HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 34 1413 Merâkiz ve şuʻabât bu merkez-i umûmîye ve heyʼet-i idâreye merbûtdur. Buradan ahz ve telâkkî edecekleri hatt-ı hareketi taʻkîb ederler. Merkez ve şuʻbelerimizin adedi bugün üç yüz elliyi tecâvüz etmişdir. Bunların içinde şâyân-ı mefharet ve memnûniyet sûretde pek ziyâde çalışan ve faʻâliyet gösterenleri olduğu gibi ya yeni te- şekkül etdiklerinden veyâhûd esbâb-ı sâire-i mahalliyeden dolayı henüz bâriz bir mevcûdiyet ızhâr edememiş olanları da vardır. Vazîfemizin büyüklüğü nazar-ı dikkat ve ehemmiyete alınarak cümle- sinin her vakit için ve bilhâssa Rumeli'den hicret etmekde olan yüz binlerce kardeşlerimize aʻzamî muʻâvenete şitâb etdiğimiz şu sıralarda tezyîd-i himmet ü gayretle pek büyük bir faʻâliyet ibrâz ede- ceklerini ümîd ve vatan-perverliklerinden ricâ eyliyoruz. Âtîde merkez ve şuʻbelerimizin elifbâ tertîbiyle isimlerini yazıyoruz. Nasılsa yazılmayanlar ve yazılışda bir hatâ varsa doğruca mecmûʻa müdüriyetine bildirmelerini kendilerinden temennî ederiz. İleride münâsebet bulundukça merâkiz ve şuʻabâtın faʻâliyetlerinden de muhtasaran bahsedeceğiz. Hilâl-i Ahmer Cemʻiyeti maʻlûm olduğu üzere millî bir cemʻiyet-i hayriyedir, Türkiye'nindir ve doğ- rudan doğruya milletindir. Her şeyden evvel kendi vatandâşlarını düşünür. Türkiye Cumhûriyeti dâ- hilinde her felâkete koşar ve vüsʻ ve iktidârı nisbetinde muʻâvenetde bulunur. Bununla berâber cemʻi- yetin bir de vazʻiyet-i beynelmileliyesi vardır. Bütün Salîb-i Ahmerlerle münâsebâtdârdır ve hepsiyle berâber bir müessese-i Hayriye-i cihân-şümûldür. Memleketimiz hâricinde ve en uzak yerlerdeki felâketlerden de müteessir olur, onlara da bir nisbet-i muʻayyene dâiresinde muʻâvenetde bulunmağa çalışır. Nitekim onlardan da aynı mütekâbil muʻâmeleyi ve muʻâveneti beklemeye hakkı vardır. Beş- on seneden beri memleketimizde tevâlî ve teʻâkub eden harblerde vesâir felâketlerde Hilâl-i Ahmer bazı Salîb-i Ahmerlerden epeyce muʻâvenetlere maʻrûz olduğu gibi kendisi de bazı mesâib-i ecnebi- yeye tabîʻî bir nisbet-i maʻkûle dâiresinde iʻânede bulunmuşdur. Hilâl-i Ahmer Cemʻiyeti beynelmilellik nokta-i nazarında, bütün Salîb-i Ahmerler gibi İsviç- re'nin Cenevre şehrindeki Beynelmilel Merkez Komitesi'ne merbûtdur. Beynelmilel umûr ve muʻâ- melâtında orasıyla muhâbere eder. İnde'l-îcâb oradan muʻâvenet görür, beynelmilel şikâyâtı ve metâ- libini oraya bildirir. Üç sene evvel Yunanlıların Marmara sevâhilinde ve ale'l-husûs Gemlik ve Yalova civârında ahâlî-i sâkineye ve mesâkin ve mezâriʻine karşı revâ gördükleri katl, ihrâk ve tahrîb gibi mezâlim üzerine Cenevre'deki merkez komitesine sebk eden şiddetli ve mükerrer işʻârât ve şikâyât üzerine intihâb ve iʻzâm olunan murahhasların, hattâ Düvel-i İʼtilâfiye [330] meʼmûrlarıyla berâber mahallinde bu mezâlimi reʼyü'l-ayn görerek zabıtnâmeler tanzîm etdiklerini misâl olarak arz ederiz. Bu bâbda Murahhas Mösyö Maurice Gehri'nin iʻtâ eylediği mufassal ve müdellel raporu Hilâl-i Ah- mer Cemʻiyeti risâle hâlinde tabʻ ile teksîr etdirerek âlem-i medeniyete dağıtmışdır. On birinci konferansda murahhaslarımız bu risâleyi aʻzâya da iʻtâ ederek hüsn-i teʼsîrâtını gör- müşlerdir. Bu vakʻayı ifâdâtımızı teʼyîd zımnında arz eyledik. Yoksa muhârebe zamânlarında sebk eden bu yoldaki birçok şikâyâtı mezkûr komite himmetle telâkkî ederek derhâl îcâbâtını da icrâ ey- lemişdir. Hilâl ve Salîb-i Ahmerlerde bir husûsiyet daha vardır ki, o da tamâmen bî-taraf olması ve siyâsiyâtla alâkadâr bulunmamasıdır. Hilâl ve Salîb-i Ahmerlerin maʻlûm olduğu üzere hîn-i teessüs ve teşekkülünde maksad-ı aslî harb zamânında yaralılara, hasta ve zaʻîflere yardım etmekdi. Beynelmilel teşekkül eden konferans- ların ve bâ-husûs 1921-1922 senesinde Cenevre'de inʻikâd eden konferansın mukarrerâtı üzerine bu maksad tevsîʻ olunmuş, emrâz-ı sâriye ve müstevliyeye, vefeyât-ı etfâle ve sillürriʼe gibi emrâz-ı müdhişeye karşı mücâdelâtda bulunması ve hareket-i arz, tuğyân-ı miyâh vesâir felâketlerle berâber âlâm-ı muhâcerete karşı muʻâvenât-ı mümkineyi îfâ eylemesi esâsâtı kabûl olunmuşdur.