HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 43 2015 Yirmi Altıncı Mâdde- İşbu mukâvelenâmeye vâzıʻu'l-imzâ bulunan hükûmetler kendi ordularını ve bilhâssa mazhar-ı himâye olan meʼmûrîn ve müstahdemîni ahkâm-ı mukâveleden haberdâr etmek ve bu ahkâmı ahâlîye bildirmek için tedâbîr-i lâzımeye tevessül ede[ce]klerdir. Sekizinci Fasıl Sûistiʻmâlât ile Hilâf-ı Mukâvele Harekâtın Zecr u Menʻi Yirmi Yedinci Mâdde- Vâzıʻ-ı imzâ hükûmetler meyânında kânûnları el-hâletü hâzihî ah- kâm-ı kâfiyeyi câmiʻ olmayanlar efrâd-ı ahâlî veya mukâvele-i hâzıra mûcebince salâhiyetdâr olan cemʻiyâtdan gayrı cemʻiyetler taraflarından [273] salîb-i ahmer ve Cenevre salibi alâmet ve unvânı- nın ez-cümle fabrika veya ticâret markası vâsıtasıyla bir maksad-ı ticâretde istiʻmâl olunmamasını her zamân menʻe sâlih tedâbîre tevessül veya bunu aʻyân ve mebʻûsân meclislerine teklîf etmeği taʻahhüd ederler. Mârru'z-zikr alâmet-i fârika veya unvân istiʻmâli memnûʻiyeti her memleketin mec- lis kavânîni tarafeynden taʻyîn edilen müddetden iʻtibâren ve nihâyet mukâvele-i hâzıranın mevkiʻ-i icrâya vazʻından beş sene sonra teʼsîrini gösterecekdir. Mukâvelenin mevkiʻ-i icrâya vazʻından sonra memnûʻiyet-i vâkıʻa hilâfına olarak bir fabrika veya ticâret markası ittihâzı câiz olmayacakdır. Yirmi Sekizinci Mâdde- Hükûmet-i mümziye kavânîn-i cezâiye-i askeriyelerine adem-i kifâyeti hâlinde vakt-i harbde ordulardaki mecrûhîn ve hastagân haklarında efrâd-ı ahâlî tarafından yağma- gerlik vesâir sûistiʻmâlât vukûʻunu zecr u menʻ etmek ve işbu mukâvele mûcebince mazhar-ı himâye olmayan asâkir veya efrâd-ı ahâlîden Salîb-i Ahmer'e mahsûs bayrak veya pazubendi hilâf-ı usûl istiʻmâl edenler alâmet-i askeriyeyi sûistiʻmâl edenler misillü teʼdîb eylemek için tedâbîr-i lâzıme- ye tevessül veya bunu aʻyân ve mebʻûsân meclislerine teklîf etmeği taʻahhüd eylerler. Hükûmât-ı mezkûre bu zecr u teʼdîbe müteʻallik ahkâmı mukâvele-i hâzıranın tasdîkinden iʻtibâren nihâyet beş seneye kadar İsviçre Nevâhî-i Müttehidesi Meclisi maʻrifetiyle yekdiğerlerine teblîğ edeceklerdir. Ahkâm-ı Umûmiye Yirmi Dokuzuncu Mâdde- Mukâvele-i hâzıra sürʻat-i mümkine ile tasdîk olunacak ve tasdîk- nâmeleri Bern şehrinde mevdûʻ bulunacakdır. Her tasdîknâmenin tevdîʻinde bir zabıtnâme tanzîm edilecek ve bunun musaddak bir sûreti diplomasi tarîkıyla bi'l-cümle hükûmât-ı âkıdeye iʻtâ ve teslîm kılınacakdır. Otuzuncu Mâdde- Mukâvele-i hâzıra her bir hükûmet için tasdîknâmesinin tevdîʻi târîhinden iʻtibâren altı ay sonra merʻî olacakdır. Otuz Birinci Mâdde- İşbu mukâvelenâme usûlü vechile bi't-tasdîk hükûmât-ı âkıde beynindeki münâsebâtça 22 Ağustos sene 1864 târîhli mukâvelenâme makâmına kâim olacakdır. 1864 Mukâve- lenâmesi onu imzâ eden ve mukâvele-i hâzırayı tasdîk etmeyen devletlerin münâsebâtınca merʻiy- yü'l-icrâ kalmışdır. Otuz İkinci Mâdde- İşbu mukâvelenâme Cenevre'de 11 Haziran sene 1906 târîhinde ictimâʻ eden konferansa iştirâk eyleyen hükûmetler ile bu konferansa iştirâk etmemiş ve 1864 Mukâvelenâmesi'ni imzâ eylemiş olan hükûmetler tarafından önümüzdeki Kânûn-ı Evvel'in nihâyetine kadar imzâ edile- bilecekdir. Hükûmât-ı mezkûreden 31 Kânûn-ı Evvel sene 1906 târîhinde işbu mukâvelenâmeyi imzâ etmemiş olanlar bilâhare mukâvele-i mezkûreye muvâfakatda serbest kalacaklardır. Bunlar kabûl ve muvâfakatlarını İsviçre Nevâhî-i Müttehidesi Meclisi'ne bir tebîğnâme irsâliyle bildireceklerdir.