HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 33 1358 Samsun'un Haber Refîkimize Teşekkür Samsun vilâyetinde münteşir Haber refîkimizin 31'inci sayısında "Hilâl-i Ahmer'e Yardım" un- vânlı bir makâle mündericdir. Cemʻiyete yardım maksadıyla toplanan heyʼetin bulduğu menâbiʻ-i vâridâta cevâz gösterile- mez veya mümkün olsa bile kânûnsuz olamaz. Bizzât ve bi'l-vâsıta hamiyet ve sehâvet-i umûmiyeye mürâcaʻat etmekden ve biraz da fazla çalışmakdan başka bir yol yokdur. Zâten merkez-i umûmîde de yapılan bundan başka bir şey değildir. Refîk-i muhteremimizin dediği gibi, daha yüz binlerce dîndâ- şımız muʻâvenetimizi bekliyor. Haber refîkimiz gibi bütün muhterem rüfekâmızın irşâd ve îkâzına ve cemʻiyet merâkiz ve şuʻabâtının fart-ı mesâʻîsine ihtiyâc-ı şedîd vardır. Çalışanlar muvaffak olur. Her hâlde refîkimize teşekkür ederiz. _______________ Drama'daki İmdâd-ı Sıhhî Heyʼetimizin Bir Aylık Faʻâliyeti Drama'da Hilâl-i Ahmer yirmi sekizinci imdâd-ı sıhhî heyʼeti tarafından Mart ayı zarfında: Kadın, erkek ve çocuk olmak üzere cemʻan 1.342 nüfûsu iksâ ve dispansere mürâcaʻat eden 64 hastaya bi'l-muʻâyene ilâcları meccânen iʻtâ ve Türkiye'ye sevk edilen 43 köy ahâlîsinden 12.283 nüfûsa çiçek ve dizanteri aşıları tatbîk ve icrâ edildi. Drama İstasyonu'ndaki otuz beş çadırdan ibâret karârgâh yüz elliye iblâğ olunarak muhâcirîn bu ayın soğuk rüzgârlarıyla yağmurlarından mümkün olduğu kadar muhâfaza ve şiddetle muhtâc olanlardan 7.645 nüfûs aşhânede iʻâşe olundu. [293] Hilâl-i Ahmer'e Teşekkür Mecidözü kazâsında iskân olunan Drama muhâcirleri nâmına dokuz mühür ile mahtûm olarak aldığımız teşekkürnâmedir. "-Âğûş-ı şefkat ve merhametine ilticâ etdiğimiz hükûmet-i Cumhûriyemizin himâye-i adâ- let-perverânesinde Mecidözü kazâsı mıntıkasına yerleşdik. Gördüğümüz lütuf ve merhamete arz-ı şükrânla kazâ Hilâl-i Ahmer şuʻbesinin hakkımızda gösterdiği muzâheret-i insâniyetkârâneyi sûret-i aleniyede bütün vatandâşların takdîrâtına arz ederiz. Biz muhâcirler hâin düşmanın her zulmüne gö- ğüs gerdik, varımızı fedâ ederek anavatana kavuşduk. Kavuşduk ama cihânda yoksullara hürmet ve muʻâvenet nedir, bunu hakkıyla bilen ve bütün mevcûdiyetiyle bu uğurda bezl-i mesâʻî eden Hilâl-i Ahmer Cemʻiyet-i hayriyesinden görülen muʻâvenet ve muzâhereti bir türlü taʻrîf edemeyiz. Husûsan buraya muvâsalatımızdan biri Mecidözü Hilâl-i Ahmer Şuʻbesi'nin kırk gün ekmek, bulgur, yağ, pet- rol ve sabun gibi malzeme-i iʻâşemizi sûret-i mükemmelede tevzîʻ etmek sûretiyle sefâletden damar- larımızda kuruyan kanımızın cevelânına himmet buyurması sûretiyle hayâtımızı bağışladığından bu vesîle ile mezkûr şuʻbeye muʻâvenetde bulunan Mecidözü'nün yüksek hamiyetli ahâlî-i muhtereme- siyle şuʻbe heyʼetine şükrânımızın îsâline muhterem mecmûʻalarının bir köşeciği tahsîs buyurulursa minnetdâr kalırız". Mecmûʻa: Faʻâliyetden dolayı şuʻbemize biz de teşekkür ederiz.