HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 38 1704 İmdâd ve Muʻâvenet Heyʼeti 1923 senesi nihâyetinde Japonya Salîb-i Ahmeri'nin [63] meʼmûrîn-i dâime-i imdâdiyesi: 266 tabîb, 312 hastabakıcı başhemşire, 3.812 kadın hastabakıcı, 18 erkek başhastabakıcı, 230 erkek hastabakıcı olmak üzere 4.638 kişiye bâliğ olmakdadır. Bunlardan mâʻadâ henüz devre-i tahsîl ve mümâresesini ikmâl etmemiş 1.254 hastabakıcı nâm- zedi vardır. Tokyo Hastahânesi'yle diğer on yedi hastahânede ve Mançuri Hastahânesi'nde müstahdem bi'l-cümle hastabakıcıların masârıfı Salîb-i Ahmer'e âiddir. Başhemşîreler, ikmâl-i tahsîl etmiş hastabakıcıların en güzîdelerinden tefrîk edilerek altı ay daha tahsîle devâm ederler. Erkek hastabakıcılarla erkek başhastabakıcılar dahi nizâmen muʻayyen olan müddet-i tahsîli- yeyi ikmâle mecbûrdurlar. Japon Salîb-i Ahmeri âfât ve mesâib-i umûmiyeden mecrûh ve hasta olanlara muʻâvenet etdiği gibi herhangi bir vesîle ile tecemmuʻ etmiş halk arasında zuhûr edecek kazâdan hasta veya mecrûh olanlara da hayırkâr muʻâvenetini teşmîl eder. 1923 senesinde cemʻiyet 369 vekâyiʻ-i kazâiyeye müdâhale etmiş ve eyyâm-ı tedâvî 20.771'[e] resîde olmuşdur. Eylül birde vukûʻ bulan hareket-i arzdan tahmînen 93.000 vefât, 103.000 mecrûh vukûʻ bul- muşdur. Japon Salîb-i Ahmeri bu felâket-i elîme karşısında vakit gâib etmeksizin hemen 157 imdâd mevkiʻi teşkîl etmiş ve Tokyo'daki hastahânesiyle vilâdethânesini tevsîʻ eylemiş ve ayrıca altı muvak- kat hastahâne ile emrâz-ı sâriyeye mahsûs iki hastahâne açmışdır. Bu teşkîlât için istihdâm etdiği meʼmûrînin adedi 4.663'dür. 98.242'si hâmil veya loğusalara ve 25.245 radîʻlere ve 19.908'i çocuklara isâbet eden eyyâm-ı tedâvî 1.725.084'[e] bâliğ olmakdadır. Gençlik Salîb-i Ahmeri 1921 senesinde teessüs eden Japon Gençlik Salîb-i Ahmeri'ne sinni on ile on dört arasında mekâtib-i ibtidâiyeye müdâvim çocuklar iştirâk eylemekdedirler. Gençlik teşkîlâtına 121.400 erkek ve 90.800 kız olmak üzere 212.200'den fazla çocuk mukay- yeddir. Gençlik Salîb-i Ahmeri'nin inkişâfını cemʻiyet büyük bir alâka ile takassub [taʻkîb] etmekdedir. Aʻzâ Cemʻiyet aʻzâsının âidât-ı seneviyesi cemʻiyete târîh-i intisâblarından iʻtibâren on sene müd- detle senevî üç yen veyâhûd bir defaya mahsûs olarak yirmi beş yendir. Bir yen, 5 frankdır. Aʻzânın teksîr-i adedine son derece ehemmiyet veren Japon Salîb-i Ahmeri geçen sene yeniden 74.200 aʻzâ kaydederek 1923 senesi nihâyetinde aʻzânın adedini 232.200'[e] iblâğa muvaffak olmuş- dur.