HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2419 Şile Harîkzedegânına Muʻâvenet Şile'de zuhûr edip azîm zâyiʻâta sebebiyet veren yangın akîbinde kâfi malzeme-i sıhhiye ve seyyâr aşhâne tertîbâtıyla mahall-i mezkûra bir heyʼet-i imdâdiye iʻzâm edilerek memleketin bütün iʻâşe teʼsîsâtı ve fırınları remâda münkalib olduğu bir sırada bütün kasaba sekenesine sıcak aş ve tâze ekmek teʼmîni sûretiyle pek kıymetdâr yardım îfâ edilmişdir. Sarıyer Harîkzedegânına Muʻâvenet [1]339 [1923] senesi Sarıyer'de zuhûr eden harîk-ı hâilden müteessir olan muhtâcînin tehvîn-i ihtiyâcı için mahall-i mezkûra iskân ve iʻâşe tertîbâtını hâmilen bir heyʼet-i imdâdiye iʻzâm edilerek iki ay müddetle fukarâ ve muhâcirînin iʻâşeleri teʼmîn edilmişdir. Burdur Harîkzedegânına Muʻâvenet Burdur'da zuhûr eden harîkden müteessir olan [172] muhtâcîn ihtiyâcâtına mahallî merkezince muʻâvenet-i lâzıme îfâ edildiği gibi merkez-i umûmîce de muʻâvenet-i nakdiyede bulunulmuşdur. Öyücek, Kuzika Harîkzedegânına Muʻâvenet Kastamonu vilâyetinin Öyücek ve Kuzika harîkzedegânı için mahallî teşkîlâtın îfâ eylediği yardıma zamîmeten merkez-i umûmîce de irsâlât-ı nakdiyede bulunulmuşdur. Gürcü Muhâcirlerine Yardım Acaristan'dan hicret edip elîm bir sefâlet ve mahrûmiyet içinde bulundukları görülen Gürcü muhâcirînin iʻâşesine bu husûsda teşekkül eden komite vâsıtasıyla iki bin lira sarf edilmişdir. Kars ve Bayezid Seylâbzedelerine Muʻâvenet Aras nehrinin tuğyânı dolayısıyla Kars ve Bayezid livâsında bazı köylerde vukûʻa gelen hasâr- dan mutazarrır olanlara mahallî teşkîlâtın îfâ etdiği yardıma zamîmeten Erzurum merkezi vâsıtasıyla iki bin lira tevzîʻ edilmişdir. Denizli Seylâbzedelerine Muʻâvenet Buldan ve Garbî Karaağaç'da vukûʻa gelen seylâb dolayısıyla zarara dûçâr olan muhtâcînin tehvîn-i ihtiyâcları için Denizli merkezinin îfâ eylediği muʻâvenete zamîmeten merkez-i umûmîce beş yüz lira irsâl edilmişdir. Orhangazi Harb Mesâibzedelerine Muʻâvenet Bir heyʼet-i mahsûsa maʻrifetiyle Orhangazi ve Gemlik harb mesâibzedeleri ihtiyâcâtı için 26.208 kilo dakîk irsâl ve tevzîʻ edilmişdir.