HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 52 2548 nını taşıyan bu meclis-i latîfin bütün aktâr-ı cihândan toplanıp gelen 465 mümessilesi altı gün mü- temâdiyen çalışarak şimâlden cenûba ve şarkdan garba kadar imtidâd eden her sâhada içkiden zarar gören, ıztırâb çeken yalnız kadınlık olduğunu ve bu belâ-yı cihânın fenâlıklarını yine her yerde bizzât kadınlığın kendisi şerh u îzâh etdiğini isbât etmişlerdir. Şimdiye kadar birçok memleketlerde kadınlar sâyesinde elde edilen netâyic-i mühimme bu husûsda geri kalmış diğer memleketleri teşvîk ve teşcîʻden bir an hâlî kalmamışdır. 145 ziyâretçi ka- dın hâric olmak üzere Amerika Heyʼet-i Murahhasası 150 kadından teşekkül etmişdir. İngiltere Hükû- meti içki memnûʻiyetini cebren kabûl etdirmek için geldikleri vâhimesiyle Beyâz Kurdela Cemʻiyeti aʻzâsını istîzâh etdiği esnâda bu nisvân-ı muhtereme: "-Emîn olunuz, buraya hiçbir şeyi cebren kabûl etdirmeğe gelmedik. Yalnız içki aleyhinde bil- diklerimizi söylemeğe geldik. Zâten içki memnûʻiyeti cebren kabûl etdirilemez ve hâricden de gire- mez. O, terbiye netîcesi ve halkın dörtde üçünün azim ve irâdesi mahsûlü olarak memleketin içinde doğar" cevâbını vermişlerdir. *** Avustralya'nın ilk kuru 1 bir kıtʻa olacağını dünyânın bu uzak memleketinin yirmi beş mümes- silesi beyân etmişlerdir. Avustralya'da içki memnûʻiyeti için her havâlînin ayrı ayrı efkâr u ârâsına mürâcaʻat edilmekdedir. Kanada'da politika rekâbeti yüzünden memnûʻiyet şimdilik teehhur etmekde ise de yakın bir âtî için muvaffakiyet ümîdleri beslenmekdedir. Kanadalılar: "-Ontario eyâleti kurudur ve kuru kalacakdır" diyorlar. Japonya, Çin, Hindistan ve Mısır'da gerek müskirâta ve gerek afyon ve morfin gibi menviyâta karşı yapılan mücâdelede büyük bir terakkî görülmekdedir. 10.000 Beyâz Kurdela'sı ve 800.000 muhtelif cemʻiyetlere mensûb içki düşmanı bulunan İsveç, memnûʻiyete pek takarrüb etmişdir. Norveç'de taktîr edilmiş ispirtolarda cârî olan memnûʻiyet tahammür etmiş ispirtolara şâmil değildir. Finlandiya'da içki memnûʻiyeti mevcûddur. İsviçre'de ayyâşlık müzmin bir hâlde devâm [260] etmekde ve herkesin evinde iʻmâl edeceği müskirât için inbik köyden köye dolaşmakdadır. Beyâz Kurdela'nın kırk beşe bâliğ olan şuʻabâtı tahammür etmemiş meyve usârelerinden küûl- süz müskirât iʻmâli usûlünü neşr u taʻmîm eylemekdedir. Avusturya ve Almanya'da memnûʻiyet vazʻı için kemâl-i gayret ü metânetle çalışılmakdadır. İngiltere'de meyhâneler Pazar günleri kapalı olup eyyâm-ı sâirede ise muʻayyen saʻatlerde açılır ve on sekiz yaşına dâhil olmamış çocuklar meyhânelere giremezler. İskoçya'da memnûʻiyet için ârâ-yı ahâlîye mürâcaʻat usûlü cârîdir. İrlanda'da meyhâneler Cumartesi günleri sâʻat dokuzdan iʻtibâren ve Hazret-i İsa'nın yevm-i vilâdetiyle diğer bir yevm-i dinîde mesdûddur. İspirto ve müskirâtın bakkâl dükkânlarında fürûhtu memnûʻdur. Eczâhâneler ancak tabîb reçetesiyle ispirto verebilirler. 1 İçki memnûʻiyeti cârî olan memleketlere "kuru" ve bu memnûʻiyetin cârî olmadığı memleketlere de "yaş" taʻbîr olunuyor.