HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 52 2544 Yedinci Mâdde- Gençlik tabîbi muʻâyene etdiği çocukları tedâvî edemez. Tedâvîye muhtâc olanlar hakkında taʻkîb edilecek tarz-ı tedâvîyi çocuğun ebeveyn veya velîsine teblîğ edilmek üzere mekteb müdürüne veya âid olduğu idâre ve müesseseye işʻâr eder. Mekteb tabîb veya müdürü hasta çocuğun ebeveyn veya velîsinin tedâvî masârıfını iʻtâya gayr-ı muktedir olduğuna kanâʻat hâsıl etmişlerse müdür-i mekteb keyfiyeti Gençlik Hükûmet Dâiresi'ne işʻâr edecekdir. Çocuğun intihâb edeceği meslek hakkında ihtilâf zuhûr etdiği takdîrde tabîb tarafından mekteb müdüriyetine teblîğ edilecek olan esbâb-ı iʻtirâz Taʻyîn-i Meslek Kalemi'ne gönderilir. Sekizinci Mâdde- Gençlik tabîbi öğüd ve ihtârlarının icrâ ve tatbîk edilip edilmediğini nazar-ı dikkatde bulunduracak ve bu husûsda mekteb müdüriyeti, mürebbîler, muʻallimler Gençlik Hükûmet Dâiresi'nden muʻâvenet görecekdir. Dokuzuncu Mâdde- Emrâz-ı sâriye zuhûrunda kavânîn-i mevzûʻa mûcebince hareket olunur. Onuncu Mâdde- Gençlik tabîbi vefeyât-ı etfâle, vereme ve bir mâhiyet-i dâime hâlini alan ta- gayyür-i eşkâle ve gençlerde içki ve tütün sûistiʻmâlâtına karşı takayyüdâtda bulunacak ve işbu vezâi- fin îfâsında muttaliʻ olduğu ahvâl ve vekâyiʻi bir tarz-ı samîmânede teşrîk-i mesâʻî etdiği basîret-i ictimâʻiyenin salâhiyetdâr şuʻabâtına bildirecekdir. On Birinci Mâdde- Çocukların muʻâyenesi mektebin husûsî bir salonunda icrâ ve yevm-i muʻâ- yene mekteb müdüriyetine evvelce ihbâr edilir. Sinn-i tahsîle vâsıl olmamış veyâhûd müessesât-ı tedrîsiyeye kabûl olunmamış çocukların yevm-i muʻâyenesi iʻlân olunur. Mekteb veya müessese mü- düriyeti tarafından çocukların ebeveyni yevm-i muʻâyeneden haberdâr edilmek ve muʻâyenede hâzır bulunmalarına müsâʻade olunmak lâzımdır. On İkinci Mâdde- Bütün gençlik safahâtını taʻkîb edecek olan sıhhat cüzdânına netîce-i muʻâ- yene derʻakab kaydolundukdan sonra cüzdân, muhâfazaya meʼmûr olan muʻallime tevdîʻ edilir. Mezkûr cüzdâna husûsî muʻâyeneler netîcesi ve hastanın âilesinde zuhûr edecek vekâyiʻ ve hâdisâta âid müşâhedât dahi kaydolunur. On Üçüncü Mâdde- Mecbûriyet-i tahsîliyeye henüz tâbiʻ olmayan çocukların cüzdânı nâhiye müdürü tarafından ve diğer çocuklarınki devâm etdiği terbiye müessesesince muhâfaza olunur. Sıh- hat cüzdânları gençlik tabîbi tarafından çocuğun ilk muʻâyenesinde tanzîm edilir. Çocuk bir mektebe veya bir taʻlîm ve terbiye müessesesine [256] dâhil olduğu veya mekteb, müessese ve ikâmetgâhını tebdîl etdiği zamân cüzdân merciʻ-i ahîrine tevdîʻ edilir. Cüzdânın çocuğa tevdîʻi sûretiyle işbu muʻâmelenin yapılmaması şâyân-ı tavsiyedir. Tahsîlin hitâmında cüzdân mekteb şehâdetnâmeleriyle berâber çocuğun devâm etmekde olduğu mekteb idâresi tarafından muhâfaza edilir. On Dördüncü Mâdde- Gençlik tabîbi esrâr-ı meslekiyeyi muhâfaza ile mukayyeddir. Çocuğun sınıf arkadâşları, ebeveyn ve velîsi muʻâyene-i tıbbiye netâyicine ve sıhhat cüzdânı muhteviyâtına dâir maʻlûmât alamazlar. Mekteb idâresi hâricinde yalnız Hükûmet Gençlik İdâresi ahz-ı maʻlûmât etmeğe meʼzûndur. Gençlik tabîbi çocuğun ebeveyn veya velîsine hasbe'l-lüzûm şifâhen ve sûret-i husûsiyede vesâyâda bulunabilir. On Beşinci Mâdde- Gençlik tabîbi mekteb ve sınıfları ziyâretinde binânın tertîbât-ı dâhiliye- sinde vâcibü't-taʻdîl ve izâle gördüğü kusûr ve nevâkıs üzerine mekteb müdüriyetinin dikkatini celb etdikden sonra keyfiyeti livâ tabîbi ile Maʻârif Müdüriyeti'ne işʻâra mecbûrdur.