HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2367 Gençlik Salîb-i Ahmeri gençliğin terbiyesine vatandâş vezâifinin daha çok insânî mâhiyetde anlaşılmasını teʼmîn edecek bir istikâmet verir. Daha vâsiʻ bir taʻbîrle, Gençlik Salîb-i Ahmeri'nde yeni bir sulh medeniyetinin ihzârı için sıhhati ıslâh etmek, emrâzın önünü almak, gençliği sıhhatlerine iʻtinâya ve insânî, medenî vezâif-i tesânüdü anlamağa alışdırmak ve bu sûretle etfâlde memleketleri- nin gençliğine ve bütün milel ü akvâma karşı muʻâvenet-i mütekâbilenin medlûl ve tatbîkâtını inkişâf etdirmek gâyeleri taʻkîb olunur. Gençlik Salîb-i Ahmeri'nin birçok husûsiyetleri de vardır. Meselâ, Gençlik Salîb-i Ahmeri, Salîb-i Ahmer muhîtinden ziyâde mekteb muhîtinde ve muʻallimler arasında inkişâf etmiş olduğu hâlde muʻallim hiçbir zamân Gençlik Salîb-i Ahmeri'ne aʻzâ olamıyor. Bu teşkîlât, bulunduğu muhî- tin maʻârif sisteminden az çok müteessirdir. Binâenaleyh bir memleketin Gençlik Salîb-i Ahmeri, diğer memleketlerin Gençlik Salîb-i Ahmerleriyle bir müşâbehet-i tâmme arz edemez. Meselâ, Ro- manya Salîb-i Ahmeri çocuklarda tesânüd hissini inkişâf etdirmek, gerek kendi memleketinde gerek memâlik-i sâirede muʻâvenet ve himâyeye muhtâc olanlara kardeşçe yardım etmek, rikkat ve şefkat duygusunu inkişâf etdirmek gibi gâyeler istihdâf eder. Gençlik Salîb-i Ahmeri, genç nesil arasında ana Salîb-i Ahmer'i aʻzâ-yı müstakbelesi için fi- dânlık hizmetini görür. Aʻzâsına gelince; her ferd Gençlik Salîb-i Ahmeri'ne aʻzâ kaydolunmak için mümkün olduğu kadar az ve fakat muʻayyen bir meblağ verir ve bu sâyede hiçbir çocuk aʻzâ olmak- dan mahrûm kalmaz. Çocuklar ferden yâhûd sınıfla, hattâ mekteb ile aʻzâ olabilirler. Mekâtib-i ibti- dâiye için yirmi santim alınır. Cildlerle tafsîlât verilse bitmeyecek kadar vâsiʻ bir teşkîlâtdır, efendim. Yalnız bir ciheti istirhâm edeceğim. Bu Gençlik Salîb-i Ahmer Teşkîlâtı'nı yapabilmek için merkez-i idâresi Paris'de bulunan ve Ligue des Sociétés de la Croix Rouge [116] nâmını alan Salîb-i Ahmerler Heyʼet-i İttihâdiyesi'nde staj yapmak üzere bir zât gönderilmelidir. Staj müddeti yirmi gün, nihâyet bir ay sürer. Hattâ Japonya'dan, İskandinavya'dan hulâsa dünyânın en uzak mahallerinden bile buraya murahhaslar geliyor, efendim. Eğer kongre heyʼeti Gençlik Hilâl-i Ahmer Teşkîlâtı'nı tatbîk etmek arzusunda ise bu vesîle ile ana Hilâl-i Ahmer'inin teşkîlât-ı dâhiliyesi de tedkîk edilmiş olur. Yirmi gün için Paris'de staj görmek üzere bir zâtın iʻzâmı Hilâl-i Ahmer'in menâfiʻ-i âliyesi îcâbâtındandır, efendim". Sabur Sami Bey: "-Beyefendinin buyurdukları merkez-i umûmîye âid vezâifdendir. Merkez-i umûmî lüzûm görürse adam gönderir, bir taʻlîmâtnâme yapar". Haydar Bey: "-Efendim, Gençlik Salîb-i Ahmerleri taʻlîmâtnâme ile idâre edilmiyor, ayrıca nizâmnâme-i esâsî ister". Rasih Efendi: "-Nizâmnâmeyi gelecek sene kongre hâzırlar". Haydar Bey: "-Bu teşkîlât mutlaka görülmeledir, efendim. Ehemmiyet ve husûsiyeti vardır. Maʻârif'den de yardım istenecekdir. Gençlik Salîb-i Ahmeri Amerika'nın 1917 senesinde Harb-i Umûmî'ye iştirâkini müteʻâkib Amerika Salîb-i Ahmeri'nin Harb Dâiresi Reîsi Henry Davison nâmı- na gâyet yüksek kalbli, insâniyet-perver bir zâtın himmet ve teşvîkiyle meydâna gelmiş bir teşkîlâtdır. Bir teʼsîs-i cedîddir. O vakit yirmi milyon aʻzâ, yüz milyon dolar da vâridât kaydetdiler. Heyʼet-i muhteremenizin nazar-ı dikkatine arz ediyorum. Bu teşkîlâtı yapmak ve bir Hilâl-i Ahmer gençliği teʼsîs etmek arzu ediliyorsa mutlakâ bu teşkîlâtı başarabilmek için Paris'de Ligue des Sociétés de la Croix Rouge'a bir adam göndermelidir. Bu teşkîlâta yalnız Mısır Hilâl-i Ahmeri ve Şîr-i Hûrşîd-i Sürh nâmını alan İran Hilâl-i Ahmeri henüz dâhil olmamışdır. Eğer biz dâhil olmuş olsa idik, oraya gönde- receğimiz zâtın masârıf-ı seferiyesini Ligue maʻa'l-memnûniye kendi kasasından verirdi".