HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 44 2049 [297] Lehistan Gençlik Salîb-i Ahmeri "Benî Nevʻini Sev!" cümlesini şiʻâr ittihâz etmişdir. § Avusturya Gençlik Salîb-i Ahmeri terbiyevî, taʻlîmî ve sıhhî maksad ve gâyelerine Avusturya çocuklarını celb etmek vazîfesini derʻuhde etmişdir. Bunun için başlıca vâsıtaları şudur: 1-Muhtâcîn-i etfâlin basît ve sıhhî bir tarzda yaşayabilmeleri için vesâit-i muʻâvenet tedârük etmek 2-İlk imdâd ve muʻâvenet-i müstaʻceleye mahsûs mekteb eczâhânesi teʼsîs etmek 3-Akvâl, efʻâl, eşkâl ile ve sıhhî oyunlarla propaganda yaparak hıfzıssıhha kavâʻidine tevfîkan yaşamağı öğretmek ve halk hastalıklarına dâir maʻlûmât vermek 4-Hastalara yapılacak ilk takayyüd ve ihtimâmı ve buna müteʻallik vesâiti öğretmek 5-Küçük çocuklarla radîʻlere mahsûs tedâvî ve ihtimâmı genç kızlara öğretmek 6-Tıbbî nebâtât zerʻiyâtı ve bunların muhâfaza ve istiʻmâli 7-Çiçek ve sebze yetiştirmek 8-Başka memleketlerin Gençlik Salîb-i Ahmerleriyle mektûblaşmak, bunlarla tehzîbî tecrübe- lere âid muhâberâtda bulunmak 9-Eşyâ-yı müfîdeye ve oyuncak iʻmâline mahsûs dârüssınâʻa teʼsîs etmek 10-Fukarâ ve muhtâcînin iksâ edecekleri elbise için genç kızlara dikimhâneler teʼsîs etmek 11-Hayvânât ve nebâtâtın muhâfazasına âid terbiyeyi vermek 12-Müdâfaʻa-i vatan uğrunda sarf edilecek himmet ü gayreti öğretmek 13-Gençlik Salîb-i Ahmeri'ne mahsûs bir mecmûʻa neşretmek. § Bulgar Gençlik Salîb-i Ahmeri de Bulgar Millî Salîb-i Ahmeri'nin bir cüzʼ-i mütemmimi olup gâyesi çocuklarda fedâkârlık ve tesânüd fikrini vücûda getirmek, onlarda ihtiyâcât-ı beşeriyeye taʻal- luk eden bi'l-cümle maʻlûmâtı ve milletler arasında vifâk u muhâdenetin teʼmîn-i husûlü için fâideli insân ve iyi vatandâş olmak emel ve arzusunu inkişâf etdirmekdir. Bulgar Gençlik Salîb-i Ahmeri bu gayeye konferanslar, teferrücler ve mektebler arasında mükâtebât ve muhâberât ile vâsıl olmakdadır. § İtalya Gençlik Salîb-i Ahmeri'ne gelince; İtalya Salîb-i Ahmeri'nden doğan bu teşkîlât dahi "Çocuk Çocuk İçindir" ve "Gençlik Gençlik İçindir" düstûrlarıyla biri mekâtib-i ibtidâiyeye ve di- ğeri mekâtib-i tâliyeye mahsûs olmak üzere tekmîl faʻâliyetini mekteb sâhasında iki zümrede cemʻ etmekdedir. İstihdâf etdiği gâye ise: 1-Tekmîl cihân gençliğini birleştirecek hiss-i tesânüdü mekteblerde taʻmîm etmek 2-Muʻâvenet-i nakdiye ve mâddiyeleri ile talebe arasında meccânî, sâbit ve seyyâr dispanserler, hıfzıssıhha-i etfâl muʻâvenet ve numûne merkezleri ve açık havâ mektebleri, deniz ve nehir sâhilleri- ne karalarda taʻtîl kolonileri, oyun mahalleri vesâire gibi terbiye-i bedeniyeye hâdim teʼsîsât vücûda getirmek