HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 37 1613 ittihâz edecek olan On İkinci Salîb-i Ahmer Konferansı'nın daʻvetini Beynelmilel Salîb-i Ahmer Ko- mitesi'yle Lig'in müştereken yapmasına karâr vermiş bulunuyordu. Lig bu daʻveti yapmağı reddetdi. Onun yerine Paris'e kendi meclis-i umûmîsini topladı ve güya mütâlaʻa komisyonu yokmuş gibi kendi nizâmnâmesini, vâkiʻ olan iʻtirâzları da nazar-ı dikkate alarak tebdîle başladı. Her ne kadar Hollanda Salîb-i Ahmeri bu garîb harekete karşı şiddetle protesto etmiş ise de vekâyiʻin mecrâ-yı ta- bîʻîye girmesini teʼmîn edememişdir. Bu esnâda hakîkat-i mesʼeleyi daha iyi anlayan Amerika Salîb-i Ahmer Reîsi Mösyö Josephine ile Salîb-i Ahmer Komitesi Reîsi Mösyö Ador arasında bir müzâkere- den sonra projenin tekrâr mütâlaʻa komisyonunca tedkîki takarrür etdi. Bu heyʼet ittifâk-ı ârâ ile bir sûret-i hal kabûl etdiği takdîrde Beynelmilel Kongre'nin daʻveti takarrür etdi. Bunun netîcesi olarak da Lig'in muʻaddel nizâmnâmesi sonraya bırakıldı. Bu esnâda Paris'de cereyân eden müzâkerâtı taʻkîb eden bî-taraf zevât Salîb-i Ahmer mesâili gibi pek insânî bir işde bile âmâl-i husûsiyenin ne berbâd bir teʼsîr icrâ etdiğini görmüş ve pek müte- essir olmuşdu. Hattâ Mösyö Ador ile Josephine arasında cereyân eden muhâberenin mâhiyeti tamâ- mıyla tebdîl olunarak Lig'in cemʻiyet-i umûmiyesine teblîğ edilmişdir. Son defa 4 Haziran 1924'de Lahey'de ictimâʻ eden mütâlaʻa komisyonu işte bu şerâit tahtında tekrâr münâkaşâta başladı. Herkes ittifâk-ı ârâ ile bir karâr vermek lüzûmunu gözünün önünde tutmak mecbûriyetinde bulunuyordu. Zîrâ konferans ancak bu şartla daʻvet olunabilecekdi. Vâkıʻâ Hilâl-i Ahmer kendi kanâʻatlerinden hiçbir fedâkârlık yapmamak azminde idi ve şübhesiz en iyi sûret-i hareket de bu idi. Münâkaşât netîcesinde her [5] kes Beynelmilel Komite'ye aynı şekil ve aynı târîhî hukûku vermekde müttehid kaldı. Lig'in cemʻiyet-i umûmiyesi ve cemʻiyet müdîrânı hazf olundu ve bütün Salîb-i Ahmer beynelmilel merâkizi Cenevre'de bırakıldı. Bu esâsât Salîb-i Ahmer maksad ve menâfiʻine tevâfuk etmekdedir. Lâkin bunun yanında yapılan bazı şeyler fâideli olmakdan uzakdır. Fi'l-vâkiʻ bütün Hilâl ve Salîb-i Ahmerlerden mürekkeb bir konfederasyon yapılması düşünül- dü. Bu kelime millî cemʻiyetin hâricde bir heyʼete tebaʻiyetleri maʻnâsını müstelzim görüldüğünden konfederasyon kelimesi yerine union kelimesi kondu. Bu kelime şübhesiz büyük bir fark teşkîl etmez. Bu sebebden millî cemʻiyetlerin muhtâriyet-i tâmmesi vardır. Cümlesinin projeye idhâli lâzım geldi. Salîb-i Ahmerler Birliği'nin yegâne kuvve-i teşrîʻiye ve idâresi olarak Beynelmilel Salîb-i Ahmer Konferansı kabûl edildi. Bu konferans dört senede bir ictimâʻ edecekdir. Bunun hâricindeki zamân için on kişilik bir meclis-i idâre teşkîl olundu. Bu meclis kongre tarafından kendine tevdîʻ olunacak mühim bir kuvvete sâhib olacakdır. Bâ-husûs büdce onun elindedir. Bu on kişiden yedisi muhtelif Salîb-i Ahmerlerin aʻzâları meyânından kongre tarafından in- tihâb olunacakdır. Yalnız bu intihâb esnâsında mevcûd büyük medeniyetlerin temsîl edilebilmesi na- zar-ı dikkate alınacakdır. Mütebâkî üç aʻzâ Beynelmilel Salîb-i Ahmer tarafından intihâb olunacakdır. Bunların yalnız reʼy-i istişârîleri bulunacakdır. Bu heyʼet Cenevre'de ictimâʻ edecekdir. Yapılan proje Beynelmilel Salîb-i Ahmer Komitesi'nin şimdiki vezâfini yine kendine tevdîʻ etdiğinden bu heyʼete kalan işler esâsen Lig'in vezâifine inhisâr etmekdedir. Lâkin proje bu muhtelit heyʼete yüksek bir pâye vermekdedir ki, bu istikbâl için bir tehlike teşkîl eder. Zîrâ Hilâl ve Salîb-i Ahmerlerin hiçbir beynelmilel makâmdan emir telâkkî etmeleri kâbil ve katʻiyen câiz değildir. Onlar ancak prensibleri vâsıtasıyla yekdiğerine merbût kalmalıdırlar. Bu sûretle meydâna gelen projeyi mütâlaʻa komisyonunun aʻzâsı sıfatıyla kabûl etmekle berâber son sûret-i tahrîrine kayd-ı ihtiyâtî koydum. Aksi takdîrde ittifâk-ı ârâ olmayacakdı. İşlerin sürünce- mede kalması, mesʼûliyetini bilâ-lüzûm Hilâl-i Ahmer'e tahmîl demekdi. Diğer tarafdan elde edilen netîce esâs iʻtibârıyla maksada muvâfık idi.