmıyla kurtulacakdır. Verem ile mücâdele etmek üzere şimdilik her vilâyet merkezinde nüfûsun kesâfeti nisbetinde bir verem hastahânesi teʼsîs edilmeli ve burada muhtâc-ı muʻâvenet ve açık olan veremler taht-ı tedâvîye alınmalıdır. Başlıca şehir ve merâkizde açılacak verem dispanserlerinde halka her husûs- da muʻâvenet ve muzâheretde bulunulmalı ve süd damlaları teşmîl edilmelidir. Bilhâssa kalabalık beldelerde umûmî bağçe [31] leri tezyîd ederek halkın tâze havâ almasına ve güneşlenmesine gayret edilmelidir. Bu tedâbîr ile berâber teehhül şehâdetnâmelerini bir şekl-i resmiyete idhâl eder ve içdi- ğimiz sütlere lâzım gelen takayyüdât-ı sıhhiyeyi de tatbîk edersek ülkemizde bu hastalığın tahrîbâtını aʻzamî derecede tenkîse muvaffak olacağımızdan şübhe etmemeliyiz. _______________ Salîb-i Ahmer Cemʻiyetleri Konferansı 28 Ağustos'dan 1 Eylül 1923 târîhine kadar Cenevre Dârülfünûnu'nda inʻikâd eden Beynelmilel On Birinci Salîb-i Ahmer Konferansı'nda 49 Salîb-i Ahmer Cemʻiyeti'ni 80 murahhas temsîl etmişdir. Pek yakın bir zamânda Salîb-i Ahmer âilesine kabûl edilen Arnavud ve Guatemala Salîb-i Ah- merleri beynelmilel konferansa ilk defa iştirâk etmiş bulunuyor. Beynelmilel Komitece mevcûdiyeti konferansın devâm-ı inʻikâdında resmen tasdîk edilen Litvanya Salîb-i Ahmeri bilâhare konferans müzâkerâtına iştirâk etmiş ve muʻâmele-i tasdîkiyesi henüz îfâ edilmemiş olan İran Hilâl-i Ahmeri makâmına kâim Şîr-i Hurşid-i Sürh Cemʻiyeti delegesi konferansa medʻuv sıfatıyla kabûl edilmişdir. Konferansda Cenevre Mukâvelenâmesi'ni imzâ eden otuz sekiz hükûmeti 54 murahhas temsîl etdiği gibi beynelmilel heyʼeti hâiz husûsî müessesât-ı hayriyenin de 33 medʻuv aʻzâsı bulunmuşdur. İşbu murahhas ve medʻuvvînden mâʻadâ Beynelmilel Mesâʻî İdâresi, Genç Hıristiyanlar Cemʻiyeti, Cihân Musevî Muʻâvenet Konferansı, Beynelmilel Kadınlar Meclisi, Etfâle Muʻâvenet Beynelmilel Heyʼet-i İttihâdiyesi gibi müessesât ve cemʻiyât dahi konferansa iştirâk etmişdir. Amerika Salîb-i Ahmeri'nin üç murahhası, Beynelmilel Komite ile Salîb-i Ahmerler Heyʼet-i İttihâdiyesi arasında zuhûr eden ihtilâfdan dolayı Cenevre'ye gelmeyerek Paris'de kalmışdır. Konferansın umûmî celsesinde İsveç Velîʻahd[ı] fehâmetlü Prens Charles hazretleri reîs-i fah- rî ve Mösyö Gustave Ador reîs intihâb edilmişdir. Konferansın yedi kâtibi meyânında Doktor Âkil Muhtar Bey de bulunmakdadır. Konferans, rûznâme-i mesâʻîsine idhâl etdiği mesâili dört komisyona tevdîʻ etmişdir: * Birinci komisyona Beynelmilel Salîb-i Ahmer Merkez Komitesi'nin umûmî raporunun tedkîki, * İkinci komisyona Beynelmilel Salîb-i Ahmer Merkez Komitesi'nin umûmî raporunun kısm-ı mâlîsi,