HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 41 1873 Bu hâlet-i rûhiye ise, ancak propaganda [170] yani teşvîk u tergîb vâsıtalarını ilmî bir tarzda harekete getirmekle hâsıl olur. Diğer bir sahîfede görüleceği üzere Amerika Salîb-i Ahmeri gerek hengâm-ı harbde ve gerek baʻde'l-harb propaganda vâsıtalarından ve bilhâssa konferansçılarından pek mühim ve mesʻûd netîceler elde etmişdir. Salîb-i Ahmerlerde aʻzâ adedinin tezyîdine atfedilen ehemmiyet o kadar büyükdür ki, herhangi bir Salîb-i Ahmer Cemʻiyeti'nin nizâmnâme-i esâsîsi tedkîk edilecek olursa "menâbiʻ-i vâridât" veya "kısm-ı mâlî" unvânlı fasıllarının ilk mâddesinde aʻzâ âidâtının "cemʻiyetin sermâyesi" ve "başlıca vâridâtı" gibi kelimelerle kayıd ve zikredildiği görülür. Bizde teksîr-i aʻzâ mesʼelesinin hâl-i hâzırına gelince; son günlerde yalnız İzmir ile Konya mer- kezlerinde bu husûsda bazı âsâr-ı faʻâliyet görülmekde ise de merâkiz-i sâirenin hemen kâffesi âtıl ve gunûde bir hâlde kaldığını kemâl-i teessürle beyâna mecbûruz. Bundan başka teksîr-i aʻzâ husûsunda meşhûd olan ihmâl ve teseyyübün bâʻis olduğu vazʻiyet-i elîmeye çâresâz olmak zamânı gelmiş olduğuna bilhâssa merâkiz ve şuʻabâtın nazar-ı dikkatini celbe müsâraʻat ederiz. İstanbul'da ise "Semt Teşkîlâtları Heyʼetleri" nâmıyla iki sene evvel merkez-i umûmîmiz aʻzâ- sından fahrî muhâsebeci Berç Keresteciyan Bey'in lütf-ı himmet ve delâletiyle esâsâtı vazʻ olunan heyʼât-ı muʻâvine tedrîcen eski faʻâliyet ve zindegîsinden birçok şey gâib ederek bugün âdetâ metrûk bir hâle gelmişdir. Pek büyük emek ve zahmetlerle meydâna gelen teşkîlât-ı mezkûrenin mübtenî olduğu esâsâtı bu münâsebetle hulâsa etmek istiyoruz. Keresteciyan Bey, Müttehide-i Amerika Salîb-i Ahmer Cemʻiyeti teşkîlâtı hakkında bir fikr-i mahsûs peydâ etmek üzere cemʻiyet-i mezkûrenin Dersaadet Murahhası Mister Davis ile muhtelif zamânlarda vukûʻ bulan temâs ve mülâkâtlarından hâsıl etdiği intibâʻâtı bir muhtıra ile 7 Nisan sene 1338 [1922] târîhinde merkez-i umûmîmize arz u iblâğ etmiş idi. Bu esnâda Boğaziçi Anadolu sâhili mahallât ahâlîsi de Hilâl-i Ahmer için yeniden iʻâne derc etmek üzere pek büyük bir şevk ve gayretle merkez-i umûmîmize mürâcaʻât etmekde olduklarından mürâcaʻât-ı vâkıʻa sâlifü'z-zikr muhtıra için güzel bir sâha-i tatbîk teşkîl etdi. Muhtıranın tarz-ı faʻâliyet ve mesâʻî kısmında evvelâ câmiʻlerde mevʻizeler tertîbi, sâniyen matbûʻât vâsıtasıyla ahâlînin hissiyât-ı necîbe-i vatan-perverâne ve hamiyetkârânesine mürâcaʻa- tı, sâlisen teberruʻâtın katʻiyen ve kâtıbeten ihtiyârî olduğunun zikr u beyânını, hâmisen teberruʻât ve taʻahhüdât-ı şehriyede bulunan zevât esâmîsinin behemehâl ya gazetelerle veya Hilâl-i Ahmer Mecmûʻası yla iʻlânını, sâdisen herhangi bir taʻahhüddde bulunan zâta nüshateyn bir taʻahhüdnâme (bulletin de souscription) imzâ etdirilerek nüsha-i asliyesinin merkez-i umûmîye irsâli ve nüsha-i sâ- niyesinin de taʻahhüdü eden merkezde hıfzı tavsiye edildikden sonra tahsîlât ve muhâsebât kısımları bilhâssa ilmî esâslara ibtinâ ediyor idi. [171] Şöyle ki, merkez-i umûmî muhâsebesinde tutulan defâtirde semt teşkîlâtı heyʼetlerine dâ- hil bulunan aʻzâya mahsûs ayrı ayrı on sekiz bin üç yüz küsûr hesâb açılmış ve ayda beş kuruş teber- ruʻ eden zevâta bile iʻtâ etdiği meblağın kuyûd-ı hesâbiyesi bir-iki dakîka zarfında irâʼe edilebilecek bir intizâm-ı mesâʻî teʼmîn edilmişdir. Bu muhtıranın hüsn-i tatbîk ve hattâ ikmâl-i nevâkısı husûsunda muhâsebe-i merkeziyemiz mü- dürü Bedri Nedim Bey'in yılmak ve yorulmak bilmeyen azim ve sebâtını burada bir lisân-ı sitâyişle yâd ederiz.