HİLÂL-İ AHMER MECMÛʻALARI / CİLT 5

2357 Beşinci Sene 25 Safer sene 1344 / 15 Eylül sene 1341 (1925) Numara 49 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: [1]341 [1925] Senesi Meclis-i Umûmî Bakıyye-i Müzâkerâtı – Merkez-i Umûmînin Kongre Heyʼet-i Muhteremesine Takdîm Etdiği Rapor – Hilâl-i Ahmer Havâdisi – Salîb-i Ahmerler Havâdisi – Fransızca Kısmı – İngilizce Kısmı [1]341 [1925] SENESİ MECLİS-İ UMÛMÎSİ Dördüncü İctimâʻ: 29 Temmuz Celse 1 Sâʻat 2, Dakîka 30 Reîs: "-Müzâkereye başlıyoruz, efendim. Zabt-ı sâbık okunacak. (Zabt-ı sâbık kırâat olundu.) Bir mütâlaʻa var mı efendim?" Ömer Lütfi Bey: "-Bendenizin bir takrîrim vardı. Merkez-i umûmî aʻzâları, cemʻiyete âid bir meʼmûriyet kabûl etdikleri hâlde aʻzâlıkları sâkıt olacağına dâir… Nizâmnâme encümenine havâle buyurulmuşdu. Zabta geçmemişdir". Reîs: "-İşâret buyurulan tashîhât vechile zabt-ı sâbıkı kabûl edenler lütfen el kaldırsın. (Eller kalkar.) Kabûl olundu. Bir takrîr var, efendim. Onu okuyorum: Müderris Doktor Süleyman Numan Paşa dün akşâm vefât etmişdir. Harb-i Umûmî'de sahrâ sıh- hiye müfettiş-i umûmîsi bulunduğu zamânlarda Hilâl-i Ahmer Cemʻiyeti'ne mâddî ve maʻnevî birçok hidemâtı sebkat etmiş olmağla müşârunileyhin hâtırasına hürmeten üç dakîka celsenin taʻtîlini teklîf ve ricâ ederiz. Doktor Ömer Lütfi, Tıb Fakültesi Reîsi Neşet Ömer, Dârülfünûn Emîni Nureddin, Salih, Ali, Burhaneddin, Celâl Sahir". Reîs: "-Teklîf kabûl buyuruluyor mu? (Hay hay!) O hâlde merhûm-ı müşârunileyhin hâtırasına hürmeten celseyi üç dakîka taʻtîl ediyorum…"