HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2423 [175] İzmir Hilâl-i Ahmer Hastahânesi Yunanistan'dan naklolunan mübâdiller için mühim bir ihrâc iskelesi olan İzmir'de lüzûmu olan teşkîlât ve teʼsîsâtın îfâsı İzmir heyʼet-i merkeziyemize tevdîʻ edilmişdi. Heyʼet-i merkeziyemiz işbu vazîfe-i mühimmeyi diğer mesâʻî ve hidemâtı gibi hüsn-i sûretle îfâ ve intâca muvaffak olarak iki yüz yataklı bir hastahâne ve ayrıca bir dispanser teʼsîs etmiş ve bu teşkîlât sâyesinde bir gûnâ istîlâî hastalıklara meydân vermeyerek îfâ-yı muʻâvenet ve muzâherete devâm ve Klazomen Tahaffuzhânesi teşkîlâtına da ehemmiyetli sûretde muʻâvenet ve muzâheret ey- lemişdir. Bidâyeten Tepecik'de kâin emrâz-ı sâriye hastahânesinde ve bilâhare naklen Kemer muhâcirîn barakaları ittisâlinde teʼsîs olunan hastahâne ve nekâhethânede bir sene zarfında 512 hasta tedâvî edilmiş ve mahall-i iskânlarına sevk olununcaya kadar barakalarda iskân olunan muhâcirîn her gün merkezimiz tabîbi tarafından muʻâyene edildiği gibi bunlardan ayakda tedâvîsi mümkün olabilenlere teshîlât olmak üzere hastahâne ittisâlinde bir de dispanser teʼsîs ve küşâd olunmuşdur. Bu sûretle teʼsîs ve teşkîl edilen hastahâne ve dispanserler, izdihâm ve suver-i sâire ile muhâ- cirîn arasında vukûʻu muhtemel görünen emrâz-ı sâriyenin menʻ-i vukûʻuna âmil olmuşdur. İzmir heyʼet-i merkeziyemizin îfâ eylediği şâyân-ı şükrân hidemât ve muvaffakiyâtı bu vesîle ile de tekrâr eyleriz. Aydın, Adana, Manisa Dispanserleri Aynı sûret ve maksadla Aydın, Adana, Manisa'da mahallî heyʼet-i merkeziyelerinin murâkabe ve idâresi altında ve iktizâ eden malzeme ve muʻâlecesi merkez-i umûmîden gönderilmek üzere birer muʻâyenehâne teşkîl edilerek muhtâcîn-i marzânın muʻâyene ve tedâvîlerine çok fâideli olmuşdur. Yunanistan'daki Türk Üserâsına Muʻâvenet Yunanistan'da muhtelif karârgâhlarda mevkûf bulunan Türk üserâsının ihtiyâc ve vazʻiyetle- rini tedkîk etmek üzere Yunanistan'a muhtelif teftîş heyʼetleri gönderilerek kamplardaki üserâmızın ihtiyâcâtı tedkîk ve muʻâvenet-i lâzıme îfâ edilmişdir. Bilhâssa dizanterinin istîlâî bir şekilde icrâ-yı hükm etdiği Liossa karârgâhına gönderilen aşı ve malzeme-i sıhhiye ile birçok esîrlerimizin hayâtı kurtarılmışdır. Üserânın Âileleriyle Muhâberâtı Yunanlıların İzmir hezîmetinden sonra Yunanistan'da zuhûr eden hâdisât dolayısıyla posta muʻâmelâtının karışdığı ve üserânın gerek kendilerine gönderilen mektûbları almak gerek kendileri- nin yazdıkları mektûbları göndermek husûsunda dûçâr-ı müşkilât oldukları görüldüğünden bu vazʻi- yete âcilen çâre olmak üzere muhtelif vesâit meyânında Yunanistan'ın muhtelif nukâtında şuʻbeleri bulunan Genç Amerikalılar Cemʻiyeti'nden de istifâde edilmiş ve cemʻiyet-i mezkûre reîsi ile bu bâbda bir iʼtilâf akdedilerek Türk ve Yunan üserâsına âid nükûd ve mekâtibin mütekâbilen mürselün ileyhlerine muntazaman irsâli taht-ı teʼmîne alınmışdır.