HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 44 2047 Kanada Salîb-i Ahmeri bu husûsda istihdâm etdiği çocukların mikdârını mütemâdiyen tezyîde mec- bûr oldu. [295] Cemâhîr-i Müttefika-i Amerika'nın 1917 senesinde Harb-i Umûmî'ye iştirâkinden biraz sonra vâkiʻ olan bir teşebbüs üzerine bu hizmet-i insâniyetkârîye Amerika'da yirmi milyon (20.000.000) çocuk kaydedildi. Çizilen program, Kanada şuʻabât-ı muʻâvinesi programının hemen aynı idi. Çocuklar hastahâneler için pansuman ihzâr edecekler, çamaşır dikecekler, el işleri işleyecek, mobilya iʻmâl edecekler ve muhârebeye iştirâk eden efrâdın ez-her cihet tahfîf-i âlâmına çalışacaklar. Diğer tarafdan, Avustralya Salîb-i Ahmeri harbin müddet-i devâmınca efrâd için ve be-tahsîs hasta ve maʻlûl asâkir için muhtelif muʻâvenet ve faʻâliyetleri derʻuhde eden çocuk grupları teşkîl ve İtalya Salîb-i Ahmeri ise mekteb çocuklarını şuʻbelerine aʻzâ-yı muʻâvine olarak kayıd ve kabûl etdi. Harbin hitâmıyla efrâd-ı askeriye ve ordunun bu yoldaki ihtiyâcât-ı mübremesi her ne kadar nihâyet bulmuş ise de Cemâhîr-i Müttefika dâhilinde bu ulvî efʻâl-i hayriyeye bir hiss-i samîmî ile merbût kalan çocuklar tekmîl gayret ve faʻâliyetlerini ve teveccüh ve muhabbetlerini harb felâket- zedelerine imâle etdiler. Amerika Gençlik Salîb-i Ahmeri hâric ez-memleket ilk muʻâvenete 1919 senesi ilkbahârında Avrupa'dan başladı. Fi'l-hakîka gâyet vâsiʻ mikyâsda îfâ edilen muʻâvenâta dâir aldıkları ımaʻlûmât ve tafsîlât sâ- yesinde Amerika çocukları hemen bütün Avrupa memleketleri hayât-ı etfâliyle ülfet peydâ etmiş ol- dular. Bu hâl, beynelmilel hayırhâhlık hissi hakkında Amerika muʻallim ve mürebbîlerine talebeye amelî bir ders vermek fırsatını ihzâr etdi ve binlerce dershânenin ufkunu genişletdi. Cemʻ edilen mebâliğ-i müteberriʻa ile oyun mahalleri, kütübhâneler, mekteb bâğçeleri teʼsîs edildi. Çocukluğun sıhhat ü saʻâdetine hâdim her türlü âsâr-ı müfîde meydâna getirildi ve Amerika çocuklarının bizzât iʻmâl etdikleri kırk bin masa, sandalye ve binlerce oyuncak Avrupa'ya gönderildi. Maʻamâfîh, bu muʻâvenât ve teberruʻât ne kadar mühim olursa olsun, Avrupa etfâli arasında Gençlik Salîb-i Ahmeri'nin inkişâfı için icrâ edilen teʼsîrât-ı mûkıza ve muharrike her hâlde bundan çok mühimdir. İlk fikrin tatbîkât-ı ameliyesi hasâil-i kavmiye ve örf ve âdât-ı mahalliyeye tebaʻan tahavvül etmekle berâber bugün Salîb-i Ahmer'in hiçbir şuʻbe-i faʻâliyeti yokdur ki, orada çocuklar bir vazîfe derʻuhde etmiş olmasın. Gençlik Salîb-i Ahmeri, gençlere mahsûs bi'l-cümle cemʻiyât arasında bir râbıta-i tesânüd teʼsîs etdiğini hâdisât isbât etmekdedir. Birçok memleketlerde, meselâ keşşâflarda olduğu üzere rüesâ-yı teşkîlât Salîb-i Ahmer'in taʻkîb etdiği maksad ve gâyeyi kendi maksad ve gâyelerine tamâmen muvâ- fık ve mutâbık bulduklarından Gençlik Salîb-i Ahmeri'nin mesâʻî programından aʻzâlarının da is- tifâdelerine şitâb etmekdedir. Hattâ Cemâhîr-i Müttefika'da erkek ve kız keşşâflar Gençlik Salîb-i Ahmeri'ne mensûbiyeti terbiye-i medeniyelerinin zarûrî tetimmesi addediyorlar. Fi'l-hakîka bunlar Salîb-i Ahmer'e aʻzâ kaydına delâletde ve Salîb-i Ahmer menâfiʻine yapılan propagandalarda pek mühim âmil mevkiʻinde bulunuyorlar. Çekoslovakya'da, Avusturya ve Avrupa'nın diğer memleketlerinde Gençlik Salîb-i Ahmerleriy- le keşşâfların teşrîk-i mesâʻîlerinde derîn bir samîmiyet müşâhede edilmekdedir. Norveç'de kız keşşâf grupları millî Salîb-i Ahmer himâyesinde evlerde hasta tedâvîsini taʻlîm [296] ve Arnavudluk'da ise Amerika Gençlik Salîb-i Ahmeri'nin idâre etdiği mektebde çocukları açık havâ hayâtına alışdırmak üzere teşekkül eden bir keşşâf grubu sıhhî eğlenceler tertîb etmekdedir.