HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 38 1694 Dördüncü Mâdde İstiʻmâl hakkına mâlik olmaksızın Salîb-i Ahmer alâmet ve unvânını emtiʻa-i ticâriye veya bunların anbalajı üzerine vazʻ eden veyâhûd işbu alâmet ve unvânı hâvî eşyâ-yı ticâriyeyi satan veya satılığa veya mevkiʻ-i tedâvül ve istiʻmâle çıkaran veyâhûd Salîb-i Ahmer işâret ve unvânını bi'l-ih- tiyâr veya eser-i gaflet ve lâkaydî ile her ne sûretle olursa olsun, bi-gayr-ı hakkın istiʻmâl edenler … kuruşa kadar cezâ-yı nakdîye yâhûd … müddetle habse mahkûm olurlar veya haklarında işbu cezâ- lardan ikisi birlikde tatbîk olunur. İşbu memnûʻiyet (cemʻiyet esnâf heyʼetleri vesâir bu gibi) bir müessese tarafından âdî bir eser-i ihmâl olarak irtikâb edilmiş ise cezâlar heyʼet-i idâre-i mesʼûlesini teşkîl eden zevâta tatbîk olunur. İşbu kânûn ahkâmına muhâlif efʻâl ü harekât son mahkûmiyet târîhinden iʻtibâren üç sene zar- fında tekrâr ederse birinci fıkrada mezkûr iki cezânın hadd-i aʻzamîsi tazʻîfen tatbîk olunur. Beşinci Mâdde Salîbi hâvî olan asâlet ve hânedân armalarıyla nişân ve rütbe alâmetlerinin sûret-i meşrûʻada istiʻmâl ve taʻlîkı hakkı mahfûzdur. Altıncı Mâdde İltibâs ve mübhemiyeti mûcib olacak unvân ve alâmetin bir maksad-ı ticâretle istiʻmâli dördün- cü mâddeye tevfîkan mûcib-i mücâzâtdır. Yedinci Mâdde İşbu kânûnla hakk-ı istiʻmâli mahfûz olan işâret ve kelimelerin hilâf-ı kânûn mevzûʻ bulunduğu eşyâ, emtiʻa ve anbalajların âid olduğu makâmca zabtı emredilir. Her hâlde hattâ berâat hükmü verildiği ve haciz vazʻı mümkün olamadığı takdîrde iltibâs ve mübhemiyet tehlikesi sâbit olunca hilâf-ı kânûn vazʻ ve istiʻmâl edilen işâret ve kelimeler tahrîb edi- lir. Sekizinci Mâdde İşbu kânûna mugâyir bi'l-cümle fabrika ve ticâret markaları ve sanâyiʻe âid resim ve modellerin tescîl ve depo muʻâmelâtı reddedilir. Eser-i zühûl olarak tescîl ve depo edilerek kabûl edilmiş olan sâlifü'z-zikr mevâddın makâm-ı âidi tarafından tescîl ve depo muʻâmelelerinin terkîni hakkında reʼsen emir verilir. Dokuzuncu Mâdde Meʼmûrîn-i Adliye işbu kânûn ahkâmına mugâyir ahvâli reʼsen taʻkîbe meʼmûrdur. Bundan mâʻadâ resmen tanınmış millî Salîb-i Ahmer Cemʻiyeti işbu kânûnu ihlâl edenler aleyhinde [56] doğ- rudan doğruya mehâkime mürâcaʻat etmek hakkını hâizdir.