HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 44 2059 Hulâsa, merkezimiz [1]340 [1924] senesi zarfında da derʻuhde eylemiş olduğu vezâif-i muʻâ- veneti muvaffakiyetle îfâ ve intâc etmişdir. Mübâdele-i ahâlî mesʼelesi hitâm bulmuş ve bu sebeble ahvâl-i fevkalâde zâil olmuş olduğundan [1]341 senesinde yapılacak vezâif ve muʻâvenet münhasıran dâhilî husûsât ile iştigâl etmekden ibâret olacakdır. Merkezimizin [1]340 [1924] senesi muʻâmelât-ı umûmiye ve hesâbiyesi merkez-i umûmîce yegân yegân tedkîk ve kontrol edilmiş ve mazhar-ı takdîr olmuşdur. Bu bâbda vârid olan tahrîrât-ı aliyye zîre derc edilmişdir. 1341 [1925] senesi birinci altı aylık büdcemiz zîrde ale'l-müfredât gösterildiği vechile merkez-i umûmîce 57.888 lira olarak kabûl edilmiş olduğundan muhterem halkımızın himem-i muʻâvenet ve muzâheretleriyle bu mikdârı maʻa-ziyâdetin teʼmîn ve tedârük edebileceğimizden ümîdvârız. Muhterem Efendiler! Fukarâ-yı halkın muʻâyene ve tedâvîlerine mahsûs dispanserlerimizin teʼmîn etdiği menâfiʻ-i sıhhiye nazar-ı dikkate alınarak görülen lüzûm üzerine Karşıyaka'da da bir dispanser küşâd edilmiş- dir. İşbu dispanserin Karşıyaka civârında iskân etdirilmiş olan muhâcirîn ve muhtâcîn ile köylülerin husûsât-ı sıhhiyelerinin teʼmînine fevkalâde medârı olacağı derkârdır. Hilâl-i Ahmer Cemʻiyeti her bir husûsdan evvel halkın sıhhî ihtiyâcâtının teʼmînine sarf-ı mesâʻî etmekde olmasına mebnî mevcûd umûmî hastahânelerin ihtiyâca adem-i kifâyeti hasebiyle birçok fakîr hastaların tedâvîsizlik yüzünden mahv u heder oldukları görülmekde olduğu cihetle bu hâle mehmâ-emken çâresâz olabilmek ve fukarâ meccânen tedâvî olunmak ve zî-iktidâr olanlar ücre- te tâbiʻ tutulmak üzere fennin son terakkiyâtını câmiʻ bir Hilâl-i Ahmer Hastahânesi teʼsîsi lüzûmuna ehemmiyetle kâniʻ ve müttefik olan heyʼet-i merkeziyemiz bu husûsun bir an evvel intâcını teʼmî- nen hastahâne ittihâzına ez-her cihet elverişli olduğu meʼmûrîn-i sıhhiye ve fenniyenin tedkîkât ve tahkîkâtıyla anlaşılan Kokaryalı'da sâhil-i bahrda kâin binâ iştirâ [307] olunmuş ve karîben taʻmîrât ve tefrîşâtı ikmâl etdirilerek bu sene zarfında resm-i küşâdının icrâsı meʼmûl ve işbu hastahâneye hâricden celb ve dâhilden teʼmîn olunacak mütehassıs ve hazâkat-ı fenniyeleriyle müştehir etıbbânın bahşedecekleri fevâidi şimdiden arz etmek nâ-be-mevsim olmakla berâber hakîkaten bir numûne hastahânesi şeklinde teʼsîsi mukarrer bulunmuşdur. Hastahânenin resm-i küşâdından sonra Yalılar ve civârında ve kurâda mukîm fukarâ-yı halkın muʻâyene ve tedâvîlerinin teshîl-i icrâsı zımnında hastahâne ittisâlinde bir de dispanser küşâd edile- cekdir. İşte efendiler, geçen seneki mesâʻîmizin hulâsasıyla bu sene îfâsı muktezî vezâif bundan ibâ- retdir! Dâimâ müsbet ve muʻayyen bir program dâhilinde vazîfesini îfâ etmekde olan heyʼetimiz hüsn-i nazarınız temâdî etdikçe millet ve memleketimize daha nâfiʻ yardımlar esbâbını ihzâr edeceği şübhesiz bulunmakdadır. Muhterem Efendiler! Kıymetli rüfekâ-yı mesâʻîmizden Doktor Şehri Bey'in geçen sene üfûl-i ebedîsinden mütevellid teessürâtımızı bu vesîle ile de tekrâr eder ve rûh-ı pür-fütûhuna fâtihalar ithâf eyleriz. Merhûmdan inhilâl eden heyʼet-i merkeziye aʻzâlığına mükemmillerden Doktor Bahtiyar Bey intihâb edilmiş olduğundan heyʼet-i muhteremelerinin tasdîkine arz ederiz. Heyʼet-i merkeziyemiz aʻzâsından olup meşâgıl-i şahsiyesinin kesreti cemʻiyet umûruyla iş- tigâle mâniʻ olduğundan istiʻfâ etmiş olan Doktor Menekşelizâde Hüsnü Beyefendi'nin yerine bir aʻzânın ve bu sene bâ-kurʻa çıkarılacak olan iki aʻzânın yerine de yenilerinin intihâbını ricâ ederiz.