HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 41 1881 bir tahrîrâtda ise [179] Selanik vâlî-i umûmîsinin bu mesʼele hakkında Yunanistan Dâhiliye Nezâre- ti'ne irsâl etdiği rapora istinâden maʻlûmât-ı âtiye verilmekdedir: "-Selanik'deki Hilâl-i Ahmer İmdâd-ı Sıhhî Heyʼeti Reîsi Doktor Esad Bey vazîfesinin nihâyet bulduğunu Yunan Hükûmeti'ne ihbâr ederek İstanbul'a hareket etmiş ve dispanserin taʻtîl-i faʻâli- yeti üzerine Selanik'deki eşyâyı nakil için bir tabîb ile birkaç gardiyan bırakmışdır. Mübâdele ko- misyonundaki Türk murahhaslığı tabîbi dahi Kânûn-ı Sânî'nin dördünde hareket edeceğini alâkadâr makâmâta bildirmişdir. Yunan İskân Müdüriyeti, Hilâl-i Ahmer dispanserinde boş olduğunu tahmîn eylediği bir odayı bir ihtiyâc üzerine işgâl etmiş, eşyâ ve eşhâsa dokunulmamışdır. İşbu işgâlden sonra dâireyi ziyâret eden Türk mümessili, Hilâl-i Ahmer heyʼeti yakında hareket edeceği için binâda muhâcirlerin iskânında mahzûr görmediğini söylemişdir. Binâenaleyh vakʻa iʻzâm edilmiş ve binâ Hilâl-i Ahmer tarafından tamâmen tahliye edilmeden odalardan birisinin işgâli şâyân-ı kabûl olmasa bile vakʻa esnâsında Hilâl-i Ahmer meʼmûrîni taʻarruza ve eşyâsı gasba maʻrûz kalmamışdır". Verilen şu îzâhât, Hilâl-i Ahmer tarafından istihsâl edilen maʻlûmâta tevâfuk etmemekdedir. Fi'l-hakîka kırk-elli bin muhâcirin Selanik'de toplandığı bir zamânda kadrosu vâsiʻ olan Hilâl-i Ah- mer İmdâd-ı Sıhhî Heyʼeti, muhâcirlerden büyük bir kısmının Türkiye'ye nakledilmesi ve Selanik'de bin kadar muhâcir kalması üzerine bir tabîb ve iki hastabakıcı ve bir-iki müstahdemînini muhâcirînin bakıyyesini tedâvîye meʼmûr etmiş ve hastahâneyi dispanser hâline vazʻ etmişdir. Muhâcirlerin nakli ikmâl edildiği zamân bu son sıhhiye heyʼetinin de İstanbul'a avdeti mukarrer idi. Zâten Türkiye'de îfâ-yı vazîfe etmiş olan Yunan Salîb-i Ahmeri'ne mensûb imdâd-ı sıhhî heyʼet- leri de son muhâcir kâfilelerinin hareketinde onlarla berâber Türkiye'den hareket eylemişlerdi. Binâe- naleyh, muhâcir mikdârının azalması ve imdâd-ı sıhhî heyʼeti kadrosunun küçültülmüş olması ve dispanserdeki hasta yataklarından bir kısmının muvakkaten boş bulunması ve dispanserin mugâyir-i hukûk ve hilâf-ı teʻâmül bir şekilde tecâvüze maʻrûz kalması ve meʼmûrîne hakâret edilmesi ve eşyâ- dan bir kısmının ziyâʻına sebebiyet verilmesi aslâ şâyân-ı kabûl bir maʻzeret teşkîl edemez. _______________ Hilâl-i Ahmer Hastabakıcılık Mektebi Yeniden teʼsîs edilecek olan Hilâl-i Ahmer Hastabakıcılık Mektebi'ne binâ olarak Haseki Câd- desi'nde Kadıʻasker Ali Rıza Bey'in konağı istîcâr edilmişdir. Mekteb heyʼet-i idâre aʻzâlığına Doktor Besim Ömer, Ziya Nuri Paşalarla Edhem Pertev ve Haydar Beyler ve Hilâl-i Ahmer Hanımlar Merkezi'nden Nezihe Veli ve Safiye Hüseyin Hanımefen- diler intihâb olunmuşdur. Haydar Bey'in heyʼet-i idâre aʻzâlığından istinkâf etmesi üzerine bir diğeri intihâb edilecekdir. _______________ Doktor Hakkı Şinasi Paşa Erkân-ı Harbiye-i Umûmiye Reîsi Müşîr Fevzi Paşa hazretlerinin vukûʻ-ı istiʻfâsıyla inhilâl eden İstanbul mebʻûsluğuna 11 Kânûn-ı Evvel [1]340 [Aralık 1924] târîhinde icrâ edilen intihâbât netîcesinde 1.043 reʼy-i ekseriyetle Hilâl-i Ahmer Merkez-i Umûmî aʻzâsından Doktor Hakkı Şinasi Paşa intihâb edilmişdir. Mecmûʻa muhterem paşayı tebrîk ve müşârunileyhin vazîfe-i cedîdelerinde muvaffakiyeti[ni] temennî eder.