HİLÂL-İ AHMER MECMÛʻALARI / CİLT 6

Türkiye Hilâl-i Ahmer Mecmû‘ası Sayı 52 2550 Akciğer, boğaz, bağırsak, kemik, dimâğ veremi, veremli ineklerin sütünden (Sütler bu sebeb- den dolayı iyi kaynatılmalı veya pastörize edilmelidir.), tükürük ve balgamdan (aynı sebebe mebnî yere tükürmemeli) ve müşterek hayâtdan geçer. Veremli bir vâlidenin irzâʻ etdiği çocuk ve bir evde veya kalem, yazıhânede ve fabrikada bir müteverrim ile hâl-i temâsda bulunan çocuklar ve gençler bu veremlinin tükürük, aksırık ve öksürüğünden, bûsesinden, çatal, bıçak, bardak vesâirenin müştereken istiʻmâl edilmesinden marazın dâimâ tehlike-i sirâyetine maʻrûz kalırlar. Zayıflayan, öksüren, soluyan ve akşâmları derece-i harâreti yükselen her şahıs bilâ-ifâte-i vakt kendisini tabîbe muʻâyene etdirmeli veya bir verem dispanserine mürâcaʻat etmelidir. Bidâyetde verem bilâ-müşkilât tevkîf edilebileceği gibi kavâʻid-i sıhhiyeye ve tahâret ve nezâ- fete riʻâyetle ve irzâʻ edilen çocukları vâlidelerinden ayırmakla da kâbil-i ictinâbdır. Frengi ve belsoğukluğu umûmiyetle cinseynin münâsebetiyle sirâyet etmekde ise de frengi bûseden ve müştereken istiʻmâl edilen tuvalet levâzımından, çatal, bıçak, bardak, havludan da intikâl eder. Ebeveynde zuhûr eden frengi tedâvî edilmediği takdîrde tevellüdden mukaddem çocuğa da sirâyet eder. Bu husûsda hâsıl olacak küçük bir şübhe üzerine tabîbe mürâcaʻat lâzımedendir. Bu has- talıkları şifâyâb edecek ancak tabîbdir. Zamânımızda frengi ve belsoğukluğunun tedâvîsi çok sehîl, çok serîʻ ve katʻîdir. Yukarıda taʻdâd etdiğimiz emrâzdan gayrısı ve bilhâssa bütün suver ve eşkâliyle emrâz-ı kal- biye, karaciğer, böbrek, sekte, tasallüb-i şerâyin ayyâşlıkdan ve fart-ı iştigâlden, fikdân-ı havâ ve harekâtdan geldiği için sârî değildir. Emrâz-ı akliye bidâyetde kâbil-i tedâvîdir. Ancak ebeveyn, âile reîsleri, ehibbâ hastayı cezâlan- dırmak ve onunla istihzâ etmek ve suver-i sâire ile hastalığa vehâmet verebilirler. Emrâz-ı akliye için de hemen ya bir mütehassısa veya bir dispansere mürâcaʻat etmek muktezîdir. Emrâz-ı akliyeden tevakkî için izdivâcda şerâit-i sıhhiye ve irsiye nazar-ı dikkate alınmalı, müskirâtdan ictinâb ve çocuklukdan iʻtibâren nefse hâkim olarak iʻtidâl-i demi muhâfaza etmeli, sıh- hat ü âfiyete îrâs-ı halel edecek iʻtiyâdâtdan sakınmalıdır. Mâhiyeti henüz anlaşılamayan kanser ise cild, dudak, dil, miʻde, bağırsak, [262] meme ve ra- himde tavazzuʻ eder. Kanserin bidâyetde tedâvîsi kâbil olduğundan iltiyâm bulmayan bir yarada veya gayr-ı tabîʻî bir şişkinlikde veya devâm eden istifrâğ ve gaseyânlarda vakit gâib etmeden tabîbe mürâ- caʻat etmeği unutmamalı ve mütetabbib ve şarlatanlardan, kocakarı ilâclarından tevakkî edilmelidir. MÜHİM BİR İSTATİSTİK Amerika'da Ohio Hükûmeti Sıhhiye Dâiresi resmî şu istatistiği neşrediyor: 1924 senesi zarfında Ohio'da 130.610 vâlide ber-hayât çocuk doğurmuşdur. Nevzâdlardan 1.414'ü ikiz, on biri üçüzdür. Bu sene her dört dakîkada bir çocuk doğmakdadır. Çocukların 67.892'[si] erkek, 64.156'sı kızdır. Üçüzlerin 12'si kız, 21'i erkekdir. En çok doğumAğustos ayında, en az Teşrîn-i Sânî'de olmuşdur. Vâlidelerden dördü 12 yaşında, yedisi 14 yaşında, on biri 50 yaşında, biri 51, dördü 55 ve diğer biri 59 yaşındadır. 450 vâlide on ikinci çocuğunu, 300 vâlide on üçüncü, 123'ü on dördüncü, 66'sı on beşinci, 25 tânesi on altıncı, 8 vâlide on yedinci, 5 vâlide on sekizinci, 2 vâlide on dokuzuncu, bir vâlide de yirminci çocuğunu doğurmuşdur. Amerika'da bu sene doğum rekoru, dakîkada 5 çocukdur.