HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 41 1888 "-Etfâle Muʻâvenet Beynelmilel İttihâdı'na âid olmak üzere Viyana'da inʻikâd eden bu kongre müzâkerât ve münâkaşâtından ve bilhâssa mukarrerâtından memleketimizce bilinmesi lâzım gelen husûsât ber-vech-i âtî arz olunur: Viyana'da ve Budapeşte'de çocuklar arasında tasavvur olunan fakr u zarûret, tegaddîde adem-i kifâyet, hele vefeyât bugün bâ-husûs memleketime nazaran hiçdir. Edilen ve edilmekde olan muʻâvenât sâyesinde denilebilir ki, sefâletden hemen eser yokdur. Belki harbi müteʻâkib evvelce ihtiyâc-ı azîm, fakr u zarûret umûmî idi. Yalnız Etfâle Muʻâvenet Bey- nelmilel İttihâdı tarafından edilen muʻâvenete dâir bir fikir hâsıl etmek için teessüsünden beri Viyana ve Budapeşte şehirlerinin her birindeki etfâle 7.000.000 İsviçre frangı sarf ile muʻâvenet olunduğunu hatırlamak kâfidir, sanırım. Bu meblağa Hollanda ve İsviçre'ye katârlarla sevk olunan zaʻîf Avusturya ve Macaristan çocukları masârıfı dâhil değildir. Avusturya ve Macaristan'da, Viyana ve Budapeşte'de evvelden beri çocuklara muʻâvenet husû- sunda mevcûd müessesât ve teşkîlât nazar-ı dikkate alındığı hâlde harbi müteʻâkib buralardaki çocuk- larda bildirilen sefâletin, fakr u zarûretin bizdeki kadar olmadığına kanâʻat edilmek lâzımdır. Viyana'da belediyenin maʻlûmâtı olmaksızın hiçbir çocuk doğmaz. Çocuk ister fakîr, isterse zengin bir âileye mensûb olsun, belediye sevk eylediği bir hastabakıcı maʻrifetiyle çocuğun ahvâl-i sıhhiyesinden haberdâr olur ve bu haber ve maʻlûmât zabt ve tesbît edilir. Âile muhtâc-ı muʻâvenet ise belediye derʻakab yardımda bulunur. Viyana Belediyesi babasız doğan çocuğun hâmîsi, vasîsidir. Avusturya kavânîn ve nizâmâtında babasız çocukların babalılar kadar hukûku vardır. Fakîr vâlideler çocuklarını bırakmayıp irzâʻ eyle- mek için belediye tarafından her nevʻ muʻâvenete mazhar olurlar. Bu husûsda lâzım gelen teşkîlât meydâna getirilmişdir. Emzikli annelere süt veriliyor. Bu bâbda bilhâssa İngiltere, Amerika, İsviçre yardım ediyor. Meme zamânını geçirmiş çocuklar için iki misâfirhâne ve verem ile mücâdele için de 800 yataklı iki müessese vardır. Viyana'da mektebler için 4.600 tabîb müfettişi vardır. Tekmîl çocuklar haftada bir gün muʻâye- ne edilmekdedirler. [186] Mekteb çocuklarından 180.000'ine her gün sabâh kahvaltısı, öğle yemeği ve ikindi kah- valtısı verilmekdedir. Senede 27.000 çocuk tebdîl-i havâ ve istirâhat için köylere sevk olunuyor. Yalnız Viyana'da 12 gebelere nasîhat mahalleri, 42 memedeki çocuklar ve anneler muʻâyene- leri, 127 çocuk yuvaları ve istirâhat mahalleri, 135 irzâʻhâne (kreş), 57 belediye ve 34 husûsî çocuk bâğçeleri, 65 âilelerin ahvâl-i sıhhiyelerini tedkîk ve muʻâvenet cemʻiyetleri, 135 sanatoryum zihnen maʻlûl olan ve geride kalan çocuklarla ahmak ve budalalara, kör ve sağırlara mahsûs mektebler var- dır. Viyana'da müessesât ve teşkîlât-ı sıhhiye ve ictimâʻiyenin yalnız fihristini neşre bu risâle müsâʻid değildir. Evvelden beri bunca müessesâtı, hayr u hasenâtı sıhhî ve ictimâʻî teşkîlâtı olan bir memleketde hattâ en buhrânlı zamânlarda bile öyle işâʻa edildiği derecede kaht u galâ tasavvur olunamaz. Ancak çocuklarda kesret-i vefeyâta, fakr u zarûrete dâir işte bu işâʻât ve neşriyât sâyesinde her tarafdan kül- liyetli muʻâvenetde bulunulmuşdur ve hâlâ da iʻânât devâm ediyor duruyor. Hattâ kongre aʻzâsının pek çok takdîrâtına mazhar olan müessesât-ı hayriyeyi ziyâretimiz akşâmı Londra Himâye-i Etfâl Cemʻiyeti müessislerinden olup çocuklara muʻâvenet husûsunda bir 'meleke-i sıyânet' addedilen Mis Jeb, çocukların açlıkdan telef olduklarını ve kâfi derecede muʻâvenet göremediklerini îmâen îrâd ey- lediği nutukda 'yapılan yardımın kızgın bir saç üzerine atılan bir damla suya benzediğini' söylemişdir.