HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2408 asgarî bir müddet zarfında tahliyesi cevâben bildirilmiş ve orada mahfûz eşyânın kısm-ı mühimmi Çırağan anbârlarına nakledildiği gibi bakıyyesi de derdest-i nakil bulunmuşdur. Sekizincisi, teftîş mesʼelesi hakkında serd olunan mütâlaʻâtın berây-ı tedkîk nizâmnâmenin taʻdîliyle meşgûl komisyon tarafından tedkîk olunmasıdır. Meclis-i umûmînin bu bâbdaki karârına tevfîkan teftîş hakkındaki mütâlaʻa, nizâmnâme-i esâsîyi tanzîme meʼmûr komisyona havâle olunmuşdur ve komisyonca da bu bâbda nizâmnâme-i esâsî lâyihasına mevâdd-ı lâzıme derc ve idhâl edilmişdir. Hilâl-i Ahmer'in Ahâlî Mübâdelesindeki Hidemâtı Lozan Muʻâhede-i Sulhiyesi'nin istilzâm etdiği ve târîh-i beşeriyetin bir mislini kaydetmediği mecbûrî ve umûmî mübâdele gibi muʻazzam bir vazîfe karşısında kalan hükûmetimiz, memleketin hayât ve istiklâli, terakkî ve tekâmülüyle ve yarım milyonu mütecâviz vatandâşın mukadderâtıyla alâkadâr olan bu vezâifin kemâl-i dikkat ve muvaffakiyetle îfâsı için lâzım gelen teşkîlât ve vesâiti teemmül ve ihzâra başlaması üzerine hükûmetimizin bu hayırlı sâhadaki gayret ve mesâʻîsine aʻzamî sûretde iştirâk etmek Hilâl-i Ahmer için ihmâl kabûl etmez ve pek şerefli bir vazîfe idi. Cemʻiyetin maksad ve gâyelerine tevâfuk eden millî ve vatanî hidemâtı dâimâ vakt ü zamânında ve kemâl-i tehâlükle îfâ husûsunda bir an tereddüd etmemeyi şiʻâr edinmiş olan merkez-i umûmîniz, mübâdele işinin vüsʻat ve azametini nazar-ı dikkate alarak evvel emirde cemʻiyetin istitâʻat-ı mâliyesiyle mu- vaffakiyet-i kudret ve kâbiliyetini ölçmüş ve bu vâsiʻ sâha-i faʻâliyetde derʻuhde edeceği hizmetin bu had dâiresinde tesbît ve tefrîk edilmesini takarrür etdirmişdir. Bu arzu ve karâr alâkadâr vekâletlere arz edilerek mazhar-ı takdîr ve tasvîb olmuş ve cemʻiye- timizin uhde-i mesʼûliyetine teveccüh eden hidemât birinci defa olarak ber-vech-i âtî taʻyîn ve tesbît edilmişdir: 1-Yunanistan'daki ihrâc kapılarının beherinde [162] her türlü levâzımâtıyla birlikde birer heyʼet-i sıhhiye bulundurulacakdır. 2-Sefâin-i nakliye derûnunda zuhûr edecek hastaların tedâvî ve tegaddîleri gemilerde buluna- cak olan Hilâl-i Ahmer heyʼet-i sıhhiyeleri tarafından icrâ kılınacakdır. 3-İskân mıntıka iskelelerinin beherinde meʼmûrîn ve levâzım-ı sıhhiyeyi hâvî onar yataklı birer dispanser bulundurulacağından mezkûr iskelelere çıkan mübâdele ahâlîsinden hasta olanlar tedâvî ve tegaddî kılınacaklar ve içlerinde fakîr ve muhtâc-ı muʻâvenet olanların kâffesine lüzûmu mikdâr çamaşır, fanila, çorab ve ayakkabı tevzîʻ edilecekdir. 4-İskelelerde menâtık-ı iskâniyeye sevk olunacak ahâlîden zaʻîf, ihtiyâr, maʻlûl, kadın ve çocuk gibi vesâit-i nakliyeye arz-ı ihtiyâc edenlere mahsûs olmak üzere beher iskeleye 2-5 aded her türlü levâzım ve masârıfı Hilâl-i Ahmer'e âit olmak üzere İngilizlerden mübâyaʻa kılınan kamyonlar tahsîs olunacakdır. 5-Menâtık-ı iskâniyenin hükûmetçe lüzûm gösterilen mahallerinde ahâlînin muvakkat iskân- larına mahsûs olmak üzere İngilizlerden alınan muhtelif cesâmetde baraka ve çadırlardan istifâde edilecekdir. 6-İngilizlerden mübâyaʻa edilen ve Çanakkale'de bulunan barakalardan 1.016 adedi istifâde olunur mülâhazasıyla hükûmet emrine bırakılmışdır.