HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 26 986 * Üçüncü komisyona harbde düşman eline düşen sivil üserânın vazʻiyetine dâir yazılan raporun tedkîki, * Dördüncü komisyona İtalya Salîb-i Ahmer Reîsi aʻyândan Sinyör Giovanni Ciraolo'nun Bey- nelmilel Muʻâvenet-i Mütekâbile Projesi. Murahhaslara tevdîʻ edilen vesâik içinde en mühimleri 6 Temmuz 1906 târîhli Cenevre Mukâ- velenâmesi'nin taʻdîli hakkında yazılan raporla buna âid teklîfler, üserâ-yı harbiye kânûnu, âfât ve mesâib-i umûmiyeye giriftâr olan milel ü akvâma imdâd ve muʻâvenet zımnında devletler arasında müşâreket-i mütekâbile, Beynelmilel Salîb-i Ahmer İdâresi'nin ıslâhı, Salîb-i Ahmerler tarafından yazılan husûsî raporlar ve bilhâssa harb zamânında Cenevre Mukâvelenâmesi ahkâmına muhâlif efʻâl ü harekâtı, daha doğrusu tecâvüzâtı taʻyîn etmek maksadıyla muhârib memleketler Salîb-i Ahmer aʻzâsının mübâdelesi ve Salîb-i Ahmer işâret ve alâmetinin sûistiʻmâlini menʻ edecek tedâbîr ittihâ- zına dâir [32] Belçika Salîb-i Ahmeri'nin raporuyla eşyâ ve malzeme-i sıhhiyenin bî-taraflığına dâir Amerika Salîb-i Ahmeri'nin teklîfi şâyân-ı zikirdir. Birçok Salîb-i Ahmerler Onuncu Konferans'ın târîh-i inʻikâdından beri devâm eden faʻâliyetle- rine dâir matbûʻ ve umûmî raporlar göndermişlerdir. Hilâl-i Ahmer Cemʻiyeti dahi ber-muʻtâd faʻâliyetini Fransızca matbûʻ bir raporla arz etmişdir. Murahhaslar Komisyonu'nun teklîfi üzerine 13 aʻzâdan ve Beynelmilel Komite ve Heyʼet-i İt- tihâdiye'nin birer delegesinden müteşekkil diğer bir komisyon, komite ile heyʼet-i ittihâdiye arasında mütehassıl ihtilâfı tedkîke meʼmûr edilmişdir. Bu komisyona, İsveç Salîb-i Ahmer Reîsi Prens Char- les hazretleri riyâset etmekde ve Doktor Âkil Muhtar Bey de dâhil bulunmakdadır. _______________ Beynelmilel Komite'nin Yunan Üserâsı Hakkında Neşretdiği Rapor Yunan Salîb-i Ahmeri, Atina'da muhtelif tâbiʻiyete mensûb bazı zevât-ı ecnebiyeden teşkîl et- diği bir komisyon vâsıtasıyla Anadolu'dan avdet eden Yunan üserâsı hakkında mugâyir-i hakîkat bir rapor neşretdiğini geçen nüshamızda haber vermiş ve Yunan üserâsının hâl ve vazʻiyetlerini bulun- dukları mahallerde reʼyü'l-ayn müşâhede ve tedkîk etmek üzere evvelce Cenevre Beynelmilel Salîb-i Ahmer Komitesi tarafından meʼmûr edilmiş olan heyʼetin neşredeceği raporu[n] ancak bir vesîka-i resmiye addedilebileceğini de ilâve etmiş idik. Mezkûr Beynelmilel Heyʼet'in üserâ-yı Yunaniye hakkında kaleme aldığı rapor ahîren neşredil- miş olduğundan tercemesini aynen naklediyoruz: "-Beynelmilel Salîb-i Ahmer Komitesi tarafından meʼmûr edilen heyʼetin Anadolu'daki Yunan üserâ-yı harbiye karârgâhlarını teftîşi Türkiye Büyük Millet Meclisi ve Yunan hükûmetleri tarafından vukûʻ bulan taleb ve iltimâs üze- rine Beynelmilel Salîb-i Ahmer Komitesi devâir-i müteʻallikasından îcâb eden müsâʻadâtı istihsâl et- dikden sonra 1923 senesi Şubat'ında iki muhârib devlet üserâ karârgâhlarındaki mevkûf üserâyı teftîş için biri Yunanistan'a, diğeri Türkiye'ye iki heyʼet meʼmûr etmiş ve Yunanistan'a meʼmûr etdiği heyʼete Mösyö Schatzmann ve Anadolu'ya giden heyʼete Mösyö Guénod riyâset etmekde bulunmuş idi.