HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 48 2309 ve şuʻbelerde ise oralarda hükûmeti temsîl eden erkân ve zevât tarafından böyle vazîfe ve maksad hâ- rici muʻâvenetlerde bulunmağa teşvîk ve ısrâr karşısında kalındığına merkez-i umûmî kuyûdâtından ıttılâʻ hâsıl olmuşdur. Meclis-i âlînizde Hilâl-i Ahmer merkezlerini ve şuʻbelerini temsîl eden bütün muhterem murahhaslardan bu merkezler ve şuʻbelerin bundan sonra bu gibi faʻâliyetlerden tevakkî etmeleri husûsunda irşâdâtda bulunmalarını ve meclis-i âlînizden de merkezleri ve şuʻbeleri maksad-ı mevcûdiyetleri hâricinde işlere muʻâvenetde bulunmağa sevk eden metâlibin mahallî makâmât-ı idâ- riyeleri tarafından yapılmamasını teʼmîn için Dâhiliye Vekâleti'ne mürâcaʻatda bulunmak karârını vermeği ricâ ederiz. 5-Sulh zamânı için mesâʻî programı tanzîmi Merkez-i umûmî raporunda bu programın ne sûretle tesbît olunduğunu irâʼe için meclis-i âlî- nize takdîm ve geçen ictimâʻlarda tashîh ve takrîr olunan nizâmnâme-i esâsî lâyihasındaki mâdde-i mahsûsayı kaydetmekde ve bu mâddedeki başlıca dört işin ne sûretle tatbîk ve icrâ edildiğini göster- mek için de birincisi olan Hastabakıcı Mektebi'nin açıldığını, dördüncüsü olan Eskişehir'de Karaca- bey'de anbârda eşyâ ve malzemenin iddihâr ve ihzârı husûsunun icrâ edildiğini tekrâren [67] zikir ve ikincisi olan müstevlî hastalıklara ve verem ve sıtma ve çocuk vefeyâtı gibi âfâta karşı mücâdelâta iştirâke gelince; bunlardan müstevlî hastalıkların hamdolsun memleketde zuhûr etmediğini ve diğer taʻdâd olunan âfât karşısında Hilâl-i Ahmer'e düşen vazîfelerin hangisine ve ne tarz ve nisbetde iştirâk edilebileceğini takdîr ve tahsîsât-ı lâzıme tefrîki husûsu salâhiyetine fevkinde bulduğu için meclis-i âlînizin karâr intizâr etdiğini beyân etmekdedir. Maʻamâfîh merkez-i umûmî, muntazam bir program dâiresinde bu husûsda mesâʻî icrâsına kendisinde salâhiyet bulmamakla berâber hükûmetle teşrîk-i mesâʻî etdiği mübâdele işlerinin îcâbâtı olarak birçok mıntıkalarda, kurtarılan memleketlerin harâb ve muhtâc muhîtinde kinin tevzîʻi vesâir sûretleriyle velev az mikyâsda bile olsa sıtma mücâdelesine katılmışdır. Bu faʻâliyetin daha vâsiʻ bir ölçüde yapılmış ve heyʼet-i idâre karârları arasında sık sık tesâdüf edildiği üzere kinin lâzım olan yerlere istenilen mikdârlardan pek az gönderilmemiş olmasını daha memnûniyetle karşılayacakdık. Merkez-i umûmî çocuk vefeyâtı mesʼelesinde de raporun 30, 31 ve 32'nci sahîfelerinde zikro- lunduğu sûretde faʻâliyet ibrâz etmişdir. Yalnız bu fasılda yardım edilen çocuklar mikdârı olarak gös- terilen 36.500 adediyle on bin küsûr kutu süt ve birkaç yüz okka hubûbât unu, şeker vesâire tevzîʻâtı mikdârı arasında câlib-i dikkat bir nisbetsizlik bulduğumuzu ve bu sıhhî muʻâvenet masârıfının topu topu üç bin liradan ibâret olduğunu tahkîk etdiğimizi söylemek isteriz. Meclis-i âlînizden ricâ ederiz ki, vereceğiniz karâr ve kabûl edeceğiniz tahsîsâtı ile Hilâl-i Ah- mer'in bilhâssa bu ölüme nâmzed yavruları kurtarmak husûsundaki faʻâliyeti artabilsin. Sulh zamânı mesâʻî programının üçüncü kısmı olan yangın, zelzele, su tuğyânı, kıtlık ve îcâbât-ı harbiye dolayısıyla muhâceret gibi âfetler vukûʻunda muʻâvenet bahsinde de merkez-i umûmî bu iki sene zarfında müteʻaddid defalar faʻâliyete geçmişdir. Bu meyânda rapordaki fasl-ı mahsûslarında mezkûr olan Erzurum ve Ardahan zelzele musâblarına ve Eskişehir, Afyonkarahisar, Kütahya havâlî- sinde kıtlık felâketzedelerine yapılan büyük mikyâsda muʻâvenetlerle Şile, Sarıyer, Burdur, Küre, Öyücek, Kuzika'da vukûʻa gelen yangınların musâblarına, Kars, Bayezid ve Denizli seylâbzedeleri- ne, Bilecik, Orhangazi, Yalova, Karamürsel, Kars ve havâlisi felâketzedelerine ve muhtâcîn ve muhâ- cirînine, Azerbaycan ve Gürcü muhâcirlerine yapılan yardımları gösterebiliriz. Merkez-i umûmî bunlardan başka bir dereceye kadar tâlî vazîfe addolunabilecek sûretde Adana Dârüleytâmı, Kastamonu Memleket Hastahânesi gibi müesseselere de yardım etmiş, hattâ Yoğurtçu çayırının kurutularak park yapılması teşebbüsüne bile muʻâvenet-i nakdiyede bulunmuşdur.