HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 43 2014 nakliye, kâfileler için istiʻmâl olunan demiryol levâzımı ve sefâin dâhil olduğu hâlde hukûk-ı düvel kavâʻid-i umûmiyesine tâbiʻ olacaklardır. Altıncı Fasıl Alâmet-i Fârika On Sekizinci Mâdde- İsviçre hakkında bir nişâne-i ihtirâm olmak üzere cumhûriyet-i müşâru- nileyhâ [272] elvânının terkîbinden hâsıl olan beyâz zemîn üzerine mevzûʻ salîb-i ahmerdir 1 . İşâret, orduların heyʼet-i sıhhiyesi için bir nişâne ve alâmet-i fârika olmak üzere ibkâ edilmişdir. On Dokuzuncu Mâdde- Bu alâmet bayraklar ve kollarla heyʼet-i sıhhiyeye âid bi'l-cümle levâ- zım üzerine meʼmûrîn-i âide-i askeriyenin müsâʻadesiyle vazʻ olunur. Yirminci Mâdde- Dokuzuncu mâddenin birinci fıkrasıyla onuncu ve on birinci mâddeler mû- cebince mazhar-ı himâye olan meʼmûrîn ve müstahdemîn ve meʼmûrîn-i âide-i askeriye tarafından orduların hidemât-ı sıhhiyesine mensûb ve askerî üniformayı gayr-ı hâmil eşhâs için bir hüviyet şehâ- detnâmesiyle berâber damgalanıp verilmiş ve beyâz zemîn üzerinde salîb-i ahmer işâretini hâvî bu- lunmuş bir pazubendi sol kollarına merbût olarak taşırlar. Yirmi Birinci Mâdde- Alâmet-i fârika olmak üzere işbu mukâvelenâme ile kabûl edilen bayrak ancak ahkâm-ı mukâvele mûcebince masûniyetleri lâzım gelen teşkîlât ve müessesât-ı sıhhiye-i me- bhûsenin mensûb olduğu taraf-ı muhâribin millî bayrağı dahi keşîde edilmelidir. Maʻahâzâ düşman eline düşen teşkîlât-ı sıhhiye bu hâl ve mevkiʻde kaldıkları müddetçe Salîb-i Ahmer bayrağından gayrı bir bayrak keşîde etmeyeceklerdir. Yirmi İkinci Mâdde- On birinci mâddede gösterilen şerâit tahtında ibrâz-ı hidemâta meʼzûniyet istihsâl eden bî-taraf memâlikin teşkîlât-ı sıhhiyesi mukâvele-i hâzıra ile muhdes bayrakla berâber mensûb oldukları taraf-ı muhâribin millî bayrağını dahi keşîde etmeğe mecbûrdurlar. Mâdde-i sâbı- kanın ikinci fıkrası ahkâmı bunlar hakkında dahi tatbîk olunur. Yirmi Üçüncü Mâdde- Beyâz zemîn üzerinde salîb-i ahmer alâmeti ve salîb-i ahmer yâhûd Cenevre salîbi kelimeleri gerek vakt-i sulhda ve gerek hengâm-ı harbde ancak mukâvele mûcebince mazhar-ı himâye olan teşkîlât ve müessesât-ı sıhhiyeyi ve meʼmûrîn ve müstahdemîn ve levâzımı muhâfaza veya irâʼe için istiʻmâl olunabileceklerdir. Yedinci Fasıl Mukâvele Ahkâmının Tatbîk ve İcrâsı Yirmi Dördüncü Mâdde- İşbu mukâvelenâme ahkâmı içlerinden iki veya daha ziyâdesi arasında muhârebe zuhûru hâlinde ancak dâhil-i mukâvele olan hükûmât için mecbûriyyü'l-icrâdır. Hükûmât-ı mütecâvireden biri mukâvelenâmeye vâzıʻu'l-imzâ bulunmadığı hâlde ahkâm-ı mezkûreye artık mec- bûriyyü'l-ittibâʻ olmayacakdır. Yirmi Beşinci Mâdde- Muhârib ordular başkumandanları mevâdd-ı sâbıkanın teferruʻât-ı ic- râiyesi ile mâddelerde musarrah ahvâlde mensûb oldukları hükûmetlerden alacakları taʻlîmâta ve mukâvele-i hâzıra kavâʻid-i umûmiyesine tevfîk-i hareket edeceklerdir. 1 Türkiye Hükûmet-i Cumhûriyesi orduları için beyâz zemîn üzerine kırmızı bir hilâl.