HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 46 2171 Kesîrü'l-vukûʻ bir âfet olan seretân-ı miʻde ise tavazzuʻuna nazaran bazen adem-i iştihâ ve etden nefret ve müterakkî solgunlukla ve bazen şişkinlik, bulantı, geğirme, istifrâğ hissi ve zaʻfiyet-i serîʻayla ve emʻâ seretânı mevâdd-ı gâitada kan bulunması ve kabız ile ishâlin tenâvübü ve bilâ-se- beb sancı buhrânlarıyla başlar. Seretân miʻâ-i müstakîmde sık sık defʻ-i [379] tabîʻî ihtiyâcı ekseriyâ tagavvut-ı tabîʻî olmayarak gâyet fenâ kokulu kırmızı bir mâyiʻ görülür. Kilye ve cihâz-ı bevlî seretânı ekseriyâ idrârda mütekattıʻan kanın tezâhürüyle anlaşılır. Kadınlarda meme istikâmetinde şişkinlik ve teferruhâtın nümâyân olması, âdet-i şehriyenin adem-i intizâmı, müteʻaffin ve kanlı ifrâzât ile anlaşılacağından hemen vakit gâib etmeksizin tabîbe mürâcaʻat etmek mektezîdir. Çünkü bütün bu aʻrâz seretânın tezâhürât-ı ibtidâiyesidir. Tedâvîden istihsâl edilecek netîce ise her şeyden evvel katʻî bir teşhîse ve tedâvînin tâm vak- tinde icrâsına tâbiʻdir. Vaktinde kendisini muʻâyene ve tedâvî etdiren her seretânlıya şifâ ve kurtulmak mevʻûddur. Seretândan şübhe eden hastalar ise muʻâyene sâyesinde cancérophobie yani hafv mine's-seretândan kurtulmuş olurlar. _______________ Belîğ Rakamlar Geçenlerde Belçika Salîb-i Ahmer Haftası münâsebetiyle Brüksel Salîb-i Ahmer Merkez-i Umûmîsi'nde yapılan merâsime medʻuv bulunan Fransa Mesâʻî, Hıfzıssıhha ve Basîret-i İctimâʻiye Nâzırı Mösyö Justine Gothard'ın îrâd etdiği nutukda 1870-1871 muhârebesinde Fransız ordusunda çi- çeğe musâb olan 125.000 efrâddan 23.470'inin vefât etdiğini ve Paris'de yalnız sivil ahâlîden 200.000 musâb zuhûr ederek bunlardan 18.000 kişi[nin] öldüğünü zikretdikden sonra 1914'den 1918 senesine kadar Fransız ordusunda yapılan telkîh-i cederî sâyesinde ekserîsi müstaʻmerât efrâdından olmak üzere ancak 56 musâbla 5 vefât vukûʻa geldiğini ilâve etmişdir. Mösyö Gothard, mâbaʻd-i nutukda Fransa şarkda mühim bir kuvve-i askeriye bulundurduğu sırada ittihâz edilen tedâbîr-i sıhhiye sâyesinde bir kolera vakʻasının bile zuhûr etmediğini ve 1918 senesinde malaryaya karşı açılan mücâdele netîcesinde aded-i vefâtın 1916 senesine nisbetle 23 defa azaldığını beyân etmiş ve tifo aşısının bidâyet-i tatbîkâtı olan 1914 senesinin son üç ayında hummâ-yı tifoidi âdetâ istîlâî bir felâket hâlini alarak bundan 45.000 musâb ve 8.170 vefât vukûʻ bulmuş iken tifoya karşı mükerrer aşılanma usûlü tatbîk edilir edilmez illet-i mezkûreden 1916 senesinde 12.456 ve 1917'de 1.659 ve 1918 senesinde 665 musâb görüldüğünü zikretmişdir. Sonra, çiçek aşısının kâşifi Jenner'in vatanı olan İngiltere'ye nakl-i kelâm ederek birçok kim- selerin aşılanmamak husûsunda temerrüd etdiklerini ve 1911 senesinde İngiltere'de çiçekden 289 musâb ve 23 vefât, 1921'de 336 musâb ve 5 vefât, 1922'de 972 musâb ve 7 vefât, 1923'de 2.504 musâb ve 7 vefât, 1924'de 3.784 musâb ve 13 vefât vukûʻ bulduğunu ifâde etmişdir. Her gün meyve ve sebze yiyiniz. Malarya Rus Salîb-i Ahmeri'nin 1925 senesi takvîminden: Rusya'da büyük tahrîbât yapan tifo hastalığı son zamânlarda yok denecek dereceye tenezzül [380] etmiş ise de malarya gitdikçe tevsîʻ-i dâire ederek bugün beş milyon ahâlîyi muztarib kılmak- dadır.