HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2426 köy, Karahud karyeleri muhtâcînine dakîk mübâyaʻa ederek tevzîʻ edildiği gibi muhâcirîn ve muhtâ- cîne muʻâvenet-i lâzımeyi îfâ etmişdir. Mersin Hilâl-i Ahmer Merkezi Mersin'in Fransız işgâlinden istihlâsı üzerine yurdlarına avdet edip pek ziyâde muhtâc-ı muʻâ- venet bir hâlde bulunan köylere dakîk mübâyaʻa ve tevzîʻ eylediği gibi mahall-i mürettebleri Mersin olan muhâcirînin muvakkat iskânlarını teʼmîn için de mahallî iskân teşkîlâtına lâzım gelen kereste ve hasır mübâyaʻa etmek sûretiyle muʻâvenet-i lâzıme îfâ etmişdir. Konya Merkezi Sinîn-i sâbıkada meşkûr hidemât îfâ eylemiş olan Konya merkezimiz [1]339 [1923] ve [1]340 [1924] seneleri zarfında 14.521 lira 65 kuruş vâridât teʼmînine muvaffak olmuş ve bundan 1.136 lira 74 kuruş mübâdiller ihtiyâcâtına, 1.512 lira 34 kuruş memleket muhtâcînine, teşkîlât-ı sıhhiyesine sarf eylemiş ve 1.861 lira 65 kuruş merkez-i umûmîye irsâl eylemişdir. Kastamonu Merkezi [1]339 [1923] senesi zarfında Küre'de hâdis olan harîk-ı hâil musâbînine bin beş yüz lira, mın- tıka ihtiyâcât-ı sıhhiyesi için memleket hastahânesine bin on iki buçuk lira muʻâvenetde bulunduğu gibi muhtâcîne de lâzım gelen yardımda bulunmuşdur. [178] Bursa Merkezi Merâkiz ve şuʻabâtımız arasında hidemât ve mesâʻîsiyle temâyüz eden Bursa merkezimiz üç yüz otuz dokuz [1923], üç yüz kırk [1924] seneleri zarfında 34.567 lira vâridât teʼmînine muvaffak olmuş, mesâib-i harbden müteessir olan memleket ve mülhakât ahâlîsine mahallî teşkîlât-ı sıhhiye- sine, üserâ ve âilelerine, harîkzedegâna ve muhtâcîne muʻâvenet-i lâzımeyi îfâ etdiği gibi heyʼet-i merkeziye için beş bin yüz lira bedelle mükemmel bir binâ satın almış ve merkez-i umûmîye nakden 8.351 lira irsâl eylemişdir. Beynelmilel Salîb-i Ahmer Teşkîlâtında Hilâl-i Ahmer'in Vazʻiyeti [1]339 [1923] senesi meclis-i umûmîsine takdîm edilmiş olan raporun fasl-ı mahsûsunda zik- redilmiş olduğu üzere Harb-i Umûmî'ye kadar Beynelmilel Salîb-i Ahmer Komitesi, Hilâl ve Salîb-i Ahmerler arasında yegâne bir merkez-i irtibât olarak müesses bulunuyor ve Cenevre Mukâvelesi'nin ahkâm-ı mahsûsasına tevfîkan Salîb-i Ahmerler tarafından kendisine tevdîʻ edilen vezâifi bi'l-cümle alâkadârânın merbûtiyet ve muhabbetini teʼyîd edecek bir alâka-i mahsûs ve bî-tarafî ile taʻkîb ediyor idi. Harb-i Umûmî'den sonra, Düvel-i İʼtilâfiye tarafından vücûda getirilen ve ibtidâda sulh zamâ- nında emrâz-ı intâniye ile mücâdele ve mesâil-i sâire ile meşgûl olmak için teʼsîs olunan Beynelmilel Salîb-i Ahmerler İttihâdı bilâhare Beynelmilel Salîb-i Ahmer Komitesi'nin sâha-i faʻâliyetine dâhil bulunan mevâd ile iştigâle başladığından Hilâl ve Salîb-i Ahmerler âleminde bir nevʻ ikilik zuhûr