HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 27 1036 Mübâdele-i Ahâlî Mübâdelenin şekl-i icrâsı henüz katʻî bir karâra iktirân etmemekle berâber âtîdeki nukât tesbît edilmiş gibidir: 1-Hanya'dan sekiz bin, Kandiye'den on iki bin, Resmo ve Laşid'den beş bin nüfûs ki, cemʻan yirmi beş bin nüfûs Girid adasından Türkiye'ye nakledilecekdir. 2-Selanik'e hicrete icbâr edilmiş olan Langaza, Avrathisar, Toyran ve Yenice-i Vardar ahâlîsin- den 12 ilâ 15 bin ve Kayalar ahâlîsinden 30 ilâ 35 bin ki, cemʻan 45 ilâ 50 bin nüfûs kezâ Türkiye'ye sevk edilecekdir. 3-Drama livâsının bir kısmı bilhâssa dâhilde bulunan kazâları ahâlîsi 60 ilâ 70 bin nüfûsu dahi ilk sevkiyâta dâhildir. Şu hâlde bu üç mıntıkadan nakledilecek muhâcirlerin yekûnu 125 ilâ 145 bin tahmîn edilmekdedir. İlk sevkiyâtı teşkîl edecek olan muhâcirîn-i merkûmenin nakli Mayıs 1340 [1924] târîhine ka- dar devâm edecekdir. Bu müddet zarfında başka taraflardan muhâcirîn nakledilmeyecek ve herkes olduğu yerde kalacak ve işleriyle, güçleriyle meşgûl olacakdır. Ashâb-ı servetden olanların masârıf-ı seferiyelerini bizzât tesviye eylemeleri ve muhtâc olan- ların komisyon vesâiti ile nakledilmeleri ve bu son kısım halkdan [66] Yunanistan'da emlâk ü arâzî sâhibi olmayanların masârıf-ı seferiyelerinin tarafeyn hükûmetlerince teʼdiyesi esâs olarak kabûl edilmişdir. Hanya, Kandiye, Kavala, Drama ve Selanik tâlî komisyonları derdest-i teşkîldir. _______________ Mübâdele-i Ahâlî İmdâd-ı Sıhhî Heyʼetleri Yunanistan'la icrâ edilecek mübâdele-i ahâlî münâsebetiyle Hilâl-i Ahmer Cemʻiyetince şimdi- ye kadar beş İmdâd-ı Sıhhî Heyʼeti âtîdeki mahallere iʻzâm kılınmışdır: 1-Yirmi Altıncı Ayvalık Heyʼeti: Sertabîb Doktor Hikmet Bey ile bir tabîb ve eczâcı ve on meʼmûr ve hademeden müteşekkildir. 2-Yirmi Yedinci Selânik Heyʼeti: Sertabîb Doktor Mahir Bey ile 3 tabîb ve eczâcı ve on iki meʼmûr ve hademeden müteşekkildir. 3-Yirmi Sekizinci Hanya Heyʼeti: İki tabîb ve eczâcı ve on bir meʼmûr ve hademeden müteşek- kildir. 4-Yirmi Dokuzuncu Kandiye Heyʼeti: İki tabîb ve eczâcı ve on meʼmûr ve hademeden müteşek- kildir. 5-Otuzuncu Kavala Heyʼeti: Üç tabîb ve eczâcı ve on iki meʼmûr ve hademeden müteşekkildir. _______________ Serendip Adasında Türk Üserâ-yı Harbiyesi Geçenlerde Serendip adasından avdet eden bir esîrimiz orada daha birçok üserâ-yı harbiyemiz bulunduğunu Hilâl-i Ahmer Merkez-i Umûmîsi'ne ihbâr etmiş ve fi'l-hakîka bu ihbârdan bir müddet sonra İstanbul'da bazı âileler Serendip'de harb esîri olan erkeklerinden aldıkları mektûblarla Hilâl-i Ahmer'e mürâcaʻat ederek bunların ıtlâkına tavassut ve delâlet edilmesini ricâ etmişlerdi. İhbârât-ı vâkıʻaya fevkalâde ehemmiyet veren Hilâl-i Ahmer Cemʻiyeti, hemen İngiltere Har- biye Nezâreti Üserâ Dâiresi'ne keyfiyeti teblîğ eylemiş ve aldığı cevâbda icrâ edilecek tahkîkâtın netîcesi işʻâr kılınacağı vaʻd edilmiştir.