HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 52 2549 Ulster'in en büyük müskirât fabrikatörü mâzîsi ile katʻ-ı alâka ederek içki düşmanı kesilmiş ve memleketin menâfiʻi nâmına dâü'l-küûle karşı parlamentoda mücâdeleye başlamışdır. *** Çocuk yuva ve bâğçesinden dârülfünûna kadar her yerde dâü'l-küûl aleyhindeki tedrîsât gitdik- çe terakkî ve inkişâf etmekdedir. Pederin telkîhden mukaddem ve vâlidenin esnâ-yı hamlde ve mürziʻanın zamân-ı irzâʻda içki istiʻmâli ve peder ve vâlidenin sû-i misâl teşkîl edecek sarhoşluk vukûʻâtı ve içkinin çocuklar üze- rinde yapacağı teʼsîrât-ı muzırra vâlidelere îzâh edilmek sûretleriyle dâü'l-küûl terbiyesi takviye edil- melidir. "-Eğer kadın bir şeyi arzu ederse…" sözü bir hakîkat ise 750.000 içki düşmanı kadınların yurd ve çocukları nâmına taleb etdikleri şey ne kadar haklıdır! Belçika Salîb-i Ahmer Mecmûʻası'ndan SIHHAT İÇİN… Hastaların ve hastalıkdan yeni kalkanların ağız, tükürük, salya, idrâr, tagavvut yani necâset- lerinde vücûd ve çamaşırlarıyla istiʻmâl etdikleri eşyâda mevcûd ve ancak mikroskopla görülebilen gâyetü'l-gâye küçük zevi'l-hayât yani mikroplar emrâz-ı sâriyenin kısm-ı aʻzamını nakl ü sirâyete vâsıta olurlar. Bu kuyunun suyuna kadar vâsıl olan tagavvutâtdan tekessür eden mikroplar yalnız içmekle de- ğil, tabak, bardak, süt kabı vesâireyi o mülevves su ile yıkamakla da hastalık tevlîd ederler. Kezâ süt, salata ve meyveler, bu su ile bulaşdığı takdîrde birçok hastalık neşredebilirler. Buna binâen hastaları tecrîd etmek ve hastaların istiʻmâl etdikleri eşyâyı suda kaynatmak, süblime veya krezol mahlûlüyle tathîr etmek, idrâr ve necâsetlerini kireç kaymağıyla dezenfekte etmek lâzımdır. Âbdesthânelerin temizliğine dikkat ü ihtimâm edilecek, kuyu ve lağımların neşf etmemesine ehemmiyet verilecek ve küçük bir şübhe üzerine kuyunun suyu tahlîl etdirilecek ve mevâdd-ı gıdâiye iyi pişirilecek ve çiğ yenilecek her şey güzelce yıkanacakdır. Sinekler, hastaların mikroplarını sağ ve sâlim insânlara nakletmeğe vâsıta olduklarından gübre- lerin üstü örtülecek, ahırlar temiz tutulacak, sofra artığı, evin süprüntüleri kapalı kaplarda tutulacak ve bir tarafdan bu muzır hayvânların tekessürüne mâniʻ olacak her şey yapılacak ve hastalarla çocuk- lar sineklerden muhâfaza edilecekdir. Kızamık, kızıl, çiçek, suçiçeği, [261] kabakulak, boğmaca, kuşpalazı, iltihâb-ı sehâyâ, bir çocu- ğun diğer çocukla konuşduğu esnâda ihrâc etdiği katarât-ı luʻâbdan geçeceği gibi öksürme, aksırma ile ve iki çocuğun birbirinin ağzından aldığı şeker ve bonbonlarla ve bir ağızdan diğer ağza giren kurşun kalemi vesâire ile intikâl eder. Umûmiyetle hastalık henüz âsârını göstermeden bu sirâyet vukûʻa geldiğinden bir çocuk sıh- hatçe "iyi değilse" yatağa yatırılacak, diğer çocuklardan tecrîd edilecek ve tabîbe muʻâyene etdirile- cekdir. Tifo hastalığı su, süt ve çiğ ekl edilen şeylerden, bilhâssa istiridyelerden ve hastalığı geçirmiş olup da basillerini etrâfa neşreden hâmil-i maraz eşhâsdan sirâyet eder. Bu cihetle, bazı aşçı ve ma- navların haberleri olmaksızın hastalığı taʻmîm etdikleri görülmüşdür.