HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2422 Cağaloğlu Dispanseri Tıb Fakültesi'nin Cağaloğlu'ndaki muʻâyenehânesine mürâcaʻat eden ve fakülte heyʼet-i müder- risîn ve muʻallimîni tarafından muʻâyene edilen hastaların tedâvîleri için iktizâ eden ilâcları teʼmîn etmek üzere mahall-i mezkûrda teʼsîs edilmiş olan eczâhânemizde üç yüz otuz dokuz [1923] senesin- de 7.645 ve üç yüz kırk [1924] senesinde 7.764 reçete iʻmâl ve meccânen iʻtâ olunmuşdur. İzmir İkiçeşmelik Dispanseri İzmir Hilâl-i Ahmer Heyʼet-i Merkeziyesi'nin meşkûr hidemât ve mesâʻîsi meyânında bulunan İkiçeşmelik'de teʼsîs eylediği muʻâyenehânede mütehassıs etıbbâ tarafından her dürlü emrâz-ı tedâvî ve birçok fukarânın idâme-i sıhhatleri teʼmîn edilmişdir. Bu muʻâyenehâneye üç yüz otuz dokuz [1923] senesinde 28.324, üç yüz kırk [1924] senesinde 18.558 hasta mürâcaʻat etmiş ve ilâcları meccânen verilmişdir. Torbalı-Tepeköy Dispanserleri İzmir şehrindeki vezâif-i sıhhiyesini müsmir bir sûretde îfâ eden İzmir Heyʼet-i Merkeziyesi, mülhakâtı nazar-ı dikkatden dûr tutmayarak İzmir civârında bazı mahallerin ve bilhâssa Torbalı nâ- hiyesi ahâlîsinin civârdaki bataklıklar yüzünden maʻrûz kaldıkları müzmin sıtma hastalığından her sene yüzlerce telefât verdikleri ve bu sebeble ahâlî-i kadîmeden iki nesilden fazla idâme-i mevcû- diyet etmiş âilelere ender tesâdüf edildiğini câlib-i dikkat görmüş, mahallinde tedkîkât-ı sıhhiye ve fenniye icrâ etdirerek nâhiye-i mezkûre münbit ve mahsûldâr ve zengin bir muhît olmakla berâber ahâlînin bakımsızlıkdan vazʻiyet-i sıhhiyelerinin pek bozuk ve sıtmadan sîmâları umûmîyetle top- rak rengi almış bir hâlde oldukları hattâ iki aylık çocukların bile dalaklı bulundukları anlaşılmışdır. Numûne olmak üzere Tepeköyü'nde bir dispanser küşâdıyla emrâz-ı mütenevviʻa ve bilhâssa sıtma mücâdelesinde bulunmağı bir vazîfe-i mübreme ve milliye telâkkî eden heyʼet-i merkeziyemiz derhâl îcâbına tevessül ederek bu maksadla mahall-i mezkûra lüzûmu olan edviye ile bir tabîb iʻzâm ederek az zamân zarfında yapılan tedâbîr-i sıhhiye pek bâriz bir sûretde cidden şâyân-ı şükrân bir derecede muvaffakiyet göstermişdir. Tepeköy Dispanseri Torbalı ve Dağkızılca nâhiyeleri ahâlîsinin müzmin bir hastalıkdan kurtulmalarını ve sıhhat- lerinin dâimî bir sûretde taht-ı murâkabede bulundurulmasını teʼmîn için kurâ-yı mütecâvirenin her hafta merkez-i ictimâʻ ve pazarı bulunmak hasebiyle tercîhen Tepeköyü'nde etıbbâ ve müstahdemînin ikâmetlerine de elverişli olmak üzere numûne ittihâzına sezâ bir dispanser binâsı inşâ ve 16 Mayıs [1]340 [1924] târîhinde resm-i küşâdı icrâ edilmişdir. Binânın inşâsına kadar mahallinde teşkîl edilen dispanserde ve bilâhare binâ dâhilinde olmak üzere [1]339 [1923] senesinde 2.347 ve [1]341 [1925] senesinde 8.511 hastahânenin muʻâyeneleri icrâ ve muʻâleceleri meccânen iʻtâ kılınmışdır. İzmir merkezi bu iki dispanserle memleket sekenesine îfâ eylediği pek kıymetdâr muʻâvenete zamîmeten mülhakâtda sıtmadan en ziyâde muztarib olan ahâlîye tevzîʻ edilmek üzere kâfi mikdârda kinin gönderdiği gibi birçok muhâcirîne ve muhtâcîne de yatak, yorgan, battâniye, çamaşır, kömür, pirinç vesâir eşyâ tevzîʻ ve lüzûmuna göre nakden de muʻâvenetde bulunmuşdur.